قصة ريمون ناضر والتفتيش عن الحقيقة… 3 عواميد تقوم عليها عيلة مار شربل (Audio+Video)

 

– جثمان مار شربل لفتني علمياً، كيف وزن 75 كلغ بيطلع منو 1200 كلغ دم وماي ! 

مقتطف من حديث السيد ريمون ناضر (المدير التنفيذي لنورسات الفضائية) على قناة نورسات/تيلي لوميار:

• بلشت قصتي مع مار شربل من شي 27 سنة، بالـ 1985، كنت مخرّج من الجامعة جديد ودارس ببريطانيا، وراسي كتير مركّز على العلم
• حتى علاقتي مع الله كانت مركزّة بس على الفكر والتسلسل المنطقي، كان بدّي افهم الله، وعم جرّب افهمو من خلال العلم
• بذات الوقت كان زمن حرب، وكنت عم شارك بالحرب، وكنت دايماً بحالة بحث عن معنى الحياة، ووجود الله، وعم فتّش عليه بالعلم
• كنا بذات الوقت عم نعيش مآسي بالحياة، شفنا الحرب والدمار والقتلى
• كنت اطلع على عنايا وصلّي وفكّر، واتأمّل لإفهم سرّ الحياة وليه في موت، وشو الهدف؟

• كنت مركّز كتير على كتابين، أو على سكتين:
  – سكة العلم: تخصصت بهندسة الذرة ببريطانيا، وصرت اكتشف اسرار الكون من خلال العلم
  – سكة الإنجيل: اقرا بالإنجيل حتى افهم يسوع والكون، وكان عندي كتير أسئلة على ايماننا المسيحي
• كنت روح اختلي بحالي بمطارح بعيدي، وحدي منها كانت المحبسة بعنايا، وبالليل، كون النهار يكون عنّا شغل
• بالليل روح صلّي، وفكّر واتأمل، واقرا بكتب العلم والهندسة وبذات الوقت بكتاب المقدس
• كانت قصة مار شربل تلفتلي نظري، من الناحية العلمية، في لغز علمي بقصة جثمانو
• مار شربل ترك الدني سنة 1898، بقي يرشح عرق ودم ل 1965.. كنت فكّر بهالوقت انو جسم صغير كان (75 أو 80 كلغ) وقت اللي مات، وكمية الماي والعرق والدم اللي طلعو من جسمو مذهلة، بحسابات بسيطة بيطلعو شي 1200 كلغ
• بقيت من سنة 1985 حتى 1994 اطلع على عنايا يشكل كتير متواصل، واكتر شي بالليل، وصرت حسّ المحبسة والإطار تبعا متل بيتي
• سنة 1994 يعني بعد حوالي 10 سنين، بدو يكون مار شربل، خلص قال هات تَ نجاوب هالزلمي شو بدو؟
• ب 10 ت2 1994، عشت اختبار مهم قام المحبسة، غرقت بنور غريب، كان بالليل شي الساعة 10 مسا، وحسّيت حضور كائن عم اتواصل انا واياه.

• بس خلص هالإختبار اللي اخد 3 – 4 ساعات. انطبع صبيع على زندي بوهج نار، وصارو ينزلو ماي ودم على وقت، ويرجعو بنشفو بظرف كتير سريع (4-5 أيام) بروحو وبصير في بس صبيع معلمين
• بهالإختبار فهمت كتير من الأجوبة اللي بدّي ياها على الأسئلة عم اطرحا،
  شو معنى الحياة؟
  ليه الله خلقنا؟
  ما كتشفت شي جديد، بس وعاني عللي علمنا إياه يسوع من 2000 سنة
• أيام العلم بحطّ قدامو حجاب، ببطّل يقشع مزبوط، زحلي ياه شوي، قلي ما تركز على العلم بس، تطلّع شوي وشوف اللي وراه، بتشوف احسن
• تطلعت وراه شوي، صار وجّ يسوع أوضح بالنسبة الي، صار مفهوم مسيحيتي واضح
• من بعد 9 اشهر، كانت ليلة عيد مار شربل كنا بعنايا عم نصلّي، تكرر معي الإختبار، بأول مرّة كنت لحالي، بتاني مرّة كنت انا واخوة لإلي
• رجع تكرر مرة تالتي، كنا صرنا بالمحبسة، وكان في مجموعة كبيري مع الأبونا الحبيس حنا خوند، والأب مكرم قزح والأبونا ادغار ماضي (مطران حالياً) وناس كبار وصغار

