بالفيديو – شهادة زياد للحق: سامحيني غادة عون إذا عَم إجرح تواضعك.. 🙏♰🙏

لو بعض الآباء من منابرهم وكنائسهم، بيَعرفو الوجه الروحي لغادة، كانو نظرو لِ “لَبطة” غادة عَ الباب بنظرة مختلفة.. 💥 المسيح معكي، والعدرا معكي.. 🔥 هالست بإجرا يللي عَم تعرُج، صوتا لعلَع والوحيدي اللي تحدّت كلّ السوريين عنا بلبنان، حدا تدافع عن قضية الـ”mtv” لمّا تسكرّت.. غادة عون ما بتعرِف الإستسلام. لمّا في قضية بدها توصل فيها يعني بدها توصل للآخر.. ♰

شاهد الفيديو بالضغط هنا

(الشهادة) ♰

• أنا شخص ما بِفهَم بالسياسة، وما بعرِف قديه مزبوط ݀܏عܐ نا قضاة مُسيّرين من رؤساء وتيارات وزعما..

• بعرِف إنو في ست هيّي محور حديث الكل (القاضية غادة عون)، وملاقيين إنّو جلدا لبّيس حتى نحط عليها كل الهجومات، ونتغاضى عن الهدف الأساسي ونشوف بس القشور، وننسى الجوهر.. 😉

• في ست الها سنين بترافقنا برحلاتنا بمعظم رحلات الحج.. ♰ وهالسِتْ ما ظهرت الاّ ببساطتها وبتواضعها، وبالنور الطالع من وجها اللي بلّش يجعّد، وشعراتا المنَكشين.. 🛐

• هالسِتْ كانت تطلَع تِقعُد بهدوء وسكوت تام، وسافرت معي برحلات كتير داخل لبنان وخارج لبنان، وكانت دايمًا تقلّي، شغلي وحدي (بيني وبيننا) ما تِحرِمني من نعمة القداس.. وفرحها كانت تقدّس كل يوم.. وتقلّي بلا ما تعيق برنامجك.. وين فيك تأمنلي روح قدّس وأنا بِلحقك.. وبس تزبط تكون فرحتها أد الدني.. 💒

• ولا مرّة عرفِت شو بتشتغل هالسِت؟ متل الكل يللي بيِجو معي.. بس كنت دايمًا قول: هيّي مثال للعلماني اللي عايش نِسكو بحياتو الطبيعية، أكتر بكثير من رهبان بقلب أديرتهم، وقلاياتُن.. 🙏

• هالسِتّْ رافقتني على ميتيورا (باليونانية: Μετέωρα معناها الصخور المعلقة في الهواء -أو السماء- أحد أكبر وأهم تجمعات الأديرة في اليونان وتأتي بالأهمية بعد جبل آثوس). ومتل هالإيام بزمن الفصح، وقفت قدام الجبال أو الأديرة المعلقة فوق الصخور، طلعّت بحسرة وفي دمعة بعينها، وقالتلي: “هالمرة بعرِف إنو ما رح إقدر كون معكن، رح إقعُد بهالزاوية ورح رافقكُن بالصلا، وحسرة كبيري إنو ما رَح إطلَع..”.

*سامحيني غادة إذا عَم إجرح تواضعك، بس غادة عندا إعاقة بإجرا، ولا بعرِف شو هيّي ولا بعرِف كيف.. بس بمَشيِتها فيشي من الإعاقة..؟؟

غادة ما إستسلمت، قدِرت أثّر فيها.. قلتلها غادة نزلي، وإنتي عَم تقولي صلاة ليسوع، مع كل تنهيدة وكل شهيق وزفير.. ♰ “يا يسوع المسيح، إبن الله الحي، إرحمني أنا الخاطئ” ♰

• غادة وصلت عَ الدير لفوق… وعِرفِت قيمة السجود لرفات القديسين، وكان في فرحة بعيونا.. وقالتلي: الحمدلله قدِرت إعمِل الدير الهيّن وهَوديك خلص أنا عشت روحية “ميتيورا”.. تطلعّت فيها وقلتلها: “غادة انتي عملتي الدير الأصعب، وهوديكي رَح تفوتي تِمشاية..”. غمرتني وصارت تبكي، وصرت إبكي معا… 🔥

• غادة راحت معي على “كبدوكيا” (تركيا اليوم) قَعْدِتْ 12 ساعة باللليل على كرسي بلاستيك بقلب الباخرة بالبحر.. كنا 50 شخص.. أكيد فوق الـ40 رايحين الرحلة حتى ياخدو صور ويتسوقوا.. غادة من القلال الكتير كانو عارفين إنو دم الشهداء مجبول بتراب كبدوكيا، وبهالمدن الجوفية، وإنو استمرارية المسيحية لليوم بلشت من كبدوكيا.. ♰݉

