الأب مروان خوري عن التطاول بحق الرهبنة المريمية: منفتخر بالآباء اللي شُهّر بهم ونتحدّى أي طالب أوقفنا تعليمه لسبب مادي.. و”السي فهد” رايحا عَ التحقيق (التفاصيل – Audio)

– أعمال الرحمة مش للنشر، بس نحنا بملايين الدولارات نسدّ عجز طلابنا..
– طلعنا على ملف البنت، إذا مغلطين معا بشي، طلع عاملين حسومات لخيها ولأهلها..
– الكنيسة تتحسّس معاناة الناس، بس مش هيي الدولة ولا هيي مسؤولة عن الفقر بالمجتمع..

الأب مروان خوري يردّ على كل التطاولات على الرهبانية المارونية المريمية في إتصال مباشر مع إذاعة صوت الغد: (28 تموز 2017)

• عنجدّ مصدومين صرنا من الطريقة اللي صارت معتمدة من وسائل إعلامية رسمية، بخصوص كيفية تعاطيها مع كل المواضيع المطروحة.
• كل العالم بيعرفو إنو في شي إسمو “الإعلام العشوائي” اللي هوي وسائل التواصل الإجتماعي،
  ومطلق أي إنسان بيقدر يفوت عليا، ويكبّ الخبر اللي بدّو ياه.
  بس هيدي منا وسيلة رسمية منقدر نعتمدا حتى ننقل خبر صحيح أو نلقط خير
• للأسف  تبنت الخبر وسائل اعلام، وانتشرت متل الهشيم بلبنان كأنا مصدر رسمي،
  وصار في متل نوع من التأكيد.
  بتأسف انو وسيلة إعلامية مرئية تحط الخبر متل كأنو مرجع رسمي، وحطتو بنشرة الأخبار.
  قناة “الجديد” حطّت الخبر بطريقة متل كأنو مؤكد الخبر، وبالأخير هيك اشارت الى انو الرهبنة ردّت.
  كأنو في حملة مبرمجة
  – على الكنيسة،
  – على الرهبان.
  – على الحياة الرهبانية. لتشويه هالصورة.
  لضرب المصداقية. مصداقية صورة الكاهن، والمكرّس، بعقول المؤمنين.
  لأنو هيك خبر، ما تتصوري قديه بضعّف الإيمان عند النفوس الضعيفي.
  وقديه بيخلق شك خاصة، ما بعرف من وين استقوا المعلومات، حتى بلشو يتداولوها.
  ومش بس تتداول بوسائل التواصل، بلشت تتدوال بالصالونات، وبأحاديث الناس…

• هالأشخاص اللي عم يتداولو الأخبار، بانيين آراؤن ومعلوماتن بحسب الأصول؟ على شو؟
  على خبرية بنت كبتها، واليوم رايحا البنت ع التحقيق
• اسم البنت “السي فهد“، ساكني بجعيتا، وبتعلّم رقص.
  هيّي بنت معلمّة عنّا، وكنّا نعمل حسومات لخيّا، ولأهلا.
  لما كشفنا الملف، تنشوف “بركي عندا شي ثأر عَ المدرسة” او حدا مغلّط معا”
  وبردو هيدا لا يبرّر، على اعتبار إذا موجود أي شي غلط…
  على كل حال اليوم، رح تروح على تحقيق، لأنو مش مقبول بقا، رهبنة عريقة، عمرا مئات السنين، منفتخر بيللي منعملو مع الناس،
  مش حتى نتباهي بالأعمال، هيي مفروضة عيلنا أعمال الرحمة.
  لكن إذا من بيّن الأرقام، اللي منعمل فيا خير ومساعدات، ما حدا بجيب سيرتا.
  ونحنا ما منرضى، لأنو مش للتباهي هالمواضيع.
  بس كمان بالمقابل، مش انو يضربولنا الصورة، ويصيرو يلفقو خبار كاذبة علينا
• نحنا منفتخر بالآباء يللي ورَدتْ أساميهن، بهالتلفيقة اللي صارت، إن كان:
  – أبونا شربل حداد
  – أبونا دومينيك علم
  الريّس العام قصد قال: آباء تفتخر بهم الرهبنة، بالمقال اللي رد فيه على الإشاعات الطالعة
  وإن كان بآباء الجامعة،
  – أبونا وليد موسى
  – أبونا بشارة خوري
  اللي أنجزوه بهالست سنين، بيرفع الراس:
  – إن كان على المستوى الأكاديمي، وين وصلو بالجامعة وبالمدرسة.
  – وإن كان على المستوى الإنمائي، شو عملو مشاريع فعلاً بتعود لخير الطالب.
• خليهم يعطونا تبرير واحد، انو نحنا أصريّنا على ولد، منو دافع قسطو،
  أو على حدا عندو مشكلة مالية، شحطناه، او كان المال عائق انو ما يقدر يكفي درسو عنا.
• يعطونا حادثة وحدي،
  أنا اليوم المسؤول المالي عن الرهبنة، كنت، وسلمّت مهامي لأنو بعد 6 سنين، دايمن الرهبنة في تغييرات.
  أنا بقدر بيّن بالأرقام، ومش طريقتي هيدي، حتى قلّك قديه دافعي الرهبنة سدّ عجز بميزانية المدارس من ورا أقساط غير محصلّة عند الناس.
  بملايين الدولارات…
  بملايين الدولارات…
  
