Agoraleaks Agoraleaks
– اله المسيحي اليوم كلشي الاّ المسيح.. (التفاصيل – Audio)
عظة الأب شربل خير الدين في قداس جماعة الرحمة الإلهية في كنيسة مار فوقا غادير:
- إذا فعلاً انتو جماعة الرحمة الإلهية، معناتا عندكم ثقة كتير قوية بأنو الله اكبر من خطاياكم.
وانو كل خطايا البشر ما بتجي نقطة ببحر رحمة الله، - يسوع قللا للقديسة “فوستينا”:
مش الخطأة اللي بزعلوني، اللي عم يزعلني هنّي أقرب شي لالي،
بيعتبرو حالن معي، وبقولو بحبوني، وهني ما عندن ثقة برحمتي - بدك توثق انو الله بحبك متل ما إنت. تعا لعندو متل ما انت.
في قديسة راهبة كانت عم تصليلو، قلا:
بدك تعملي قديسة، تعي لعندي بكل خطاياكي، وتعتيرك، وأنا بعمل منك قديسة، مش انتي - يسوع إجا وأخد عاهاتنا، وأوجاعنا، وسُحق من اجل معاصينا،
معربطين بخطاياكم، لشو؟؟ ما اجا واخدن عنكم..
يسوع مش رح يدينكم، هوي مش جايي تيدين العالم، تيخلص العالم
قبلو الرحمة، ويللي بيرفضا في عدل.
مش معقول الخاطي متلو متل الإنسان الصالح. ما بتزبط التنين يكونو بالسما..
- الإنسان بدو يفتح قلبو لكلمة الله، ليصير مسيح آخر، ومش بس الراهب والكاهن، والمكرّس.
كل انسان مؤمن طُبع بالمعمودية هو مكرّس ليسوع المسيح، وهو قديس.
وكان القديس بولس يقول لأهل القديسين لأهل رومة، او الى قديسي أفسس.. ليش لأنو كل انسان مدعو مع يسوع ليكون قديس - كانو الناس ينطرو خيال مار بطرس تيقومو المرضى،
وين ايماننا اليوم.. ؟؟ يسوع قال بتقدرو تعملو اعمال اعظم من انا اللي بعملا، ليه مش عم نقدر؟
لأنو بعدنا عم نفتش ع ذاتنا. بعدنا منحب الله متل ما بدنا نحنا - في كتير مسيحيين بيجو عَ الكنيسة مش لأنو بحبو يسوع. بيجو كواجبات، احسن ما يحكو عليي الناس.
خليك بالبيت، إذا واجبات. بدك تجي ع الكنيسة، لازم يكون الحب الدافع لالك. - الله حبك ونزل من السما، وعَ الأرض وتحمّل الطبيعة الإنسانية، تيقلك انو انا بحبك.
عيد الجسد هوي قلب يسوع النابض بالقربان المقدس.
ن شالله بفكركن الله خلّص.. لا يا عيوني، حب الله ما بينتهي، لأنو الله محبة، والمحبة ما بتنتهي… - مين عم يزور يسوع بهالإيام؟
اليوم المسيحيين بطلّوا مسيحيين. لأنو بطلّو يحبو بعضن بعض متل ما طلب منا يسوع.
اعمال الرسل كانو يشوفوهن، كانو يعرفوهم انو مسيحيين من محبتن لبعضن بعض…
يسوع كان عم يقول: اليوم المسيحيي مفكرين بوضع الصليب الحاطينو والمسبحة المعلقينا، هيدي هيي المسيحية،
بدك تفرجيهم بأعمالك قبل أقوالك. بدك تعكس صورة يسوع المسيح.. وهيدي هييّ البشارة الحقيقية - العالم بعدن مفضلين الظلمة ع النور، لأنو نورنا خفيف
المسيحي هوي نور العالم، وأيقونة صورة المسيح في قلب العالم، ورائحة المسيح الطيبة…
هل نحنا واعيين لإيماننا، ولأفعال ايماننا؟؟؟
هل نحنا متجذرين بإعلان ايماننا بشخص يسوع المسيح! - اليوم كلشي عم يتجلّى بالعالم المسيحي الاّ المسيح.
