الأب مجدي علاوي صلوّلي وصومو.. اللي بيوقف بوجّن، رح يتهمو 700 الف تهمة..!! (Audio)

– كبرياء الأطباء ما بخليهم يعترفو انو مار شربل اقوى طبيب.. بخافو عَ مصالحن !!
– قايمين القيامة كيف عملت مصلّى للمدمنين، وكيف بدي حوّل “كاباريه” كنيسة بالبترون!!
– عن بنت معنفّة.. عم طفلت عمراساعات حدّ “سوكلين”…

عظة الاب مجدي علاوي قداس جماعة سيدة البشوشي في كنيسة? سيدة الزروع (معاملتين) ١٨-٧-٢٠١٧

• المجد لله
  باسم الآب والإبن والروح القدس الى واحد آمين
• حينئذٍ يسطع الأبرار كالشمس في ملكوت أبيهم،
  يسوع دعانا لنكون هيك، بدو يانا نكون قديسين. بدّو يانا نكون نور هيدا العالم.
  مين قولكم ربح؟
  اللي ربحو هني القديسين.. يللي عاشو بيناتنا وهني متلنا.
  شربل ابن بقاعكفرا، آخر ضيعة بالجرود..
  بتقولو هلق الوضع صعب. وضيقة. وظروف.
  قولكم عَ أيام مار شربل، ساعة اخواتنا الأتراك، خاربين كانو هالبلد، واخدولو بيّو بهالليالي، حتى يعتّلو عليه.
  وبيو توفى عَ طريق  جبيل. واندفن بمنطقة اسما حبالين.
  يومتا مار شربل ما حقد.
  صلالن.
• بدّي إسأل سؤال لالكم: قديه نحنا قسم منا، نبسط بالحرب بسورية
  قديه منا في ناس حاقدي بعدا. واشخاص قالو بيستاهلو…
  لك أيّا قداس بتقدسو؟
  أيا مسبحة بتصلو، وأي انجيل بتقرو؟
  سمعتم “احبب قريبك، وابغض عدوك، أما أنّا فأقول لكم أحبو أعداءكم”.
• مار شربل عاش الإنجيل.. مش بس حفظ الإنجيل
  مار شربل ما تعلّم بالمدارس، ولا بالكاتدرائيات والجامعات الكبيري..
  تعلّم تحت السنديانة، بمدرسة العدرا

وين الأطبا

• جيبولي طبيب بالعالم (أكبر طبيب بالعالم) اخترع وعملْ..
  يعملْ قد مار شربل..
  ولا طبيب بالكون بيعمل اللي عم يعملو مار شربل
  كل طبيب بيشتغل باختصاصو، ونسبة النجاح ما بتكون 100%، أمّا عند مار شربل 100%
  جمعو كل أطبا العالم. ما شي قدام اللي عم يعملو مار شربل..
  بالقليلي مار شربل، مجاناً
  نحنا مندفعن مسبقاً “Deposit”، وإذا ما معن بموتو عباب المستشفى
  بالقليلي مار شربل ما سأل لا عن:
  – دين
  – لون
• إجا قديس عظيم زار لبنان، وقلنا نبوءة “انو لبنان أكتر من بلد وأكثر من رسالة”.. لأنو لبنان عيش مشترك.. بس كذبة كبيري
  
