Agoraleaks Agoraleaks
– بعرف يا تنورين انتي ملبكي بمأتم حبيب الروح منزين الحكي
***
كلمة راهب المقاومة الاب الدكتور سيمون عساف خلال تأبين المرحوم الدكتور المناضل انطون الخوري حرب 21/8/2019 ا.د. سيمون عساف
بعرف يا تنورين انتي ملبكي بمأتم حبيب الروح منزين الحكي
رجَّال طوني كان للرفقه علام وثورة كرامه شملنا عليها بكي
كان الصديق الممتلي زخم وسلام وما قلت مرّه قبل منِّي بيتّكي
قديش صعبه بمأتمو احكي كلام وأوقف متل جندي خسر بالمعركه
شو صار وينك شو جرى ليش الرحيل ابنك ادونيس البري ناطر تعود
متل اليتامى برفقة الإبن النحيل وقفنا نفتش عالبطوله وعالـوعــود
الحسره عليك مورَّمه الجفن الكحيل تركت الهبوط يشدنا بدل الصعود
وعد التلاقي امر اصبح مستحيل مش هيك بدنا يحطمك جوز الزمان
وما حطمك قصف القنابل والرعود
انساك مش معقول يا وجه القمر زياراتك لعندي صُوَرنا طابعه
بالخاطر وبالعين بليالي السمر مع ذكريات بقلب مخلص قابعه
علقتني وفليت والدمع انهمر بحبك محبه من صميمي نابعه
غارو الملايك فوق عقدو مؤتمر واخدوك منا عالسماء السابعه
من مطلعك رجال حتى موعدك ما يوم مع تحرير لبنانك مطل
كان الحلم يرجع وطنا يسعدك ثوره على الفوضى كنت ضد الخطل
بكير حتى الرب عنا ابعدك والدم بدل الدمع عالفرقه هطل
أمَر الفدى لدار الألوهه اصعدك حتى السما تأدي التحيه للبطل
انطفيو قناديل المنى ما شعشعو بعز الشباب تركتنا والحزن ساد
لما الاعادي استطمعو وتجشعو بارض الكرامه ما قبلت نومة وساد
لبنان خسرك والحجار تخشعو وكل الجهود ترخَّصو بسوق الكساد
دافعت وتمنيت عينك تقشعو ارقى وطن وبصحتو شافي سليم
ومن بدل ما يشفى نهش جسمو الفساد
لمين التعازي بقدم واحرى انا بالتعزيه متلي متل كل الرفاق
بقدم تعازي بالمصيبه وبالضنا “لْماغي” المصونه زوجتك والحزن فاق
بقدم تعازي لأليسار السنا لكل القرايب والوجع عالجرح فاق
بسأل يسوع الناصري بارض الفنا بجناح رحماتو الحنونه يغمرك
ولو كان مش هيك العهد والاتفاق.
