تحسّن بالحالة الصحية لرنا ورامي: كملو صلا..

آخر المعطيات عن صحة رنا، ينقلها شقيقها رامي:

• المجد لله..
  بطمنكن نهار السبت 22 تموز شلنا الـ”Tube” اللي كان زاعجا لرنا ،
  والحكما كانو عم يراقبو نَفَسا، تيشوفو إذا بيضطروا يتدخلو..
• الحمد الله رنا عملتْ خطوة كتير إيجابية ونفسها كتير منيح..
  وشلنا الأكسيجين.
• بخصوص الوعي والتفاعل معنا، بعدن بسيطين نوعاً ما، بس ما منعرف شو السبب:
  – هل يا ترى لأنها معصبة وموجوعة، ومكرزة…؟
  – هل يا ترى عم تطلع من الصدمة…؟
  – أو لا سمح الله في ضرر بالدماغ…؟
  هيدا الشي ما فينا نأكدو الاّ من خلال الـ”IRM” وصار فينا ننقلا حتى نعمل الـ”IRM”..
• فأنا اللي بطلبو منكم، انتو اللي عم تصلولا،
  كثفو الصلا أكتر. واللي بعد ما سلى يتكّل عَ رحمة الله، ويصلي.
  اللي بعد ما اعترف يعترف…
  اللي عم يصوم.. يصوم، أو يقطعْ، أو لساعة 12، او أي اماتة يمكن يعملا..
  لأنو الكل بيعرف انو الصلا بتعمل عجايب.
  1- ان كان من ناحية الشفاء.
  2-  او من ناحية  تقبّل الصليب وحملو بفرح…
  الصلا هيي اللي بتعزينا، وهيي اللي بتقوينا، ومع الوقت بتفتحلنا قلوبنا وعيوننا حتى نشوف حكمة الله، ونوثق برحمتو
• الحكما عم يشتغلو شغلن لهلق، الباقي علينا نحنا،
  نخلي يسوع يشتغل من ضعفنا…
  ونهار مبارك

رصد Agoraleaks.com