جيسكار لحود لاحقن عَ القبر “للمسعورين”.. وسمعو الخبرية (التفاصيل – Audio)

دقيقة “سمط” مع جيسكار لحود عَ إذاعة “صوت المدى”:

• كلنا منسمعْ، ومنعرفْ انو عادة الكلاب بتكون مسعورة،
  بس اللي دارج بلبنان، هوي المواكب المسعورة،
  ومرافقي السياسيين المسعورين،
  ومش عم عمّم..
• هون كل ما المسؤول ضاربو داء “الكلب”،
  بجيب مرافقين مسعورين، طبعاً خريجين ميليشيات،
  وهالمساعير هودي، بيفلتو عَ الناس، وخدلك إذا كبيتلو عضمة،
  يمكن ما يقوصك.
  بس يمكن ياكول العضمة. ويقوصك…

كلامي ببيّن قاسي، طيب سمعو هالخبرية

• الفنان شادي عيدموني، بقلب مدينتو جبيل، وقدام مئات الناس،
  
  بس كان واقف متلو متل غيرو بعجقة السير بسبب حادث سيارة،
  بيوصل موكب “كلبان” – “مسعور” وبصير يطلب من شادي بهيجان وبطريقة “العرّرّرّرّرّ” انويفتح الطريق
• هلق شادي بدو يفتح الطريق، او طيران، يعني يطير بسيارتو نحو الأعلى..
  او إنو بدّو يبحش بالأرض، ويطمّ حالو هوي وسيارتو
  وبالحالتين في استحالة..
• ما كان الاّ من احد المساعير، انو طلع من الموكب، ووجه السلاح عَ شادي عيدموني، ومرتو وبنتو الصغيري،
  وكان على وشك انّو يقوّص.. هالمسعور
  شادي عيدموني تشكّى بسراي جبيل،
  بدنا نعرف مينو هالموكب،
  ومين هالمسعور اللي عمل هيك؟؟؟
  بكرّر، بدنا نعرف مين الموكب، ومين المسعور اللي سحب سلاحو على عيلة آمنة بجبيل..
  عنّا ما بتمرق، يا حبيبات البابا والماما،
  والأجهزة الأمنية شاطرة، وإذا تركتوها تشتغل، بتقدر تعمل كلشي،
  ومسار الموكب معروف.
  بدنا نعرف مين اعتدى علينا بمدينتنا، ورح نعرف.
• خييّ
  ببلد رئيس حكومة سابق، طلع إرهابي من الحبس وبسيارتو، ورجعو فلتو علينا من دون حساب. أو من دون كلمة يا امّي ارحميني!!

شو بدك تقول..؟؟

• الاّ ما يتلقطو الناس، وبالمئات، بشي موكب سياسي مسعور،
  ويربوّه بكعوب “الصرماية”، ما رح يتربّو!!
• الشعب اللبناني بدّو يوعااا،
  بدّو ياخود حقو بقااا
• هالموضوع اللي حكيتو اليوم، ما رح ينتهي هون،
  ون شالله نعلن لمين هالموكب؟
  أو منعلن مين عم يتستّر تما نعرف لمين الموكب؟
  ولاحقن عَ القبر..
  والراحة بالصراحة

المصدر: صوت المدى
رصد Agoraleaks.com