إدي معلوف من برمانا: انجازات التيار منفتخر فيا.. وتحسين الوضع المعيشي صدقوني منو أصعب من اللي حققناه (Audio+Video+Pictures)

– بعهد الرئيس عون رح ينسحق الإرهاب بتضامن جيشنا وشعبنا ومقاومتنا

مقتطف من حديث ممثّل رئيس التيار الوطني الحر المرشّح المحتمل للإنتخابات النيابية بقضاء المتن إدي معلوف، بحفل عشاء هيئة برمانا في التيار في Broumana Hôtel:

• بالبداية بدّي هنّي الجيش اللبناني بعيدو الـ72، وحيّي كل ضابط وجندي منتشرين عَ مساحات الوطن،
  بدي هنيون مسبقاً على النصر الأكيد على داعش بالمعركة القادمة
• بدي اتوجّه لتحية لبرمانا لكل مين ساهم وعم يساهم من بلدية ومخاتير وأهالي لإعادة احياء السياحة،
  اختيار وتشجيع السياحة لإنعاش الإقتصاد ببلدة متل برمنا ووطن متل لبنان، ضرورة لدورتنا الإقتصادية
• نموذج المبادرة والحركة والعمل والنفس الإيجابي اللي معتمدينو ببرمانا، هوي النموذج لازم يتعمم على البلد،
  مش نَفَسْ النق والعجز والإحباط اللي معتمدو البعض لكسب شوية شعبية
• صحيح انو المشكلة الإقتصادية كبيري بالبلد،
  بس اليوم في جهد استثنائي، من فخامة الرئيس، ومن الحكومة ومن التيار للخروج من الأزمة

ليش اليوم قرّر التيار يركّز على هيدا الملف؟
ليش اليوم أطلق مشروعو الإقتصادي؟

الجواب هيّن..

• ركائز الإقتصاد الناجح، هني الإستقرار الأمني والسياسي،
  مهما كان مشروعك الإقتصادي مدروس وطموح وواعد، ما ممكن تنفذو بوجود احتلال عَ أرضك متحكم بقدرات البلد
• سبب تاني لتحقيق مشروعك الإقتصادي، وجود تأثير فاعل ووزن الك ضمن مؤسسات الدولة والهيئات الإقتصادية، وهيدا كمان ما كان متوفر سابقاً..

اما اليوم

• بعد ما حقق التيار أهدافو من تحرير الوطن واسترجاع الحقوق، وضع الملف الإقتصادي أولوية، ورح ننجح بتحقيقن، متل ما نجحنا بتحقيق أهدافنا السابقة
• مسيرتنا واضحة،
  صمدنا بوجّ الإحتلال وإنتصرنا، وساحة 7 آب بتشهدلنا، وبكرا الإثنين رايحين ندشنها
• اصرينا على ايصال رئيس قوي، ونجحنا،
• وقفنا بوج الإجحاف بالتمثيل المسيحي داخل الحكومة، ونجحنا،
  طالبنا بصحة التمثيل بقانون الإنتخابات، ونجحنا
• هيدي مش معارك وهمية خضناها، هيدي وقائع كلنا عشناها
  
• أشغال بسد بقعاتا، يللي بتغذّي وسط المتن، بتنتهي بعد سنة ونص،
  وهيدا المشروع بتستفيد منو برمانا، ومبدئياً لازم تنتهي مشكلة الماي ببرمانا
• ليه ما حدا بضوي على هيدا التحسّن بالكهربا،
  ليه بس يكون في انجاز معين، ما بينحكا عنو،
  كلنا منعرف الجواب؟؟؟
  الإنجاز الو 100 بيْ والفشل منكبو عَ التيار

تعو نتذكّر

• العهد السابق خلال 6 سنوات.. شو تحقق؟
  – لا تمثيل صحيح
  – لا تعيينات ادارية
  – لا قانون انتخابات
  – لا محاربة للفساد
  – لا موازنة
  – لا سلسلة رتب ورواتب
  – لا محاربة جدية للإرهاب
• بينما اليوم، وبظرف 9 اشهر من عهد الرئيس عون،
  – تشكلت حكومة ميثاقية
  – اقر قانون للإنتخابات
  – ستُقر موازنة شفافة
  – ستقر سلسلة مدروسة خلال الأسابيع القادمة
  – انطلقت مشاريع انمائية كبيري، وحصة المتن، بتتعدى فيا 90 مليون $ ، الجزء الأكبر منها لحل مشكلة السير على مداخل وخارج المتن الشمالي
  – وقريباً بعهد الرئيس عون رح ينسحق الإرهاب على كل الأراضي اللبنانية بتضامن جيشنا وشعبنا ومقاومتنا

أخيراً

• مع احترامنا لكل منتقدينا، بجردة ملموسة عن تاريخنا، وجزء من إنجازاتنا كتيار،
  نحنا فخورين فيا…
  
  والأهداف الموضوعة نصب أعيننا، واولها تحسين الوضع المعيشي والإقتصادي ومحاربة الفساد، صدقوني ما رح يكونو اصعب من اهدافنا اللي حققناها سابقاً.. وتيار التحرير واسترجاع الحقوق رح يصير تيار الإنماء والإزدهار وفرص العمل، ونشالله بعد فترة قصيرة الإزدهار والحياة بعمو برمانا ولبنان،وبتصير عَ مدار 365 يوم بدل ما تكون عَ 60 يوم بالسنة.
• عشتم،
  عاش التيار الوطي الحرّ
  عاشت برمانا،
  عاش لبنان

رصد Agoraleaks.com

https://www.youtube.com/watch?v=WEl0-qsmDKo