بالصوت الأب نيكولا نهرا: أوقات منحبّ نهذّب بعضنا وهيّي بالحقيقة إنتقام.. ووحدو الروح القدس يجعلنا أبناءً لله 💔

🕯 من كتِرة صلا بونا أنطون الحبيس، نطبعت صورتو عَالحجر.. 🕯
💔 🕯 كلمات حكمة ونور وحب 🕯💔
عظة للأب نيكولا نهرا عن الروح القدس يغيّرنا لنتشبه بالله ☝

التأمل هو: كيف الروح القدس يحوّلنا الى ابناء الآب

• في فكرة غلط بين الناس، نحنا منّا أبناء الآب. هيدا الكلام منّو صحيح..
  نحنا خلايق خلِقنا من العدَم.. يعني من “لا شيء”.
• بس منصير إبنائو.. لمّا بحلّ فينا إبن الله
  منتعمّد وبحلّ فينا ابن الله.. ساعتا منصير ابناء الله عنجَد.
  ساعتها بيتطلّع فينا الأب وبسمّينا أبنائو..
  وبقلنا متِل ما قال لإبنو: أنت إبني الحبيب الذي به سررت.. وبقولا لكل واحد منّا..
• نحنا خلقنا على صورة الآب ومثالو.. ولكن للاسف الصورة تشوهّت والمِثال راح.. بدّو يِرجَع الروح القدس يشتغل عن جديد حتى يرجّعنا أبناء للآب. (بحطّ فينا الإبن – بدّو يصوّر فينا يسوع من جديد)

شو يعني صورة الله والمثال..؟؟

• صورة الله:
  يعني نحنا منشبه الله، روحنا بتشبه روحو..
  روحو خالدة متل روحنا
  روحو عاقلة متل روحنا
  روحو بتحبّ وبتنحبّ ونحنا روحنا بتحب وبتنحبّ
  بينما المخلوقات الباقية مش متلنا.. نحنا عنا إرادة حرّة متل الله، منِقدِر ناخود قرار بين الخير والشر.. ونحنا فينا نخلق إشيا بس مش من لا شيء، فينا نخلق إشيا من شي… ؛ الله بيخلُق من ماشي شو ما بدو..
  إذا فينا شبه لله..
• مثال الله:
  يعني في صالحين متل الله.. وما فينا نصير صالحين متلو الاّ إذا سكن فينا إبن الله، وحلّ فينا الروح القدس.

فينا نقول نحنا متل صخرة، بدّو يِنحت منّا صورة ابنو يسوع…
شو بيعمل بس بدّو ينحُت؟؟
بيلقط الإزميل، بدَقدِقْ وبشيل.. حتى تبقا الصورة الكاملة ليسوع..

شو بدّو يصير منّا الله؟؟
بدّو يشيل منّا الأنانية وحب الذات وقساوة القلب، وقلة الرحمة (الزوايد اللي ما الها طعمة)

شو صورة يسوع؟
هيّي صورة الحب وصورة النعمة وصورة الرحمة، والسلام والفرح الروحي، والحب لله وللقريب.. حتى نصير شبيهين لسيدنا الحبيب يسوع..

هالشي بدّو وقت وشغل، وبدو تعب.. وهالشي بوجّع..
يعني لو بيِقدِر يقلّو حجر لصاحب الإزميل “شيلو عني” كان بقول.. ونحنا أوقات منقول لَ الله حلّ عنا.. خليني بأنانيتي.. لأنو مِنحبّ حالنا..
وللأسف أوقات منحبّ نهذّب بعضنا.. وهيّي بالحقيقة بتكون إنتقام..
في كتير إشيا بشعا فينا، مِنلاقي صعوبة حتى نتخلّص منّا.. بس الله شوي شوَي، منُوعا ومنِكتشف يوم بعد يوم، كيف عَم نِتجمّل..!!! كيف عَم نتغيّر..!!!

