الأب فادي روحانا: آمن بالفجر لو طوَّل الليل..

كتب الاب فادي روحانا:

• الإيمان مش تمثال عم يرشح زيت.
• الايمان مش مسبحة وبخور ع صورة.
• الايمان مش ضو بغيمة ع شكل قديس.
• الايمان مش وعظة رنانة.. ولا توب اسود منَسور وعتيق .
• الايمان مش صليب مدقوق ع كتف. ولا غيبة عن الوعي قدام صليب. ولا صوت استعراضي. ولا ظهور عجيب صار مزراب دهب للبعض .

الايمان انك توثق بحضور “الله الروح” ، لي هوي خارج الزمان والمكان، ولو عيونك وحواسك خانوك.

الايمان تمشي ع الموج وبقلبك حبة خردل.

الايمان انك تشوف حجر مدحرج مع كل طلعة شمس.

الايمان انك ما تركض ورا تمثال عيونو دم، وخوري حكوجي، وزيت ع صورة…

الايمان انك توقّف ركض هون وهونيك…

ركاع للقربان. وحب كل إنسان. هيدا إيمان. الايمان مش لاهوت مغطّس بالفلسفة ولا محاضرة مبكّلة.

الايمان هي ستي ناطرة الابونا مع شق الفجر ليفتح باب الكنيسة تفوت وتركع عالهدا.

الايمان هوي صرخة برتلماوس الأعمى. دموع مار بطرس. شعر المجدلية ع إجريه. الايمان انك تآمن بالحب لو صقعت القلوب. تآمن بالفجر لو طول الليل.