  ما في منّا خبرية.. سياسة بس..
  أيا تعايش؟
  ما قايمين القيامة عليّ كيف عملت مصلّى للمدمنين!
  حارقين أنفاسي… بكانون بدنا نفلّ من “قرية الإنسان”، بدنا نسلّم كلشي
  أيا حب أبونا؟
  كنت عم ابني كنيسة بالبترون، أخدت كاباريه، عم حولو لكنيسة 24 ساعة سجود للقربان، مُنعتْ، وما عرفت أيّا قرعة بدّي بوس؟
  لا كنيسة مسموح اعمل؟ ولا هيدا المصلّى مسموح إعمل؟
• بدنا كتير تنتعلم كيف نشوف يسوع بالآخر… شي بحزّن!
  مار شربل كان عندو وقت للصلا.. وقت ليلتقى ب الله. اما انا لاق؟؟
  أيمتى بصير عندي وقت:
  ساعة اللي بكون عندي حاجة.. ساعة اللي بصير في أمراض او عندي ظروف. أو ما عندي أولاد…
  بصير اركض من كنيسة لكنيسة، وما بخلي كنيسة تعتب عليّ
  اما مار شربل، كان عندو الصبح وقت للصلا، والضهر وعشية… حتى هوي وعم يرعى البقرات كان عندو وقت للصلا، لأنو كان صادق بشغلو
• أشخاص بروحو حَ الشغل.
  بـ”تكسو” قبل بوقت، وناس بتعمل “كومبينات” عَ بعض، وبدعوسو عَ بعض في مركز فاضي، تياخدو..
  مار شربل ما عمل كل هودي،
  مار شربل حبّ السما من هوي وزغير
  حط ايدو عَ المحراث، ما اطلّع لورا.. كان هدفو السما..
• علمو ولادكم مش بس مهندس وحكيم.. بدّي ياك قديس… ما منسمعا ببيوتنا
  إذا إجا ولد بدو يعمل راهب، بينقزو أهلو.. إذا بدو يعمل حكيم، رح يكون حكيم قديس.. ومهندس قديس.
  الولد بيعمل شو بدا إمّو.
• مار شربل ساعة مات بيّو، ما حقد..
  الأشخاص اللي بتحقد وبتصلي ما بتزبط.
  الأشخاص اللي بتتناول وعندا حقد ما بتزبط.. ولا ممكن.
• مار شربل حياتو تواضع. كان يقعد ساعات قدام القربان،
  إجتْ إمو تتزورو، مين قلكم “ما اشتقلا”؟ ومين قلكم ما كان حابب يشمّ ريحتا؟
  مين قلكم ما كان حابب يبسلا ايدا؟؟
  أنا اكيد كان يشتقلا. وهوي ورا الباب كان عم يبكي. بس فضّل السما عَ إمو، وقلها: صليلي، ورح صليلك، تنتلاقا بالسما.
  اجمل شي بالدنيْ الأم.
  صلاة الأم اسرع من الأبونا، بتعرفو ليش؟ لأنو دموع الأم عند يسوع كتير غاليين. القديس اغسطينوس بدموع امّو خلتو يصير اسرع واكبر واهم قديس.
• إجت تتفل امو لمار شربل، قالتلو: يا بدي ياك تكون راهب قديس، يا ضبْ غراضك وفلْ معي عَالبيتْ.
  
  نحنا ويننا اليوم من مار شربل.. !!!
• بعمر 9 سنين، شو منعمل نحنا. منبلش الأم من عمر الولد 7 سنين، تحضر الـ”Souveniret” لأول القربانة!
  مار شربل، عمل زفّة..!!
  وجايين مزلطين عَ الكنيسة!
  وقرفْ…!!! شو عم نعطي لولادنا
  انتو الأهل مدرسة لولادكم.. مار شربل والعدرا بتحب الإحتشام كتير
• شوفو العمادات وأول قربانات، شي بخوّف.. مش مقبولي.
  كنت عم عمّد بمطرح.. قلتلن لوين رايحين عَ “Edde Sands”،
  قالولي: ليه عم تقول هيك؟
  قلتلن: لأنكم مزلطين؟
  بعتذر منكم مش رح عمّد.. يا بتروحو تلبسو غير هيك، يا بتجيبو غيري…!
  وما عمدّت…
  بس تكبر شوي بنتي، بلش لبسا اشيا.. لبسيها ياهن برا مش بالكنيسة!

لماذا لا يشهد الأطباء!