كمان الشجرة حتى تَعطي ثمار منيحة، شو بيِعملو فيها للكرمة.. بشَحلوها.. والاّ بتَعطي عنب قليل.. نحنا كمان بدنا نتشحّل.. لأنو الله بدّو يصوِّر فينا صورة إبنو.. شو بسمّي نفسنا بنشيد الأناشيد: “أختي العروس”.

إختو لأنو بتِشبهو.. نحنا إخوة يسوع
عروستو.. يعني بدها تتحّد فيه.
القصة صارت مش قصة شبه، صار في محبة.. وهيدا كمان بدّو وقت.. الله عَ طول بيِشتغل عَ مهلو..

لوين بدنا نوصَل بالنهاية..؟؟
إذا كنّا قبضايات فعلاً واستسلمنا ليسوع بالكامل، رَح نصير جداً شبيهين بيسوع.. والقديسين صارو شبيهين جداً بيسوع، بس بدرجات.. (مش كل القديسين متِل بعضُن) كل واحد بيشبه يسوع عَ قدَر ما إتحّد فيه أكتر.. على قدَر ما تغيّر أكتر..
في آلاف الدرجات من القديسين.. ويمكن مليارات الدرجات..
بخبّر دايماً قصة عن “كاترينا السينية” يللي عيّط عليها واحد وتهما إتهام خطير.. ما دافعت عن حالها، فتحولّت قدامو.. بطّلت كاترينا وصارت شب حلو كتير.. سألا مين هيدا..
جاوب: يسوع المسيح..
يعني صارت كاترينا السيانية يسوع المسيح.. صارت تشبه يسوع المسيح كتير.. وكل القديسين هيك بس بدرجات..

يوحنا المعمدان بقلنا كلام قوي كتير.. عَم يوبّخ اليهود: إنتو عَم تقولو ولاد ابراهيم، منكم ولاد ابراهيم.. لو كنتو ولاد ابراهيم كنتو بتِعملو أعمالو..
ويسوع قلّن ذات الكلام: الله قادِر يِعمل من حجارة ولاد لإبراهيم.. وهيدي حقيقة.. نحنا حجارة بالأساس.. يعني ما عنا الروح القدس.. لكن الله بيِقدِر يحولنا أبناء للآب.. وبصير يحبنا أكتر لأنو وهوّي عَم يهتمّ فينا، متل الأم اللي بتِعتني بطفلا بتصير تحبّو أكتر.. بصير في علاقة قوية. لدرجة إنّو الآب بصير يعشقنا..
متل شَب يللي كان عايش بضيعة، وخبّرو إنو في راس بالضيعة وج حلو كتير.. ويوم من الإيام بدّو يجي شخص بيشبه الوجّ وبدّو يغيّر الضيعة كلها سوا..
هالولد عجبتو القصة، صار يطلع كل يوم ويقعُد قبال الصخرة، ويتأمّل فيها..
كل يوم..
كل يوم..
حتى صار وجّو بيشبه وجّ الصخرة.. شافو اهل الضيعة فعينّو الو قائد للضيعة.

ذات الشي نحنا بحياتنا.. ليه القديسين بشجعونا عَ التأمّل..!!؟؟
ليه كانو يَعطو وقت كتير للصلا..؟؟
في سبب..!!
لأنو كل ما عَطو وقت أكتر للصلا، كل ما بتنِطبع فيُن صورة الله أكتر.
أنطون طربيه (الحبيس) في مطرَح كان يصلّي فيه، طبعت صورتو عَالصخرة..
القديسين مش مهابيل حتى يعطو وقت طويل للصلاة.. عارفين شو عَم يعملو.. روح القدس نورُّن..
مفروض نزيد صلواتنا شوي شوي.. (ولا مرّة تقولو لحد صلّي كتير).
وبالصلا منتعرّض لتجارب كتير.. ابليس بيَعرِف الصلا لوين بتودّينا.. لصورة يسوع.. ما بدّو يانانصير عَ صورة يسوع، بدّو يانا نصير عَ صورة ابليس..
لهالسبب بيمنعنا نصلّي ابليس..
ومن هيك بس نجي نصلّي وخصوصي الجداد.. منحسّ:
– بالضجر
– تشتت أفكار
– نعس
– تعب
– وجع
بعرَف شخص كان ينهار بس بَدها تقدّس.. هيدا كلو لأنّو بيعرِف لوين بودّي فينا الصلا.. ما بدّو يانا نكون عَ صورة المسيح، بدّو يانا عَ صورتو… يعني حقودين، وحسودين، وقاسين القلب، وأنانيين.. يعني أشرار.

