باسيل يطلق مكنة التيار الإنتخابية: مصلحة التيار فوق مصلحة أي مرشّح، وبدنا جواب من المشنوق.. (Audio)

– التيار جاهز للإنتخابات، والدولة ما بتزبط الاّ ما نشوف الفاسدين بالحبس، مش الفاسد بدّو يتّهم الآدمي

مقتطف من حديث رئيس حزب التيار الوطني الحرّ جبران باسيل:

• التيار الوطني الحرّ هوي وعم يُتهّم بالطائفية، كان الوحيد عم يرفع التحدّي للسير بالدولة المدنية،
  للأسف ما تمّت مواكبتنا
• للأسف المعركة الانتخابية الجايي، نحنا بدنا كهربا،
  واللي ضدنا ما بدّو يجبلنا كهربا.
  ليكو المنافسة بلبنان كيف؟
  ليك الظلم على اللبنانيين!
  بدل ما يكون التنافس مين بدّو يجيب اكتر كهربا للبنانيين، في حدا بدّو يجيب كهربا، وفي حدا بدو يمنعا، حتى ما يربح اللي عم يجيب الكهربا.

الفساد

• هيدا الفساد اللي عم يمنعنا من تحقيق هالأمور.
  كنّا نحكيكن عن عبد المنعم يوسف. كان يقولو: مافيشي بشيلو لعبد المنعم يوسف.
  إذا كان حلم عند البعض. اليوم بقلب وزارة الإتصالات، تحقّق هيدا الحلم. وليكو وينو عبد المنعم يوسف، وليكو نحنا ويننا.
• كل يللي متل عبد المنعم يوسف، بدن يلاقو ذات المصير
  بتعرفو أيمتى منصدّق إنو صار في دولة عم تحارب الفساد؟
  لما منشوف بعض الفاسدين بقلب الحبس.
  متل ما صار بالسوق الحرّة، يللي انبحّ صوت التكتّل وهوي يحكي فيا.
  بدّو يصير بالمرفأ. وبالمطار. وبالكازينو. وبكل مرافئ الدولة.
• هيدا الشي مش حلم. نحنا مش محكوم علينا نعيش مع الفساد،
  ونتآخى معو. ونقبل فيه. ونصير مطواعين لإلو لدرجة إنو يتجرأ البعض يتهمنا بالفساد.
• الفاسد بدّو يتهّم الآدمي، ليكو لوين وصلنا بهيدا البلد.
  بنا مزيد من الشغل.
  مزيد من الإنجاز والعمل.
  متل ما عم تشوفو:
  – سدود.
  – كهربا.
  – طرقات.
  كل المشاريع بدكم تشوفوها بدها تتحقّق، لأنو هيدا الشي بصير مُتاح أكتر بعد افنتخابات.

التيار جاهز

• نحنا هون، تنقول التيار الوطني الحرّ جاهز للإنتخابات.
  نحنا بالتيار مارسنا قانون الانتخابات النسبي.
  نحنا عملنا النسبية. وعملنا الصوت التفضيلي. وعملنا عتبة المرشّح.
• نحنا جاهزين، بس بدنا شغل أكتر تنحضّر الناس للقانون،
  هيدي شغلة كتير سهلة.
  ما حدا يصعّب القانون عَ الناس.
  أهين قانون بالعالم: المواطن بدّو يحط ورقة باللون اللي بدو ياها، مع x للإسم اللي بدو ياه بقضائو

التمديد مشروط

• إذا قبلنا بالتمديد، بهالفترة الطويلة،
  كرمال البطاقة “الممغنطة” لأنو منعتبرو انجاز كتير كبير.
• انتو هون التيار من كل لبنان. من الجنوب والشمال والبقاع وبيروت وجبل لبنان.
  برهنا انو ابن عكار وابن البقاع والجنوب، وابن بيروت بهمنا، متل ابن جبل لبنان وأكتر.
• نحنا معنيين نقونن عدم السماح بنقل النفوس، لأسباب إنتخابية.
  هيك منكون عم نعيش عيشنا الواحد. لنحافظ عَ نسيجنا الطوائفي والمناطقي.
• في بعض المطارع في بعض الظلم. بعرف وبدنا نضل لنعالجو
  اللي جديد بدنا نشتغلو،
  إنو ابن شرق صيدا، وابن صور بدّو يروح يصوّت أكتر.
  وابن بنت جبيل اللي ما عندو نايب بمثلو، عندو نايب بحاصبيا – مرجعيون.
• أيا تلاعب بموضوع البطاقة “الممغنطة” بيسحب موافقتنا،
  هلق بدنا نعرف، بجواب قريب وسريع من الوزارة المعنية وكل المعنيين.
  لأنو التضحية كانت بتحرز

نفس جديد

• التيار متجّه لنفس جديد، وروح تضامنية،
  هيدا القانون بيفترض طريقة تفكير جديدي، عنوانا، مصلحة التيار أعلى من مصلحة أي مرشّح بالتيار
• انا أوّل متل، مصلحتي الانتخابية تكون كل الدايرة بالشمال تنتخبني، مش بس قضاء البترون.
  كل اللي بيشتغلو انتخابات (مش يللي بجعدنو عَ التلفزيونات) بيعرفو هيدي الحقيقة
  بس أنا بعرف انو المصلحة التمثيلية الفعلية، هيّي بقلب القضاء، ومشينا فيا..
  اليوم هيدي المصلحة بدنا نأمنها
• ما حدا يسأل عن التحالفات.
  بعدنا عم نشتغل عَ ذات القاعدة، بالقضاء او الدايرة المعروفي
  كل مكنة تشتغل بحيها، بضيعتا، ببلدتا، بمدينتا.
  تعمل شغلا الإنتخابي، مع تفكير جديد، هوي انو في ناس ما بحياتن كانو يصوتو، اليوم رح يصوتو
  مع تفكير جديد مع أهلنا بالإنتشار، بدنا نعطيهم عناية تنحمسن يجو يصوتو
  التحالفات بتجي بعدان.
• هيدا القانون بيسمحلنا نحنا التيار الوطني الحرّ يكون عنا المرونة، يللي بدنا ياها،
  منا مسكرين عَ حدا. منفتحين عَ الكل. وين مصلحتنا بتقتضي، انو نتحالف مع حدا، منتحالف.
  وين مصلحتنا بتقتضي نكون وحدنا، منكون وحدنا.
  وين مصلحتنا نعمل معركة لَ نثبّت شي معيّن. منعملو
• النسبية بالآخر بتعطي التمثيل الصحيح لكل الناس،
  وهيدي مناسبة للتيار يبرهن فيها، متل ما هيّي حقيقتو، انو هوي موجود بكل الطوائف، وبكل المناطق

عشتم وعاش التيار الوطني الحرّ، وعاش لبنان

رصد Agoraleaks.com