• الي بدي قولو، انو ظروف عَ أيام مار شربل اصعب من الظروف تبعنا.
  ما كان في سيارات. ولا كان في تاكسيات. ولا كان في تلفونات. غاز ما كان في. عَ الحطب. براد ما في. وحرب وجوع وظلم من الأتراك كان فيه..
  الفرق انو عطا وقت لَ الله
  وحط ايدو عَ المحراث.. وحط هدف انو يكون قديس..
  نحنا بالنهار القصير منقلو: يا رب كل الوقت بدنا نكون معك… منقشطْ..
• طلع عَ المحبسة، التكاية تبعو كانت حجر. نحنا اليوم 3 اشهر ومنغيرها
  كان المَسِحْ يتغطا فيه.. كان يشتغل بالعنب وبالكرم ويجلّل الجلال وما ياكول ولا حبة…
  ومار شربل بالأسبوع 4 – 5 مرات يعترف. نحنا ابونا ليش بدنا نعترف.
  منعترف بيني وبين الله. !!!
• دخلكم بدفن مار شربل، ب 25 كانون الأول. مين كان بدفنو.
  كان الرهبان وبعضن. (كم راهب)
  لأنو كانو ملتهيين بدفن حدا تاني. مسؤول. ملتهيين بمسؤول.
  هيدا المسؤول حدا بيعرف مين اسمو…
• نحنا مار شربل بكل قارات العالم.
  بس يقصدو حدن: مسلم بوذي ويهودي، درزي. لبناني، سوري عراقي امركاني، كندي.. ما بقول شو لونك وشو عرقك وشو جنسيتك؟
• الحكما عنا بلبنان، قد ما كبريائن ما بخلين يقولو..
  بس يشفي مريض مار شربل، بقولو “ما عنا تفسير”!!!
  شو ما عندك تفسير. انتا ما قدرت تشفي..
  جربّت مرة وتنين، وعملية ودوا، و100 شغلة، وما قدرت تشفي..
  ولو.. كان معو سرطان، بالتحاليل بطّل في سرطان.. شو بتقلي…
  قول مار شربل شفاه.. مش ما في تفسير!!
  ما بدن يقولو مار شربل شفاه، بخافو عَ مصالحن
• لبنان بقي، هيدا البلد الصغير، مين تاركو ومين حاميه؟
  مار شربل والقديسين..
  
  مار شربل فات ع مدرسة مريم يا جماعة. من هوي وصغير، في صورة العدرا ويروح يبخرلا ويضويلا شمع بالمغارة، صبح وضهر وعشية…
• من كان ابناً للعذراء فلن يدركه الهلاك أبداً
  قداسة البابا القديس يوحنا بولس الثاني، قلها: “كلي لك يا مريم”
  
  ما في قديس وصل عَ السما، الا ما كان عندو علاقة قوية مع امنا مريم.
  ولا قديس.. من بادري بيو ليوحنا بولس التاني، للقديسة تريزيا.. كلن عندن علاقات مميزة مع مريم

لماذا البروتوكولات!

• رئيس روسيا بوتين بفوت ع الكنيسة. ما بيقعد عَ الكرسي قدام، وما بيفرشولو سجادة
  وما بحط مكنات للتفتيش..
  بوتين بس يوصل، بيوقف مطرح ما بيوصل.. ما في كرسي لالو
  منتمنى نوعا، وهالبروتوكول نعملن برات الكنايس
  البروتوكول، اليوم عم يسأل: لشو هودي الجمعيات فاتحن أبونا مجدي؟
  لشو المطاعم!
  لشو فرن المناقيش؟ لشو المصبغة؟
  لشو هودي كلن سوا!!
  ومن وين عم تجيب المصاري!
  كونو محلي شو بتعملو؟
  – اليوم في بنت عمرا 19 سنة، هربت من مطرح ما كانت، ايش مش معمول فيا. تركت كلشي ولاقيتا..
  – مبارح دقلي حدن، الساعة 1:00 نص ليل، حتى لاقيه بمستشفى “كليمنصو،
  – من يومين 3 أطفال بإحدى المغافر، بنت عمرا سنتين. بنت عمرا 7 سنين. وبنت عمرا 10 سنين.
  البنت اللي عمرا 10 سنين بالمستشفى بالطوارئ، من التعنيف

مستعد وقّف كلشي..

• بدي اسأل وين الغلط اللي عم اعملو!
  دخلكن انجيل متى فصل 25 عمين عم يقول:
  كنت سجيناً. كنت مريضاً. كنت عطشاناً. كنت عرياناً..
  كنت عم اخدم بالفرن تبعنا، الساعة 6 الصبح. منحضر من الساعة 4 الصبح.
  بطلع لبرا اكتر من 25 شخص واقفين قدام الباب. بيناتن ام لبنانية. بتطلب منقوشتين. وحدي لالها، ووحدي لبنتا.
  بلحقا وبصوّر.. معا “poussette” بتكرجها وبتروح بعد 3 نص ليل، بتلمّ تنك “البيبسي”
  ما عندا كهربا بالبيت، ما عندا ماي. قاطعين عنا كلشي. بس بدها تجيب دوا لبنتا…
  ما عندا عشا. بتنطر قدام الفرن، تتاخود منقوشتين، تتعشا وتتروق فيون. تترجع تروح عَ الغدا ببرج حمود.
  يعني إذا سكرّت هودي المؤسسات، رح تكونو مبسوطين. بترتاحو..
  
