هام – بالفيديو الأب مروان خوري في قراءة لتوقف الظهورات الشهرية للعذراء على ميريانا في مديوغورية (Video)

🌷✝🌷
العدرا تبشّر بالسلام لا بالويلات.. ومع ظهورها تأتي معها السماء
العذراء بِ 33 سنة قالت كلشي للخاطئ ومن له أذنان للسمع فليسمَع..
أبناء الله بالأزمة التي تمرّ بها البشرية مش لازم يخافو.. العدرا رح تنتصر وابليس بدو ينكسر وسيعود الى جهنم.. لكن اللي ما تابو وما ارتدوا رَح ياخدُن معو.. رح يخسرهم الرب..
عن 33 سنة ظهور إستثنائي و40 سنة لظهورات العذراء في مديوغوريه..

مقتطف من حديث الراهب المريمي الأب مروان خوري ضمن برنامج “ما أطيب الرب” على قناة “نورسات” – 19 آذار 2020 عن:

• هدف العذراء من ظهوراتها في مديوغورية
• الأسلحة الروحية الخمسة
• قراءة لتوقف الظهورات الشهرية لميريانا في مديوغورية

روحية مديوغورية

• أكتر شي بعيد عن روحية مديوغورية، والعدرا من أوّل ما ظهرت بهالمكان، بتقول: جايي احمل السلام.. والسلام لازم يملك بين الله والإنسان.
• العدرا مش جايي تحملنا الويلات ولا جايي تخبرنا عن الكوارث، بالعكس جايي تدعينا للتوبة، لأنو الخطيّة هيّي الكارثة
• عدم توبة الإنسان هيّي اللي بتخلّي مجتمعنا يصيبو اللي عَم يصيبو،
  العدرا رسمت الخريطة، من خلال خمس سلاحات اللي سلمتهم للبشرية، وهي:
  * الإعتراف – الندامة
  * القداس الإلهي – القربان
  * المسبحة – العودة للصلاة
  * قراءة الإنجيل – العودة الى التثقف بكلمة الرب
  * الصوم
  بتقول هودي، بيِنقلو العالم وجسر العبور لنقل البشرية من عالم يحكمو حرب والأوبئة والمجاعات والشر والإجرام والإرهاب الى عالم يسوده السلام.

طيّب العدرا الها 40 سنة عن تدعينا.. وعَم تسمّيه “زمن نعمة”.. عودوا.. صلّو وتوبوا.. رجعو عن شرِّكم والخطية يللي عَم تعملوها.. رجعو كرمو إبني..

إبني خلقكم حتى تحبو بعضكم.. والمحبة لبعضكم بتِجي من محبة إبني..

• ولا مرّة العدرا حِكيِت معنا كديانة،
  ولا مرة قالت أبنائي المسيحييين،
  ولا مرة أبنائي الكهنة أو اللبنانيين..
  العدرا حِكيِت شعوب الأرض بكل أديانها وطوائفها.. لأنو الإم ما عندا تفرقة لولادا، وكل البشر ولادا..

أزمة البشرية

• أبناء الله بالأزمة التي تمرّ بها البشرية مش لازم يخافو.. لكن قدام هالحالة اللي عَم نعيشا نكثّف صلاتنا للذين ما إجو لعند إرادة الله حتى ياخدو غطا النِعمة – هودي مِنخاف عليُن..
• ابليس بدو ينكسر.. وسيعود الى جهنم.. لكن اللي ما تابو وما ارتدوا رَح ياخدُن معو.. رح يخسرهم الرب..
• العدرا كانت عَم تبكي على هودي.. قلبا عَ هودي كان عَم يتألّم.. وعلى هودي عَم تطلب من كل شخص نساعدها بالصلا وبالصوم وبالتكفير حتى يرتدوا..

