الحياد.. (ميشال غنيم)

لازم نتقبّل آراء بعضنا من دون شيطنة

كتار عم يسألو إذا نحنا مفروض نكون مع الحياد أو لا.

الحياد أولاً ما بيعني إنو نحيّد حالنا عن العدو الإسرائيلي لكل المشككين بل نحنا بالعكس كل يوم منكرر إنو العدو ما رح تتكوّن معو ولا أي علاقة ورح ندافع عن أرضنا وخيراتنا بوجّو بكل ما أُتيح لنا من عتاد وعتيد ومن جيش وشعب مقاوم.

الحياد يعني لا شرق ولا غرب.

الحياد يعني لا محور أميركي ولا محور إيراني.

الحياد يعني لا منتدخّل بمشاكل غيرنا إذا ما بتأثر على لبنان.

الحياد يعني بدنا مصلحة لبنان أولاً عبر تكوين علاقات مع الشرق والغرب وناخد منن ما هو أفضل لمصلحة لبنان وشعبو.

الحياد يعني تخفيف العقوبات بعض الشيء وارتياح لبنان اقتصاديًّا وماليًّا وسياسيًّا.

ولكن إلنا شروطنا كدولة:

بغض النظر إذا كان موضوع الحياد ممكن بالفترة الحالية أو لا، هيدا ما بيعني إنو ما فينا نتناقش فيه.

الحياد إذا بدو يصير، لازم أقلّه يحصل لبنان على مزارع شبعا وتلال كفرشوبا، ولازم نتأكد إنو ما رح يصير توطين لأي نازح أو لاجئ، ولازم نحصل على ضمانة إنو رح نقدر نسحب نفطنا وغازنا دون أي ضغط إضافةً إلى ترسيم الحدود.

هيدي هي حقيقة الحياد.

لازم نتقبّل آراء بعضنا من دون شيطنة بعضنا والبعض والحياد هو ربما أفضل حل اليوم للبنان شرط إنو نحصّل حقوقنا ونفرض نحنا شروطنا.