Agoraleaks Agoraleaks
حملة “القمح للبنان” (Wheat for Lebanon) قمح استرالي للمزارعين..
رسالة المطران أنطوان شربل طربيه للموارنة في استراليا
- لبنان عَم يمرٌ بأخطر وأصعب أزمة بتاريخو الحديث، وهالأزمة السياسية اللي منها جديدي، ومستمرّة من عشرات السنين، انعكست على عمل الدولة، فانتشر الفساد في الدوائر الحكومية، وهيدا اللي أدى لوضع إقتصادي اجتماعي متردي، وأدى الى إنطلاق ثورة شعبية عفوية عَم تطالب بوقف الفساد..
- قدام دموع الأمهات، ووجع الآباء، وحيرة الشباب، وبدء إنهيار المؤسسات التربوية والإستشفائية، والإقتصادية والمالية، صار من غير المُمكن إنو نضلّ ساكتين عن يللي عَم يصير بلبنان..
- دعوتي اليوم، متل ما بتقول القديسة الأسترالية ماري الصليب ماكيلوب (St. Mary MacKillop): ماتقبل أبداً إنك تشوف حاجة انسانية من دون ما تِعمَل شي تجاهها..
- المطلوب منا نحنا اللي عايشين بأستراليا، بمجتمع مزدهر إقتصادياً واجتماعياً إنو ندعم بكل الوسائل صمود العيلة بلبنان، من خلال الأمور التالية:
- ما نخلي حدا.. لا من الداخل ولا من الخارج إنّو يسلب كرامة أهلنا، أو طموح شبابنا أو أحلام أطفالنا بلبنان.
- نتواصل مع أكبر عدد ممكن من أهلنا وأصدقاءنا بلبنان، يللي صارو بضيقة مادية ومعيشية، ونجرّب أد ما فينا نساعدُن.. مع العلم إنو بعض الأفراد من جاليتنا أخدو على عاتقهم (ومشكورين) تأمين المساعدات للمحتاجين بضيعهم..
- انتماءنا لضيع وبلدات لبنانية بخلينا اليوم، نعرِف أكتر من قبل معنى الإنتماء،والقديم الجديد بالموضوع، إنو كتير من الجمعيات الخيرية يللي هيّي على إسم بلدات وضيع لبنانية، وموودة باستراليا قدمّت وبعدا عَم تقدّم مساعدات كتيري، المطلوب اليوم تزيد هالمبادرات، حتى توصل لأكبر عدد من المحتاجين..
- ادعوكم الىدعم اللجنة البطريركية المارونية للإغاثة، ويللي أطلقها البطريرك الراعي،وهي عَم تشتغل على 3 مستويات أولاً: الأمن الغذائي.
ثانياً: الزراعة
ثالثاً: الصحة - ادعوكم لمواصلة دعم المبادرات المحلية بأبرشيتنا المارونية، ويللي نطلقها بالتنسيق مع الرعايا واللجان واللمؤسسات المارونية، اللي دعم عمل كاريتاس لبنان، ومؤسسات خيرية غيرا.. واليوم َعَم نستعد لحملة جديدي، من خلال المجلس الأبرشي الماروني، وبالتنسيق مع جمعية الرسالة الماروينة، وهيي تحت عنوان “القمح للبنان” (Wheat for Lebanon)… وتهدف هيدي الحملة نقدّم مجاناً للمزارعين بمختلف المناطق اللبنانية قمح استرالي، ليزرعوه بشهر تشرين الأول كالعادة..
وللمعلومات أكتر ومعرفة كيفية المساهمة، نتمنى الإتصال بمكاتب الأبرشية
بالختام بدعيكم حتى نجدّد بقلبونا الرجاء بإنو شمس الحق رح تشرق من جديد، وتزيل كل الظلمات من سما لبنان، وتضوي قلوب وعقول كل اللبنانيين حتى يتعاونوا سوا بمنطق جديد، ويبنوا مستقبل مشرق لوطن الأرز ولشعبو الأبي.. وأنا أكيد إنو الله ما بيترك لبنان..