• بهالباخرة كان في 3- 4 غرف بس، وغادة استأجرت غرفة.. إجت بالليل وقالتلي: “يا زياد، بيني وبينك، في هالسِت وهالسِت، هالكبار بالعمر هني احقّ مني يكونو هلق نايمين، إنتا بتَعطيهُن الغرفة، واصرّت..”. ⚡

قعَدِت على الكرسي 12 ساعة وما خلتهُن يعرفو إنّو عَطيتهُن أوضتها.. 🙏

• بالهرحلة كان معي قاضي كبير، عرفتو كبير من إحترام غادة الو.. إجا قلّي: قديشك محظوظ، انو غادة عون تكون معك.. (وبعدني ما بعرف مين غادة)

قلتلو ليه مين غادة؟

قلي: غادة من أشرف وأنضف القضاة يللي عارِفُنن لبنان.. هالست بإجرا يللي عَم تعرُج، صوتا لعلَع والوحيدي اللي تحدّت كلّ السوريين عنا بلبنان، حدا تدافع عن قضية الـ”mtv” لمّا تسكرّت.. قلي غادة عون ما بتعرِف الإستسلام. لمّا في قضية بدها توصل فيها يعني بدها توصل للآخر.. 🙏

• من يوما صرت أعرف إنو هالست بقوة إيمانها من جوّا.. وبصلاتها المستمرّة (كنِت إقريها بعيونها كل الوقت.. ما بتعرِف شو يعني خوف، وما بتعرِف شو يعني إستسلام) وأنا مش عَم إحكي سياسة..✔

• ما بعرِف قديه كلام القاضي دقيق، بس بعرِف إنو إسم غادة صار يلمع أكتر وأكتر بالإعلام والمناصب يللي كانت عَم توصَلها..

• بِ آب 2019 لمّأ تعرضّت مع عدد من مكاتب السياحة بلبنان، لعملية إحتيال وإختلاس كتير كبيرة من احد الزملاء، إتصلت فيّي غادة، وكانت مع مجموعة بمديوغورية، قالتلي: “لأني بَعرفك، بعرف إنّو الليلة العدرا ما رح تتركك”.

وبالفعل تاني نهار رغم الخسائر المادية الكبيرة، قدِرت رجّعت 80 شخص اللي كانو بجورجيا على لبنان، بلا ما حتى يعرفو بالمشكلة اللي كانو فيها.. ♰

• غادة ساعدتني قانونيًا، بوقتا حتى إرفع دعوى سريعة، وقدِرت وقّف هالشخص، على الحدود السورية، ويدخل الحبس.. وبقي تقريبًا سنة ونص، وعملتلو إخلاء سبيل كرمال ولادو.. 🙏

وبهالسنة والنص غادة كانت عارفي إنّو عَم إطلع لجلسات بالمحكمة، ولا مرّة حاولت إنّو تدعمني، أو انو تخرج عن القانون.. وبنفس الوقت لأنّو أنا بعرِف كيف بفكّر.. ومين غادة.. ما حاولت إطلب منّا التدخل عند أي من القضاة لتسريع هالملف.. 👍

• غادة فتحت هالملف، مدفوع سياسيًا أو مش مدفوع سياسيًا.. ملف في فساد، ولازم ينحكى فيه..

عال.. خلّي غير قضاة يتشاطرو ويفتحوا غير ملفات.. يمكن لو كانت غادة عون قادرة توصَل على المعلومات من مكتبها، ما كانت نزلت مدفوعة بحماسها وبإجرا يللي فيها إعاقة، وباندفاعا وبإيمانها.. ويمكن قداما صورة يسوع يللي كان عم يصرّخ ويكسّر بالهيكل، وما إستعان بهيداك الوقت لا بهدوئو ولا بالقوانين اللي كانت سارية.. ✋

• حبّيت ضوي على جوانب روحية إختبرناها بهالست، بلا ما نعرف مين تكون.. ولكن بهدوئها وبسكوتها وبايمانها وبنور الفرح يللي كان ينعكس على وجها بعد كل زيارة روحية.. 🙏

• أكيد لو بعض الآباء يللي اليوم ومن قبل من منابرهم وكنائسهم، بيَعرفو هالوجه الروحي لغادة، أكيد كانو نظرو لِ “لَبطِة” غادة على الباب بنظرة مختلفة جدًا.. 🔥

• غادة نشالله تقدري تكملي لآخر الطريق.. ونشالله معكي كل باقي القضاة يفتحو كل الملفات يللي بتطال الكل.. المسيح معكي، والعدرا معكي.. ومتل ما قلتيلي بهيداك التلفون بهيديكي الليلة، العدرا رح ترافقك نشالله بقضيتك.. 🙏