باسيل بالمؤتمر الوطني 2: خيطو بغير مسلّة ما حدا بيبتزنا و”DNA” التيار “لبناني” (Audio)

– مافي صعوبة لما بكون ايماننا قوي، وتحية اكبار لمؤسس التيار الرئيس عون..

مقتطف من حديث رئيس التيار الوطني الحر جبران باسيل في المؤتمر الوطني الثاني للتيار: (الجزء 3)

التفاهمات السياسية

• التفاهمات أمر إعتمدناه وحَ نشوفو عم يتطوّر،
  بالورقة السياسية سميّنا الجهات اللي نحنا متوجهين لالها
• رح تشوفو التيار بتقدّم إدراكاً منّو للحاجة اليوم بارساء الاستقرار السياسي والتفاهم بدل التوتر
• بديّ طمّن انو بالمواضيع هيدي، مافي شخصنة بالتعاطي مع حدا، ومافي شخصنة بأداء التيار،
  ممنوع على اي حدا عم يتعاطى بهالأمور بهالخلفية هيدي، وأوّل شي على رئيس التيار،
  مافي قانون انتخاب لمصحة رئيس التيار الوطني الحرّ،
  ومافي تحالف إنتخابي لمصلحة رئيس التيار الوطني الحرّ،
  ومافي إنماء لمصلحة التيار.. يللي عم يخيّط بهالمسلّة يخيّط بغيرا.. ما حدا بيبتزنا لا بانماء ولا بانتخابات،
  مافي عنّا الا طموح واحد، طموح شخصي واحد، إنّو التيار الوطني الحرّ يكون الأقوى بمؤسساتو وبفكرو وبمبدأوا
• نحنا بالعهد اللي نحنا فيه يكون لمصلحة كلّ اللبنانيين، وينهض معو لبنان وتنبنى الدولة بلبنان،
  هيدا طموحنا الشخصي وهيدا طموح التيار الوطني الحرّ اليوم ومافيشي بيعلى عليه

الأمور الكيانية

• بدنا نضل حافظين سبب وجودنا، ونحنا هون لأنو مرتبطين بتلات إشيا:
  الأرض – الهوية – الثقافة
• الثقافة بمعنى الحضارة، والهوية بمعنى الإنتماء والجنسية والـ”DNA” اللي حكينا عنو للتيار،
  هوي DNA لبناني.. وهوي DNA لكل لبناني منلاقي هون بلبنان ببيروت أو منلاقيه بساوباولو
  الأرض هيي الـ10452 كلم2، وما منرضى لَ ينقصو كلم2 ولا يزيدو كلم2 عَ حساب حدا
• نحنا بموقع المسؤولية لَ نخدمكم، ولنخدم هالقضية وهالتيار،
  حتى نربط فكرنا الوطني بفكرنا التياري، ونوقف لنشيد وطننا،
  ومافي نشيد اعلى من النشيد اللبناني، لا نشيدنا ولا غنية لحزبنا بتعلى عليه،
  منحطّ ايدنا عً قلبنا، لأنو قلبنا على الوطن
• مافي صعوبة لما بكون ايماننا قوي،
  بهيدا الإيمان اليوم عم نبني التيار ونبني الوطن، وكلشي بعكس هيدا البناء بدنا نواجهو

• سهولة التخوين بين بعضنا بعض، بدنا نشيلا،
  الإستخفاف بعمل بعضنا البعض بدنا نحذفو،
  الإتهام الفوري غير المسؤول لبعضنا بعض بأي عمل بدنا نشيلو من قاموسنا
• كل واحد الله عاطيه وزناتو، بيقدر يعطي ع اساسن،
  كل واحد بدنا نشكرو على قدر ما بيعطي، وبدنا نستأذن منو إذا قدرة العطاء تبعو إذا كانت أقلّ من قدرة عطاء تبعنا كلنا سوا.. بدنا نضل متقدمين لقدام
• كل واحد بيقدر يكون بالمسيرة، شو ما كانت نسبة عطائو، ونسبة عطائو بتحدّد بأيّ موقع بهالمسيرة بدو يكون
• ن شالله بموضوعية كاملة منكفي، تنظيم قوي مش حديدي أبداً،
  هيدا الإيمان وهيدا الإلتزام وهيدي الجديّة والمسؤولية هيي يلّلي بدها تخلينا نكون نحنا قدوة هيدا المجتمع
• تيارنا هوي التيار النموذجي،
  التيار الوطني الحرّ كلنا منأديلو اكبار لالو لمؤسسو فخامة رئيس الجمهورية العماد ميشال عون،
  عشتم وعاش التيار الوطني الحرّ وعاش لبنان

رصد Agoraleaks.com