• الحبيس خوند كان بوقتا عم يوعظ، وعم يقول كان على الأرض مار شربل وما عمل عيلة. هلق هوي بالسما عم يعمل عيلة.. “عيلة مار شربل” وبلش تتسمّى المجموعة بـ”عيلة مار شربل”
• عيلة لأنو كان في كبار وختيارية، وصغار وصبايا وشباب وامهات وآباء وولاد صغار، وكنا بالشتي وبالسقعة نجتمع بالمحبسة، ومن عيل مختلفة ومناطق مختلفة
• من وقتا نطلقت عيلة مار شربل.. تأسست على أسس يللي حسيّت مار شربل بدّو ياها
• العدد بلش يكبر، ما عادت تساعنا المحبسة، نزلنا على كنيسة الدير، بعدان ما ساعتنا كنيسة الدير، صرنا ننزل على الكنيسة الكبيري، وصرنا مئات وايام ألوف من الأشخاص، منعمل تعليم الكتاب المقدس ومنعمل قداس، ومسيرة على المحبسة وصلوات المسبحة
• بعدان صارت تتطوّر الجماعة، صرنا نعمل رياضات روحية، وتعليم، ولقاءات تنشئة، وشوي صارت شبه منظمة رهبانية، فيها طرق للانتساب لها، كون في نمط بدو يتبعو من التعليم، ونمط بدنا نعيشو بقلب الحياة
• شعار هالجماعة رهبان بقلب العالم، حسيت مار شربل عم يقلي كونو رهبان بقلب العالم، فعم نعيش نوع من الرهبنة بالعالم، يعني التزامنا المسيحي وبالإنجيل وبتعاليم يسوع
• مار شربل عم يرجع يوجّه الناس يللي عم يحسن شاردين شوي عن صلب مسيرتن المسيحية
• اول مرّة قلي: ليش البشر نازلين نزول درب الرب طلوع، كان كأنو عم يحدّد الإتجاه، وشايفنا مضيعين الإتجاه..

• راهب بقلب العالم، يعني يعيش التزامو المسيحي، مش حلو واحد يحمل اسم مسيحي أو يحطّ “اتيكيت” على راسو ويكون نمط حياتو عم يتناقض مع يللي عم يدعّيه
• عيش من برّا يللي عم تعيشو من جوا، المسيحي مش لازم يعرف الكتاب المقدس، يعيشو وِينْجَبل فيه، تصير كلمة الله هيّي اللي عم تحركو
• تاني عامود كبير، هوي الأسرار.. لازم نعرف شو هيّي ونفهما ونعيشا.. ما تكون بس طقوس وفولكلور
• العامود التالت “القربان” وعلاقتنا بجسد المسيح
• مار شربل عم يدعي المسيحيين لنوعا كتاب المقدس وأسرار الكنيسة، ونعيشا بحياتنا ، ونبني علاقة مع يسوع من خلال القربان المقدس
• هوي بقول بهيدي 3 أمور، بكون الإنسان عم يعيش مسيحيتو، وبالتالي الإنسان ما بموت، لأنو الله خلقنا للحياة مش للموت
• عم يدعينا بكل هالشغلات نعملا باطار روحانيتنا الشرقية، نحنا مسيحيي مشرقيي
• عم يردنا مار شربل لجذورنا، انو انتا مسيحي عايش بهالمنطقة من العالم، عندك هالتراث وهالإرث وهالتاريخ، وهودي مش ميشان تهملن، بدك تعيشن

• نحنا موارنة (مش عم احكي عن طايفة) عم احكي عن روحانية.. عم يدعينا نعيش الروحانية المارونية، واللي هيّي قايمي على النسك وعلى التخلّي، على الصلابة والتجذّر بالأرض وعلى الفهم العميق لروحانية الصليب، تبذل ذاتك في سبيل كل الناس
• عم يدعي كل واحد منّا يروح على الجوهرة.. انتا الإنسان جايي على الدني جايي تعمل شو؟ عندو ربنا مشروع واحد لالك هوي قداستك
• تحت هالمشروع، عمول وعيش وكبار ونما وفراح، بدك تغني غنّي، بدك تتجوز تجوّز، بدك تترهب ترهّب. بدّك تُبدع بالعلم بدّع… كل هول ضمن مشروع واحد اسمو قداستك