ميريانا

• إتصلت بالرائية ميريانا، يللي العدرا سلمتّها إعلان الكشف عن أسرار مديوغوريه العشر.. سألتها: شو منِقدِر نساعد العدرا..؟؟
• إذا كل شخص بيِعمل فعل توبة ويقدّس (كما مُتاح النا اليوم) العالم بألف خير..
• أكتر شي زاعجا هالهلع يللي عَم يتعاطو فيه مع الأحداث.. كأن ما عنا إيمان.. وكأنو نحنا مَتروكين..
• ميريانا أد ما متعلقة بالعدرا وبتحبها، عَم تِبكي إنو تشاهد العدرا مرة بالشهر وبتوصل للحظة ما بقا فيها تشوفا.. (هيي بتوصَف إنّو لمّا تِجي العدرا، بتِجي شقفة من السما معا).. ما تعرف شو يعني تعيش بالسما، وبلحظة بتصير عايش على الأرض.. كأنو الشخص تخزّق.. هيدا ألم ميريانا..
• قلب العدرا الأمومي ما بيتغيّر.. هيّي ام.. ميريانا عَم تبكي على هودي.. مش عَم تبكي لأنو في كارثة.. بالعكس مبسوطة قلب العدرا بدو يربح.. وسينتصر على كل قوى الشر بالعالم. بصلاتنا وحبنا وتوبتنا.. وساعتها سريعاً رَح نشوف العالم متجّه نحو سلام ما الو مثيل.

مديوغورية

• العدرا ما تزال ستظهر على الرائية ميريانا مرّة بالسنة. بِ 18 آذار.
  و 18 آذار مساقَب عيد مولد ميريانا..
  سألوا ميريانا مرّة، هل لأنو عيد مولدك..؟؟ قالتلُن: لاء، هيدا تحليلكم.. العدرا مش جايي تميّز ناس عن ناس. وقالتلُن هيدا التاريخ مربوط بالأسرار.
• نهار إعلان الأسرار منَعرِف شو سرّ يوم 18 آذار..
• مع كل شاهد بمديوغوريه في عندو نهار سنوي تظهر الو العدرا..
  * ياكوف وقف الظهور اليومي وعطيتو نهار تظهر الو سنوياً وهوي يوم عيد الميلاد.
  * إيفانكا أيضاً الظهور السنوي هوي بِ 25 حزيران. (ذكرة بداية الظهورات في مديوغورية)
  * الظهور اليومي مكفّى مع فيتسكا – إيفان – ماريا.. لكن؛
• سنة 1987 بدت تظهر إستثنائياً لميريانا بِ 2 الشهر..
  وسُئلت ميريانا.. ليه بهالتاريخ؟؟
  قالتلُن: كمان هالتاريخ مربوط بالأسرار.. وهيي بتطلب الصلاة على نة أبنائي اللي ما عرفو محبة يسوع، وبتحمّلنا النا المسؤولية.. لأنو نحنا المفروض فينا نضوي للعالم عن محبة الله.

33 سنة

• العدرا من سنة 1987 بلشت بالظهور الإستثنائي على ميريانا، كل 2 من الشهر.
• اليوم مع توقف الظهور سنة 2020.. بيِطلَعو 33 سنة العدرا عَم تظهر “الظهور الإستثنائي” على ميريانا.
• قد تكون علامة 33 سنة كما سرّ حضور يسوع معنا على الأرض.. هالقد عمرو يسوع بزيارتو النا على الأرض.
• يسوع كمان برسالتو فيها دعوة للتوبة.. كيف بلش الإنجيل.. شو بقول يوحنا: توبوا لقد إقترب ملكوت السمَوات. إذاً رسالة يسوع هي دعوة الإنسان الى التوبة، يللي كان في إستحالة التوبة قبل المسيح.. لأنو كانت الخطيّة حكمها وثمنها الموت.
• لما إجا يسوع على الأرض، صار في إمكانية نستردّ الحياة عن طريق التوبة يللي فتحها يسوع على الصليب. ميشان هيك، مشوار يسوع على 33 سنة كان دعوة للبشرية الى الخلاص.
• من 2000 سنة الى اليوم، رِجعِت العدرا، مش إنو جايي تِعمِل خلاص. (( الخلاص نعَمَل بيسوع )) جايي تِدعينا من جديد وتذكرنا بالخلاص اللي عِملو إبنا، انو نعود الو.. كأنو بِقيت 33 سنة على عمر يسوع َعم تعيّط للخطأة.. غيروا مسار حياتكم. رجعوا بالتوبة والندامة..
• لما قالتلا لميريانا، أنا ما بقا رح إظهرلِك.. بِ 2 الشهر.. يعني كلشي بدها تقلو قالتو للخاطئ قالتو.. لما وقِف يسوع قدام بيلاطس وقلو الناس عَم يتهموك.. دافِع عن نفسك.
  صمت يسوع.. مش سكَت لأنو ما فيشي يقولو.. كل كلشي بدو يقولو، قالو.. ومن له أذنان سامعتان ليسمع ما قلته..