رسالة للضابط رعد.. رح تضل شعلة عنادك والعة (the coach)

يللي بيعرف تاريخ العماد عون بيعرف اسمه بحياتو العسكرية “الضابط رعد”..

امتاز الضابط رعد ب٣ ميزات اساسية:

الاولى انه كان قريب من جنوده ومتواضع و بيخاف عليهم و بيسمعلن و بيحميهن وبكل نداء على اللاسلكي يرعد صوته :”توقّو ،انتبهو ، يا شباب..”
و الثانية نظرته الاستراتيجية و طول باله و درايته ايمتا بيضرب الضربة و ايمتا ببحجم عن الضرب..

و بيضل العناد هو الميزة التالتة و الاقوى عند الضابط رعد

يا ضابط رعد بوعدك انا واخوتي بالتيار ما ننهزم ،
انت علمتنا انو الهزيمة الفعلية هي لما بتنهزم نفسيا من داخلك،
منوعدك..مش واردة ننهزم نفسيا..
منوعدك
رح نسمع لكل الناس ،، و نتلقى تشويه السمعة و التهشيم بإبتسامة العارف و ضحكة الواثق ،يللي منشوفا بوج جبران الصلب ،جبران الصخرة..

منوعدك رح نعامل بعضنا بإحترام و نشجع شبابنا علمبادرة تا يتقدم التيار لأنو لبنان بعد وجود التيار ممنوع يضل متل ماكان قبل وجود التيار..

منوعدك يا ضابط رعد
انو رغم الكره يللي حوالينا ،نضل نقدر نحب، نحب حالنا متل ما نحنا ،حتى بأخطائنا تا نطلع منها بذكا و ايجابية،نحب اهلنا و مجتمعنا ،و لبنان يللي شهدائنا ماتو كرمالو..
منوعدك انو نحنا قدا، انو تعبك ما رح يروح ضيعان
انو من قلب الام يللي بكيت الشهيد و من النفي ومن التنكيل بالطلاب المنضالين و من قهر شبابنا اليوم المصدومين ،رح ينبت فكر جديد ،اصرار جديد ، روح نضالية من نوع جديد ،خميرتها عنادك يللي
مارح نسمح
مارح نسمح
ما رح نسمح تنطفي شعلتو..

شعلة عنادك والعة

The Coach