Agoraleaks Agoraleaks
نبض الحب صاحب العيد… يسوع، ما إجا يعلمنا يكون عنّا ديانة… اجا يقلنا أنو ولادتو وحياتو هيّي أسلوب حياة.
شهادة الإعلامي “وسام بريدي” بجوقة “Viva Maria” منذ أيام في كنيسة “سانت تريز الطفل يسوع” في السهيلة في أسبوع عيد الميلاد:
- بولادة المسيح، بيوقف الكلام بمطرح وقت منحكي عن سرّ سعادتنا بالحياة
- ايام كتيري بحياتنا منحسّ بالسعادة بكتير لحظات، أيام شبْ بكون مغروم وشايف بنت ومش مصدّق.. بمطارح قلبو بيوقف
- الأم وقت بيولد عندا طفل، بتحسّ بمطارح قلبا رح يوقف..
- البيْ لما بيحمل ابنو مولود جديد، بحسّ كمان قلبو عم يوقف
- الإحساس هوي هالنبض، وهالنبض هوي صاحب العيد… انا بالنسبة لالي يسوع، ما إجا للحياة كرمال يعلمنا يكون عنّا ديانة… اجا تَ يقلنا أنو ولادتو وحياتو هيّي أسلوب حياة
- في كتار ناس منون مسيحيين، بس مسيحيين، لأنو عايشين مبادئ يسوع المسيح بحياتن، يمكن بعد ما تعرفو عليه ولكن عايشينو بكلّ لحظة وبكل ثانية، وبكل المبادئ اللي عاشا
- نحنا منحمل مسؤولية كتير كبيري وقتا نقول انو نحنا مسيحيين، لأنو نحنا خلقنا ديانة تيمناً بهالإله، يللي إجا ولد كطفل، وكبر، وكان هوي وصغير يركض بالبيت يوقع، وبيو كان نجار يلعب بالمسامير.. عاش كل مراحل حياتنا، وهيدي المراحل عاشا بحياتو تَ يقلنا، قديش نحنا عظيمين كبشر.. قديش نحنا مهمين بعيون الله
- اجا المسيح تَ يقلنا، انتا أيها الإنسان عظيم جداً، لأني خلقتك على صورتي ومثالي
- يسوع المسيح بولادتو كل مرّة، منجدد الحب يللي بقلبنا، لأنو الحب مش منخبي جوا، وقت بتكونو عم تعطو، وعم تعطو وعم تحبو من قلبكم، ساعتا بكون يسوع موجود فيكم
- وقت منقول نحنا تيمناً فيه (المسيح)، موجودين بهيدي الحياة، كل شغلي بدنا نعملا بحياتنا لازم تكون تشبه يسوع
- الشباب والصبايا هيك بعيشو العيد.. وبكل ليلة إثنين Viva Maria هالجوقة عم تكون صوت الملائكة، وهيدا الصوت بيجي من فوق، هني ملائكة يسوع اللي عم يوصلو الكلمة يللي عم يقولا بصوتن..
- بعرف كتير منيح إنو هالقداس نهار الإثنين قديش بكون حلو، بس بكونو هالشباب والصبايا عم يعطو من قلبن، لأنو هني فيون يسوع، يعني فيهم حب، ويعني فيهم فرح..
- الله يقدسكم ويقويكم دايماً، لأنو عم تساعدونا تَ نتعرف على يسوع أكتر
- رودي عبدالله انتا والشباب عم تعطو مجهود كتير كبير انتا والشباب، انا ما فيي قلكم الاّ نيّال يسوع فيكم.. فشكراً لالكم..