– مين اله للولاد: Ipad.
– مين اله الشباب والصبايا: واتس آب وفايسبوك.. كل يوم الف رسالة
شي مرة فتحو الإنجيل تيشوفو يسوع شو باعتلن رسالة!
وين الأمهات والبيّات.. بدكم تتحاسبو علين، ايه في وزنات!
في ولاد مش عم نعرف نربيهن متل الخلق… فالتين يتعلمو كلشي الاّ الصلا
نعم احبائي، وقت ولادنا كلون ضايع بإشيا بلا طعمة…
مين الهنا نحنا بعالم اليوم؟
مش يسوع المسيح؟ ولأنو مش يسوع المسيح، نورنا خفّ
- انا جيت من بشوات، لهون ع كنسية مار فوقا (غدير) شو جايي اعمل؟
اكيد جايي لأشهد ليسوع المسيح. الي الشرف اشهد ليسوع المسيح.
أنا زلمي ما كنت مسيحي. كان اسمي علي خير الدين.
ما لقيت السلام والفرح الاّ بيسوع المسيح، وبالإنجيل.. بدعيكم ترجعو تقرو الإنجيل - كلمة الله هي صانعة الحياة. هيي اللي بتحرّرك،
آية وحدي غيرتلي حياتي: انا نور العالم، من يتبعني لا يمشي في الظلام - أوقات بقول للرب: ليش نقيتني؟ شو بدّك فيّي؟
يا ريت عِملني مسيحي، عطاني نعمة صير كاهن، واوقف عَ المذبح وقول يسوع المسيح هوي المخلص الوحيد،
وليس باسم آخر يستطيع أي انسان أن يخلص
الله من بعد المسيح، ما بعت حدا. من بعد يسوع المسيح، صار الله الآب أخرس
الله كلشي بدو يحكي، حكاه بيسوع المسيح
- بتمنى عليكن ما تتخلو عن الكنز اللي اسمو يسوع المسيح، لأنو بلاه حياتكم رح تكون تعيسة
لا المال ولا الجاه ولا السيارات ولا البيوت بيقدر يعبيلكم قلبكم
حيث كنزكم هناك قلبكم.. حملو يسوع، ونيرو طيب وحملو خفيف - ليش اليوم شبيبتنا عم يشوف نير يسوع المسيح تقيل؟
لأنو ايمانن صار ضعيف. ورجائن صار ضعيف. ومحبتن صارت ضعيفة.
أكيد بطل قادرين يشوفو نير المسيح خفيف - يسوع منو كذاب، يسوع صادق، وواضح. يسوع بقول:
– أنا نور العالم، وانتم لا ترونني
– أنا الطريق والحق والحياة، ولا تعرفوني
– أنا سيد هذا الكون ومخلصو الوحيد، ولم ترونني
– أنا القيامة والحياة، ولا تعيشوني.
ان كنتم تعساء، فلا تلومونني…. - ليه شبيبتنا تعيسة، وليه المجتمع المسيحي عايش بقلق واضطراب، لأنو المسيح مش موجود فيه يا عيوني
وينو الله
- كتيرين بيسألو وينو الله. عم نشوف قتل وحروب، وناس مشردة…
يا عيني الله موجود، ولكن هيدي سببا الإبتعاد عن الله
الكبريا والأنانية، بيسحقو بعضن بعض - الله موجود وعاطينا الحرية، وبهيدي الحرية الله بدو يحاسبنا..
الله ما بيقدر يخلصك من دون حريتك..
إذا بتحافظ عَ امانتك يبقى أميناً الى الأبد، لأنو ما بيقدر ينكر ذاتو - بتعرفو الإنسان المسيحي، أيمتى بتبطّل تفوت الخطية عَ حياتو:
لما بيدرك مين هوي؟ إذا انتا بتدرك ذاتك، انك ابن لَ الله، الشر ببطّل يملك بحياتك
- في كتير بيجو لعندي عَ المناولات، ما بناولن..
بيجي حاطين راسن بالارض، وماشيين حزينين.
وينو يسوع فرحي.. بطلّع ببعض الوجوه، بيئس… - يسوع فرحي..
