بالفيديو – شقيقة جبران باسيل: إذا الشتايم بتخليُن ينفسو احقادُن بسيطة نتلقاها 😉

– رولا باسيل للجنرال: نحنا عقلك، وإيدَك، وقلبك، ولبنان رح ينتصر، ورح نحارب الفساد شو ما صار🤺*

***

*(1) س: شعارات نابية بالشخصي طالت رئيس التيار جبران باسيل، كما طالت عيلته، هل من تعليق⁉*
– مش جديد علينا الشتائم بهالطريقة العنيفة.. ما كنا متوقعين يوم نوصَل يوم بلبنان يكون عند الناس شي بإيدُن الاّ شتم جبران باسيل.. 😉
– لو طِلعو بشي إتهام وحوّلوه عَالقضاء، ولقيو شي، وطِلعو بشي ورقة.. كنّا يمكن لو إنشتمنا منَعرِف إنو نحنا منستاهَل هالشتايم.. بس حتى يِطلَع واحد حتى يسبّ جبران باسيل وما معو شي بإيدو.. إذا الشتايم بتخليهُن ينفسو احقادُن بسيطة فينا نتلقاها.. 😉

*(2) س: هل من رسالة للمتظاهرين، للداعين لإسقاط العهد وجبران باسيل⁉*
– نحنا اليوم كنّا متضامنين مع جبران باسيل، بس أكيد كنا متضامنين مع فخامة الرئيس ميشال عون، ورئيسنا اللي ناضل 30 سنة، ما رَح نخلّي نضالو يروح ضيعان ✔
– ما ناضلنا حتى نطلع بالأخير، وناس ما عندا إثباتات، أو حبُّو يِخربو البلد عَ راسُن وعَ راسنا، ما رح نقبل..👆

*(3) للأوادم مش للزعران*
– في لهجة عَم نِسمعَا ميلشيوية أنا سامعتا، وولادي ما سِمعوها.. هلق عم يِسمعوها وهيدا 13 ت1 تاني..😔
– لهجة الميليشيا مش مقبولة، وفي قطع للطرقات، والناس ما عم توصَل عَ أشغالها.. واليوم بدّك تعبري عن موضوع نعم، بس ما فيك تِجبريني إقعُد بالبيت وما إتحرّك 💯 بَركي أنا بدّي عبّر بطريقة تانية ✔

*(4) الرسالة*📩
– للناس الأوادم الموجوعين، وكل إنسان آدمي اليوم موجوع.. بقلًن: عرفو كيف بدكم تبنو البلد.. بدكم تبنو بلد، الجنرال وقف وقال: أنا رأس الهرم وأول إنسان مُتهّم بالجمهورية، وباخود حقي من القضاء، بدكم تبنو بلد، تفضلو روحو لعند النواب اللي إنتخبتوهم من سنة، خلوهُن يصوتو على:
* رفع السرية المصرفية
* رفع الحصانة
* قانون إستعادة الأموال المنهوبة
وهيك فيكُن تدعّو عَ الآدمي والأزعر والقضاء بقرّر مين الآدمي ومين الأزعر، وبكل التيارات والأحزاب في أوادم وزعران.

– ما عَم قول التيار الوطني الحر هنّي الأوادم، بكل التيارات والأحزاب في أوادم وزعران، بس ما بصير أبداً يتساوى الزعران بالأوادم.. 👍 لأنو هيك ما منِبنى بلد، منضلّ مَطرحنا ✔

– نحنا نزلنا تحت شعار مش كلُن يعني كلُن.. في أوادم وزعران بهيدا البلد 👆

*(5) س: شو بِتقولي لخيّك جبران باسيل قبل ما يكون رئيس التيار أو وزير⁉*
بقول لخيّي وللجنرال عون، ولعون احبّ شي عَ قلبي ناديه “جنرال” مش الرئيس عون، نحنا تربينا عَ إيدَيك.. ونحنا من أجيالك، وتشربّنا تعاليمك.. وما رح يروح نضالك ابداً.. ونحنا عقلك، ونحنا إيدَك، ونحنا قلبك، ونضالك ما رح يروح، ولبنان رح ينتصر، ورح نعمرو، ورح نحارب الفساد لو شو ما صار🤺

– لجبران خيّي، بقلو، إنت تعودّت على الظلم، صرلُن كذا سنّة بيظلموك.. وعَم يجربو يشتغلو على صورتك.. معليه بس غنت فيك تِمشي وراسَك مرفوع، ومَرتَك فيها تِمشي وراسها مرفوع.. وولادك مَرفوع الى أبد الآبدين آمين.

https://youtu.be/jtYNIFXubPg

(رولا باسيل 25 ت1- 2019)