بولا أسطيح: لقانون يضعه أخصائيين.. ولولا الأحزاب المسيحية ما طلع صوتا بالعالي كان حصل التمديد (Audio)

– بري صاحب فكرة التأهيلي.. والأخبار كأنو خرقت قانون النقابة فقط لمهاجمة باسيل

مقتطف من حديث الإعلامية بولا اسطيح لقناة الـ”OTV” ضمن برنامج “أجندة اليوم”:

رداً على سؤال صدور جريدة الأخبار وعدم التزامها بالقانون

• مش خارقة القانون، خارقة قرار صادر من النقابة،
  بيعتبرو أنو 4 أيام كتير،
  يمكن كتير صحيح، خاصة هالأربع أيام ماتت السياسة كلياً
  يمكن الصحافة المكتوبة بعدا بتعمل قصص..
• صدور صحيفة الأخبار رسالة بالطريقة اللي صادرة فيا،
  الرئيس بري هوي صاحب فكرة القانون التأهيلي، ولكن الوزير باسيل ادخل عليه تعديلات، لذلك لا يجب أن يُسمّى بقانون جبران باسيل
• الحملة مستمرّة على هذه القوانين، ولكن اليوم بشكل كتير كبير،
  وكأنو صدرت الجريدة فقط لمهاجمة الوزير باسيل
• المستغرب انو بالأمس، أعلنت قناة الـ”OTV” انو حزب الله وافق على القانون التأهيلي، اليوم انو تصدر جريدة الأخبار وتنسف هذه الإيجابيات..

حلقة مفرغة

• تواصلت مع شخصيات من حزب الله، واكدوا موافقتهم على القانون التأهيلي، وقالو انو الطابة بملعب غيرنا، واعتبرو انو الرئيس الحريري لا يسير بالمشروع، وانو بدو تعديلات كتيري، وانو القوات لا تسير بالمشروع (وهذا الرأي نقلاً عن لسان حزب الله)، وكذلك جنبلاط يرفض القانون، وأن الرئيس بري سيقف عند خاطر جنبلاط،
  وبالتالي القصص ماشية عنا، بس مش ماشية عند غيرنا..
• اليوم حتى تطلع الجريدة بالشكل اللي صدرت فيه، يمكن الحزب يوجّه رسالة ما، هل ما هو معلن غير ما هو حقيقة.
• الجريدة ناطقة باسم الحزب شئنا أم أبينا،
  ومش أوّل مرّة الزميل إبراهيم الأمين بكون هالقد قاسي بالتعبير عن مواقفو، وهيدي تالت أو رابع مرّة، بيكتب عن التقسيم
• انا شخصياً مني محبذة للقوانين الطائفية،
  الإنسان الذي يسعى الى دولة مدنية، ما في يقبل بهكذا قوانين،
  انا من الداعين، أو المؤيدين لطرح الرئيس عون: لنجري استفتاء شعبي ليقرّر
  العودة للشعب امر حيوي، قلنا من سنة 2009 ما حدا عم يسمع للشعب، يمددون ويمددون…
• حزب الله يقول أنو مع النسبية كاملة، ولكنه اليوم يعلن تأييده للتأهيلي،
  ميشان هيك مستغرب اللي عم يصير، وكأنو في توزيع أدوار، والحزب بقول انو انتو كمسيحيين توافقتم على النسبية كاملة
• الطبقة السياسية الها سنوات تبحث بقانون انتخاب، وفشلت بمهمتا فشل ذريع، نرجع للشعب، هو من يقرر ما يريد،
  ولأنو الطبقة فاشلة يمكن ان نستعين بتقنيين من الخارج او من لبنان شرط يكونو غير منخرطين.. ويتمّ وضع قانون انتخابي جيد لتحقيق صحّة التمثيل لكل المكونات المسيحية والمسلمة
• مهزلة انو رايحين لتمديد ثالث ولو تقني، والكل ماشي فيه،
  لولا الأحزاب المسيحية مؤخراً ما طلع صوتا كتير بالعالي، لو اخد الموضوع طابع طائفي وخفنا من حرب اهلية، الجو كان كتير مخيف، لولا قرار رئيس الجمهورية، كنا رايحين على محل لا نُحسد عليه. ولكن ما فينا بقا نجاري من يريد التمديد
• بعتقد انو بيتركو الأمور لآخر ربع ساعة ليتفقو،
  نشالله يحصل اتفاق، والاّ الوضع مش مريح
• صورة التحالفات بلشت تتغيّر عشية انتخابات الرئاسية، مع ترشيح العماد عون من قبل سعد الحريري ودعم جعجع لهذا الترشيح قبله
• التحالفات نسفت بشكل كامل، ولكن ما نخشاه انو تاخود طابع طائفي.

ورداً على سؤال عمن يسبب بعرقلة إقرار قانون انتخابي

• احمّل كل الطبقة السياسية المسؤولية، باعتبار كل فريق يشدّ لميلتو
• انا ولا مرّة نازلي على الشارع الاّ لرفض التمديد،
  لأنو اليوم في اغتصاب للسلطة، كلشي ببلش من الانتخابات النيابية، كونا هيي بتنتج السلطة في النظام البرلماني اللي نعيش فيه
• سحب حق المواطنين بالإنتخاب، يعني ما بقا في خطوط حمر،
  يعني مدعو الشعب اللبناني، إذا ضلّت الأمور على ما هي عليه، انو كل العالم تنزل على الشارع،
  وخاصة انو العالم المنتمية لأحزاب تانية مؤيدة للتمديد متضايقة ورافضا
• زمطنا حالنا 6 سنين عما يحصل في الجوار، نقوم نقشط هلق بالبركان السوري، وينوضع لبنان على ورقة التقسيم الحاصلة في المنطقة!
• نحنا اعتبرنا انو لبنان مع العماد عون تركو الدول الإقليمية والدولية، ولازم هوّي يهتّم بشؤونو
• القيامة تحصل بقانون انتخاب، وبالإنتخابات، لأنو هيي المسار الصحيح لقيام هذه الدولة،
  وقانون يؤمن صحة كل المكونات للحفاظ على لبنان الفريد من نوعه.. واليوم ما في فريق من الفرقاء بدّو يقصي حدا تاني، لأنو ساعتها رح يتغير وجه لبنان، وهذا ما يجب ان يفهمو الكلّ، ونشالله الى دولة مدنية

رصد Agoraleaks.com