أكبرانتقاد وجهو نيتشه (فيلسوف) للمسيحيين، قلن:
شو بكن يا عمّي، الهكم قام.. فرحو شوي..
اليوم العالم عم يتقدم كتير، ولكن لسوء الحظ ما عم نعرف نتقدم بايماننا
ما عم نعرف نروح للعمق.. - انا ابونا شربل، من وقت ما تعرفت عَ يسوع، من سنة 1986، بـ 14 أيلول يوم العمادة
انا من وقتا لليوم ما بعرف المسح الاّ مصلوباً
واني افتخر بنقائصي وشدائدي، وآلامي، وصليبي،
ما بعرف المسيح الاّ مصلوباً، شكاً لليهود، وعثاراً للأمم اللي بيرفضو المسيح يكون مصلوب - من أيام عمدّت شخص مسلم، قلتلا:
اوعك تفكري انو المسيحية فرشة نعام، جايي تنامي عليا،
لاق؟ حياة المسيح فيها جهاد وألم.. بدك تكوني صنديدي، وتجاهدي كل يوم
هيدي الحياة المسيحية، ضدّ الأهواء وروح هذا العالم
يسوع بقلنا: مملكتنا ليست من هذا العالم.. وكل الأحلام اللي فرجاها ياهن يسوع قبل ما تتعمّد، كان عم يفرجيها الصليب، ويللي اليوم كتير من المسيحيين عم يهربو منو. ما بدن الألم يكون بحياتن… غصبن عنك بدّك تتألم، منّك أفضل من المعلّم..
كما تألم المعلم، سيتألم التلميذ، كما أبغضوه سوف يبغضوننا
بس نحنا ما مننسحق، لأنو المسيح معنا - بقول القديس اغسطينوس: المسيحيون بالعالم متل الروح بالجسد.
بس تطلع الروح من الجسد، شو بصير بالجسد؟؟ بموت..
المسيحيي إذا ماتو عن الله، بموت هذا العالم، لأنو هني قلب العالم النابض..
ولكن يسوع قلنا كلمة: أبواب الجحيم لن تقوى عليها.
وأنا بآمن انو بعد في ناس بالعالم، وبلبنان، بعد ما سجدت لأهوائن، ولا لأفكار العالم وفسادو، لأنا عايشي التواضع والمحبة
- الله مطوّل بالو على العالم، كرمال ابنو يسوع، لأنو هوي الذبيحة اللي حاملي دُفعت ثمن خطايانا
يسوع المسيح عم يتشفّع فينا مع امو مريم بمحبته ورحمته الفائقة الحدود،
وما الها حدود بعقلنا البشري - الكرة الأرضية نقطة بالكون، ونحنا مكبشين فيا وببعضنا بعض. ومنقاتل، وحكي عَ بعض.
وبدنا ندعوس ع بعضنا.
وإذا واحد ما بفّكر متلنا، منحرق نَفَسو.. فوضى
أوقات بصير احكي مع حالي (اللي بشوفني بيفتكرني مجنون) بقلو ل الله:
انتا مجنون.. مطوّل بالك عَ العالم..
شو بدي قلكم، عمّ الفساد بالأرض..
قال: هودي المؤسسات الإعلامية المسيحية، هودي شياطين.
هودي ولاد ابليس الملاعين.
قال برامج رمضانية. هودي برامج ابليسية… خربو العالم والناس. وصار كلو عايش بالخيانة، وصار الولد بيتعلم الكذب من التلفزيون.. كيف بدو يكذب.. وكيف بدو يمرقا عَ الناعم…
هودي الإذاعات، بدن ينزل علين غضب الله.. وتذكرو كلامي
بتحداهم انا يعملو برنامج تثقيفي مش ديني حتى. أو برنامج اجتماعي لشبابنا..
عنجد العالم عم يرجع لورا… - أحبائي ن شالله نرجع نشّد الهمم لَ نكون رائحة المسيح الطيبة..
له المجد مع امه مريم وقلبه ورحمته اللامحدودة
يا يسوع اني أثق بك، الآن والى الأبد آمين
رصد Agoraleaks.com