وإذا عدونا بيعرِف عدونا شو مهمة الصلا.. يعني نحنا مندعسو عَ راسو بالصلا..

وما تخافو تصلو للعدرا.. لأنو العدرا حاملة فيا الله.. يعني بس إنتا تصلّي للعدرا، العدرا بتنقل الله منّا الك.. يعني بتوصل لذات الشي والنتيجة.. حتى إنّو أحد القديسين الكبار “القديس لويس ماري دو منفور” (قديس مريمي، ومعلّم في الكنيسة) يللي مأثر فيه كتير البابا القديس يوحنا بولس الثاني، كان يقول:
العدرا قالب.. بس نصلّي منصير بقلب هالقالب.. وهالقالب شو شكلو..؟؟
شكلو يسوع..
يعني العدرا بتقَولبنا عَ شكل يسوع.. متلما حملت يسوع وكونتّو ببطنا.. كما بتحملنا النا ببطنا بأحشاء قلبا وبروحا.. بتقولبنا وبتغيّرنا..
لهالسبب ما كانو يخافو يصلّو للعدرا.. كانو يعتبرو حالُن كأنّو عَم يصلّو ليسوع..

شو الفرق بين القديسين وبينانتا..؟؟
نحنا ملهيين بحياتنا، ما منحسّ بشوق لَ الله.
في بنت راعية غنم صغيورة.. كانت ترعى اللغنمات بالبرية.. شافوها عَم تبكي.. قالولا ليه عَم تبكي..؟؟
ما منشوفك غير عَم تبكي..
جاوبتُن: لأنو بس بلش قول “أبانا الذي في السموات”. بلّش اتأمل ببي بالسما.. هالبَي في عندي علاقة معي.. وهالبَي عَم يتطلّع فيّي على طول.. هالبَي مرافقني على طول.. ويصيرو ينزلو دموعا من كترة الحب…
هالقد بيِقدِر يِعمِل فينا الروح القدس، وحتى لو كنّا صغار.. وبالفعل في قديسين كانو صغار.. القديسة ياسنتا اللي ظهرت عليها بفاطيما كان عمرا 8 سنين، وحتى هلق جسما ما فني..
في قديسين كبار، في قديسين ختيارية، في من كل الأعمار.. الروح القدس ما بيِعصي عليه لا كبير ولا صغير.

بحبّ إنهي حديثي بكم كلمة للقديسين، حتى نعرَف قديه أثّر فيُن الروح القدس..

• القديس رولان مثلاً كان يقول: أريد يارب منكل قلبي، لو تصرخ الحجارة أحبك يا الله، ولو كلفني ذلك حياتي..
• القديس القديس “الفونس دي ليغوري” بقول: ما برتاح يا رب، ما دام في واحد يا رب ما بحبك على الأرض.. (كان مطران وقديس)
• يسوع قلها للقديسة تريزيا الأفيلية كلام حلو كتير “قلها يا تريزيا أنا ناطر يوم الدينونة حتى فَرجي العالم كلو قديه إنتي بتحبيني”. (شو هالعلاقة القوية اللي صارت بين القديسين وبين الله)

هالشي مش مستحيل بين أي إنسان والله.. المهم ناخود قرار متل القديسين.. بدها وقت.. ومعليه لو قَشَطنا بالخطايان منِرجَع نقوم.. المهم نمشي وما نتراجع.. إذا وقعنا نوقف دغري ونركض لعند يسوع. أوقات الله بحبّ يفَرجينا ضعفنا، حتى نعرِف إنّو قوتنا منّو.. ونعرف إنّو خلاصنا منو ومن الروح القدس، يللي عَم يصورّنا عَ صورة يسوع المسيح.

♰ آمين ♰