• أنا أحسن لولادي. بجي ع رعيتي.
  بزوّج وبعمّد. وبدفن. وسبت وأحد بلتهي بالرعية. وبرجع برسم…
  صلولي..
  كانت آخر جمعة رياضة روحية لالي. تأعرف شو بدي اعمل!!!
  إذا بسلّمن كلشي… بلشت في من 9 سنين!!
• بالليلة اللي كنت عم قرّر سلّم كلشي.. بسجود القربان. كاهن بقول، بآخر صلا لالو، كنت بالسجود عم ابكي..
  قطعت جمعة، كل الجمعة بكيْ..
  لأنو خلص أنا وبرياضتي الروحي، بعتولي الوراق انو اجي امضي عند محامي الخ..
  الأبونا بسجود القربان، قد ما حبْ بدّو ياك تحبّْ…
  كنت راكع وقفت وصرخت، وقلتلو “شو بدّك مني هلق؟”
  لمين بدّي اسمع؟؟؟ لالك، أو لالن!!
  فليت، وقلتلو بدي كفّي… لأنوهيدا مشروعك مش مشروعي…
  بس انتو بتعرفو، ساعة بدكم توقفو بوجّ.. رح ينزلو فيكم 700 الف تهمة..
• نشيد المحبة، بتقول:
  المحبة لا تشهد بالزور
  المحبة ما بتشهّر
  المحبة ما بتلغي حدا..
  تنكفي هيدي الرسالة، بدّي صلا كتير، وبدّي صوم كتير…
  يسوع بقلنا: يا قليلي الإيمان، هيك نوع من الشياطين تنطردا.. بدكم تصومو وتصلو…
  العدرا بظهوراتا بتقول: صلّو.. صلّوا.. صلّوا.. صمو.. صومو.. صومو.. حتى نبيعد هالإشيا عنّا
• انا وحدي ما فيي اعمل هالشي،
  أنا وانتو فينا نعمل.. انا بدّي ايديكم وصلواتكم، وبدي ياكم تطوعو وتخدمو وتنزلو عَ الأرض، شوفو وين في تقصير بشغلنا…
• الجمعة رح نفتتح دير الرحمة الإلهية
  رح يكون لَ كلشي.. ديورتنا سكرّت وفولّت..
  ما عنا مطرح للولاد، ولا للكبار، اليوم أخدنا حالتين عن الطريق، بس نيمتن عَ “الصوفات”، ما عنا بقا مطارح…
  – رح يكون عنا افتتاح مصبغة،
  – افتتاح Pizzaria
  – افتتاح نادي بيجو عليه بيشربو قهوة، بيلعبو طاولة بالحازمية..
  ما فيشي رح يوقفنا.. يسوع بدّو رحمة لا ذبيحة
• بطلب منكم عنجد، تكونو حدنا بهالمشاريع، وبايديكم، وبدنا نصلي على نية وطننا لبنان، وجيشنا
  
  قطعنا من غيمة كانت كبيري…
  لحتى تكون مريم ام كل واحد منا وكل واحد بالجيش..
• منصلي على نية سارة و ايلي ليكونو عيلة مقدسة. ليكونو عم يعملو مشروع الله
  رح نصلي لكل حاملين اسم مار شربل
  ان كان بالمعمودية. او باسمن. ونحنا صار عنا ولدين جداد اسمن شربل، من جمعتين.
  – شربيلا، لقيناها حد “سوكلين” دغري.. عمرا كم ساعة
  – من يومين صار في bebe جديد، سميتو ميشال مجدي علاوي
• اللي بحب، بشوف دايماً كلشي حلو..
  الله يباركم ويقدسكم

رصد Agoraleaks.com