• وكل هول لازم يكونو متناغمين مع دعوتك مع القداسة، ما فيك تعمل شي بيتناقض مع الدعوة اللي عم تروح عليا
• بهالمفهوم رهبان بقلب العالم، عم نحاول نبلورو بقلب عيلة مار شربل، وناخود هالقيم الأساسية ونرجع نعيشا، ونرجع ننبش روحانيتنا القديمي، وعم يساعدنا الأبونا الحبيس يوحنا خوند، لأنو هوي المرشد العام لهالجماعة وكان مبلش معنا بتأسيسا
•  عم نرجع نشوف النصوص السريانية القديمة، من سير الآباء اللي عنا، ومن حياة المسيحيين اللي عاشو بقلب هالجبل، تنرجع نستقي منن ونغتني، ونرجع نكفّي اللي عاملينو، ما بقا نقطش نكون نحنا عم نعيش بروحانية معينة عمرا 2000 سنة، شوي نبرم على روحانيات تانية ما كتير بتشبهنا، لأنو اليوم صار كلو منفتح على بعضو، ومنفتح ضيعة وحدي، صارت الروحانيات فايتة ببعضا
• الأحسن كل واحد يستعيد هويتو وروحانيتو

• عيلة مار شربل مدرسة روحية بقلب الكنيسة، ونمط حياة روحاني مسيحي بدو يصب ثمارو بقلب الكنيسة، وبرعايانا، وبقلب ابرشياتنا
• حدّ هيدا في عنا تركيز مهم على العيلة، اسمنا عيلة مار شربل
• العيلة اليوم بالعالم عم تمرق بمحنة، عم نجرب نحط جهد، تنحظ هالعيلة تكون متل أيام زمان وآبائنا بالكنيسة، كنائس بيتية صغيري
• مندعي للصلا بقلب البيت، للتواصل بين الأهل والولاد
• بقلب عيلة مار شربل، في عنا مجموعة نشاطات خاصة بالشبيبة وبالفتيان، وبالاطفال، وبالمزوجين..
• حدّ النشاط العام اللي هوي التعليم والمشاركة كسر الخبز والصلوات، نحنا شعارنا آخدينو من الكتاب المقدس من اعمال الرسل الفصل 2: 42، كانوا يواظبون (مواظبة)

• اللي صرلو بالعيلة 18 سنة، عندو هلق شي 9 اجتماعات بالشهر، وخلص مواظب عليا ما بقفيها من 18 سنة
• على التعليم أيضاً وعلى المشاركة بكل شي، وبالهموم والمشاكل
• كسر الخبز، منجتمع كلنا على الإفخارستيا والصلوات
• هيدي ثمار الإختبار اللي عشتو بعنايا من 18 سنة، وكانت لمسة من مار شربل انو صبيعو على زندي..
• لمسة صغيري من مار شربل عملت شجرة كبيري وعم تكبر، وعم تعطي ثمار كويسة

• صار عنا تقريباً بالجماعة، عطيت الكنيسة شي 18 دعوة كهنوتية ورهبانية، وهلق في عنا دعوات على الطريق ن الله راد، ونحنا منصلّي للناس كلن، وعم نسعى للسلام والفرح والقداسة لجماعتنا والناس حوالينا، ونسعى نخلق جو مار شربل بقلب لبنان
• بنظرة بسيطة للأمور، منشوف نحنا المسيحيين ثروتنا هيّي قديسينا، وإذا نحنا بدنا نزيد هالثروات بدنا نزيد القديسين
• دعوتنا كمسيحيين بقلب الشرق نكون صورة ليسوع، تنوصل الرسالة للناس حوالينا
• للأسف ما كتير الشعوب المحيطة فينا عم تشوف بمسيحيي لبنان الصورة الحقيقية للمسيح الاّ بقديسينا، يعني اخوتنا المسيحيين واليهود والدروز والملحدين، يللي بيطلعو بالمسيحيين تيشوفو وجّ المسيح لازم يشوفو صورة المسيح والاّ منكون عم نعمل شهادة خاطئة

https://www.youtube.com/watch?v=TSBZkUEonrQ&feature=youtu.be