الزوادة – الصياد وعالم الفيزيا والرياضيات

بيخبرو عن إستاذ بالجامعة، عالم فيزيا ورياضيّات، أخد سنة إجازة، وراح يجدّد معلوماتو، بضيعة نقيّة بالجرد. وكان يقسّم وقتو بين الدرس والمشي بالطبيعة.

***
بيوم من الإيّام استأجر مركب وقرّر يقضّي نهارو مع الصيّادي، وع النهر تلاقا بصيّاد وسألو: «بتعرف بالرياضيّات؟» جاوب الصيّاد وهوّي إنسان أُمّي قضّى حياتو يتصيّد على طرف البحيرة: «لأ».

***

جاوبو الإستاذ: «ضيّعت ربع حياتك». بعد شوي بيرجع يسألو: «بتعرف بعلم الفلك؟» جاوبو الصيّاد: «لأ». قلّو: «ضيّعت نص حياتك». وبعد شوي سألو: «بتعرف بالفيزيا؟» خجل الصيّاد واستحى من حالو، وجاوب بصدق: «بالفيزيا كمان ما بعرف».

***

بيقلّو العالم: «ضيّعت ¾ حياتك». وهيك قضّى الإستاذ نهارو مع الصيّاد، وكمّلو رحلتُن بالمركب سوى، بس لـمّا صارو بنص البحيرة، تعطّل المركب، بيتطلّع الصيّاد بالعالِم وبيقلّو: «صار دوري أنا إسألك، بتعرف تسبح؟» جاوب العالِم: «لأ». ساعتها بيقلّو الصياد: «بتأسّف قلّك، ضيّعت كل حياتك».

***
الزوّادة بتقلّي وبتقلّك:
«لو مهما تعلّمنا، بيضل في كتير أمور ناقصتنا… خلّينا نفتّش ع الأساس ونتعلّمو، وهيك منكون ربحنا كل حياتنا».

المصدر: صوت المحبة