  إذا بفرجيكي المساعدات اللي بتقدمون الجامعة، كمان للأشخاص اللي ما عندن إمكانية يقدرو يدفعو القسط، او أي شيء من القسط…
• هالقد الرهبنة قادرة تعمل.
  وبذات الوقت الرهبنة منّا دولة، تقدر تحلّ مشكلة الفقر عند الناس.
  لكن الرهبنة بتتحسّس مع مشاكل الناس، وبتشاركن بالمشكلة، بس ما فينا نكبّ كلّ العبء علينا.
• مش بهالطريقة بينتشر ويتشهّر بالرهبنة بأخبار كاذبة ملفقّة..
  ويتسمّى آباء الن مكانتهم بالرهبنة،
  والن محبتن.
  والن مصداقيتن.

يسأل الأب مروان خوري: شو غرضا لالسي، ومين وراها.. يقول:

• نحنا رفعنا هالأمر للقضاء، واليوم رح يبلشو بالتحقيق.
  ورح يبلشو استدعاء الأشخاص، وكل ما يكشفه الأمر، لحتى نشوف فعلاً مين عم يفبرك هالمواضيع، وشو الغاية منّا.
• بذات الوقت اللي بيقهرك، انو أطلقت الرهبنة بيان رسمي، من أعلى سلطة فيا،
  إنو هالخبر اشاعات. وبقي متداول، ويرجع ينبعت “رسائل”: لاق مأكّد اللي حكيناه نحنا، والسرقة موجودي، والرهبنة بدها تغطي عليون.
  طيب كيف بدّك تتعاملي مع هيك أشخاص، الاّ ما تروحي للقضاء، وتحصلي حقك منن.
• يعني اليوم اللسان مين بيقدر يضبطو؟
  اللي بدو قولو قدام الناس، واللي عم يسمعو هيك أخبار…
  رجاء خاص:
  – الواتس آب
  – الفايسبوك.
  منّن وسيلة رسمية نستقي منها الخبر!!!
  مطلق انسان بيقدر يحكي اللي بدّو ياه، هيدا إعلام عشوائي.. مين مكان بيقدر يفوت عليه.
  هلق انا بقدر فوت وكبّ مثلاً (بعيد الشرّ) عن صوت الغد، انو عامل.. طالع نازل.
  بصير خبر معتمد بوسائل الإعلام.. وبأكدها!!
• وين وصلنا!!
  وين صرنا!!!
  هيدا كاهن. عندو علاقتو مع الناس. عندو علاقتو الروحية. مين بعدان بصدّق.
  عرفو شو عم تضربو؟؟؟
  في مسؤولية عند الله وعند ضميرنا يا عمي.
  اليوم الكلمة أقوى من الرصاصة.
  بالرصاصة بتقدري تقتلي انسان، بس بالكلمة بتقدري تقتلي صيتو، وتقتلي كرامتو، وحضورو بالمجتمع وبين الناس؟؟
  فيا جرم؟
  ربنا بقول بالإنجيل: من قال عن اخيه، يا أحمق يستحق نار جهنم… مش بس اللي بيقتل بالجسد، اللي بيقتل بالكرامة وبالصيت، يستحق نار جهنم.
• بعدان شو عاملين للناس.. مش عم احكي حتى ندافع…
  الله يسامح اللي عم يعمل هالشي. أنا من قلبي بطلبلو الغفران، بس يعرف مقدار الأذى يللي  عم يبثو من خلال الأقاويل الكاذبة والشائعات..

ومع تأكيد الإعلامية “دانيال” أنّ إذاعة صوت الغد ستتابع مع الأب مروان خوري مجريات تحقيق الدعوى، قال الأب مروان خوري:

• على الأكيد سنتابع الموضوع، وسننشر الحقيقة،
  وسنطلب من الأشخاص اللي لفقو هيدي الأكاذيب،
  وسنطالب وسائل الإعلام يللي سوقّت هالأخبار، انو مطرح ما سوقتهم، يرجعو ينشرو الخبر على حقيقتو…

رصد Agoraleaks.com