سعد الياس بعد طرده من “صوت لبنان” لأمين الجميل: وين الوفا، يا عيب الشوم.. وشو ذنب اختي تنطرد (التفاصيل – Video+Audio)

– سامي الجميل حاج تطلع تعمل مؤتمرات صحفية.. (تقرير جورج عبود)

عبر إزالته من غروب الـ”WhatsApp” الخاص بإذاعة صوت لبنان (الأشرفية)، تبلّغ الصحفي سعد الياس خبر الإستغناء عن خدماته بعد 27 عاماً، فكتب عبر “الفايسبوك” معلناً أن الطرد جاء لأسباب سياسية بحتة، يقول:

• انزعجو القيمين على إذاعة صوت لبنان، مش من رسايلي اللي بقيت موضوعية على مدى كل هالفترة،
  انزعجو من يللي اكتبو تلميحات على “الفايسبوك”،
  أنو أنا مؤيد لتلاقي القائدين الكبيرين: الجنرال ميشال عون والدكتور سمير جعجع، بتفاهم معراب،
  انو هيدا شي بينهي ذيول اللي صار بالمسيحيين، وبقوّي الموقف المسيحي
• هيدا الشي أزعج البعض، انو هني موقفن مش ع انتخاب الرئيس ميشال عون،
  
  بس أنا عم عبّر عن قناعاتي، وأنا قلت انو ايه هيدي المرحلة بدّا رئيس قوي، بدّا رئيس ميشال عون يكون على رأس الجمهورية بقصر بعبدا

سعد الياس الذي استغنى عن تعويضه في الإذاعة، من اجل استمرار “صوت لبنان” صوت الحرية والكرامة، دفع ثمن حرية رأيه دون أن تُحترم كرامته، يقول:

• بسأل عن الوفا،
  وين الوفا، وين الأصالة..
• شو بدّك بيللي بيحكو بالمؤتمرات الصحفية،
  بقومو يعملولك شعارات طنانة ورنانة،
  تطلعو ببيتكم وساووه، قبل ما تحكو وتراشقو الناس بالحجار
• بقلو للرئيس أمين الجميل، وبدّي ذكرو باجتماع بكفيا وبحضوري أنا،
  بحضور مدير الأخبار، ومدير البرامج، قلي: خسرت ابني بيار، بدّن يخسروني الإذاعة،
  نزلت عملت معركة لحتى يبقو كل الموظفين بالإذاعة،
  
  اليوم عملو حرب ومعركة عليّي، كرمال جملة عَ الفايسبوك؟
  شو هالحرية والكرامة، وشو هالحزب الديمقراطي هيدا؟ يا عيب الشوم بس..

الفاتورة كانت باهظة، والأذية مضاعفة، فشمل الطرد من الإذاعة شقيقته أيضاً “ناديا الياس”، يقول:

• اللي بيئسفني إنو، ليه بدّو يدفعو ثمن لإختي،
  شو الها علاقة؟
  كل عمرا بشكاوى الناس، تتلقى الاتصالات…
  مين بدّو يدافع عنا؟ سامي الجميل!
  حاج يعملي مؤتمرات صحفية، ويطلع يحكي، إذاعة صوت لبنان – صوت الحرية والكرامة؟
  نحنا طلعنا بكرامتنا، ما عنّا شي مخبّى،
  
  نحنا مش بوجّين متل البعض، نحنا اللي مقتنع فيه، منقولو..
• نشالله تضل صوت لبنان صوت الحرية،
  بدّي قلن، محتفلين كتير بالنصر، انو ربحو الإسم؟
  يا ملك النصر، لو بتعرف شو كلّف النصر؟

قبل يوم واحد من برنامجه عبر هواء صوت لبنان، أتى الفصل، حتى دون أن يتسنّى لسعد الياس أن يودّع مستمعيه، يضيف:

• بشوف وجّكم بخير، انا ما رح اتصيّع..
  هني مفكرين إذا سكتوني بصوت لبنان، انو صوتي ما بقا رح يطلع ولا على وسيلة إعلامية
• الـ”OTV” هالمحطة الرائدة شاهدة انّو بدّو يضل صوتي طالع،
  وإذا زعجن صوتي بصوت لبنان، بدّو يزعجن اكتر برّات الإذاعة،
  وأنا من الأشخاص، وما يعتقدو، انو سعد هيك، مين مكان، منشيلو وخلص..
  لاق مافي حذف، وما في نفي، وأنا باقي بمجلس النواب، ورح يضلن يشوفوني بمجلس النواب

https://www.youtube.com/watch?v=UP1TViyJAi8

المصدر OTV
رصد Agoraleaks.com