شوي تشغيل مخّ.. (بيار عقيقي)

– محاولة إنتحار.. وشهادة البريفيه ما إلا عازة أبداً 

***

لما توصل القصة انو شخص عمرو 15 سنة، يعني طفل بالمعنى القانوني لأنو تحت سن الـ18، يجرب ينتحر بسبب سقوطو بالبريفيه، يفترض إنو يصير شوي تشغيل مخّ.

1) شهادة البريفيه ما إلا عازة أبداً

2) فكرة “الفشل” أو “الرسوب” بالمدرسة وربطا بمعايير الهيبة بالمجتمع، ومؤخراً بالعالم الافتراضي، إنو “ابني/بنتي نجح/ت”، يللي هيي شي حلو (الشعور بالفخر) بس بتكرّس بالمقابل، عامل إحباط لأطفال عمرن 14 و15، وبتخليون أقرب إلى “مشاريع أمراض نفسية” مستقبلاً منه إلى التحفيز للعودة من السقوط نحو النجاح. وهالشي بيأثر سلباً ع نفسية الولاد، وحكماً ع مستقبلن، خصوصاً إذا انربط هالمستقبل بهالشهادة الما إلا عازة، وبيكرّس مفهوم إنو “الشهادة هيي معيارك بالحياة”. مع إنو هالشهادة (وللمرة التالتة) ما إلا عازة

3) إجمالاً يفترض بالمدارس تكون محل ليتعلّم الولد أسس الحياة، مش لنحمل العصاية ونهددو إنو رح نضربو، فعلياً أو معنوياً، إذا سقط. ساعتا بيصير النجاح لمجرد الزمطة من العصاية، مش للتعلّم. كم واحد منا بعدو فايق شو صار بعهد المتصرفية؟ يمكن ما حدا

4) في مواد ما إلا طعمة، مش عم نستفيد منا بحياتنا. وما بعرف ليه علمونا، غير إنو ليبيعو كتب محددة، وينفّعوا أساتذة محددين بوقتا. الفساد موجود بالمنهج التعليمي، وهالشي بيأثر بشكل سلبي ع نموّ التلاميذ وتطورّن..

5) كل المنهج التعليمي بحاجة لتطوير، بدءاً من التقنيات وانتهاءً بتعليم ضروريات الحياة. تعلّم اللغات هوي الاساس. الكومبيوتر والانترنت. الرياضيات الأساسية يللي منستعملا بيومياتنا. مش انو نجي نتعلم بيتين شعر لشاعر مات من 4 الاف سنة ونقول “واو”. ما خربلنا بيتنا إلا الأشعار..

6) التوجيه الدراسي بعمر زغير هو اهم شي منعملو، مش كل ولادنا بدنا ياهن حكما ومهندسين ومحامين. ياحني صار عنا عاطلين عن العمل، وشهاداتن معلقة ع الحيطان ع الفاضي. التوجيه هوء جزء من منظومة اقتصادية. السوق شو بدو؟ وعليه بيمشي التوجيه..

7) للأهل، ما تفكروا اذا ابنكن او بنتكن نجحوا او سقطوا، يعني انتو صرتوا قوايا بالمجتمع وبين القرايبين أو “تبهدلتوا قدامن”. بتخسروا ولادكن ع هالحالة. أول خطوة لتربحوا الولاد، هوي انو يكون شعاركن “متل اجري المجتمع والقرايبين”. وهيك إذا كلكن متل اجر بعضكم البعض، منكون دعسنا اول خطوة نحو السعادة..

8) ما بحياتكن تقمعوا ولادكن، ويللي ما بدو يتعلم، شوفوا شو بيحب، وشجعوه عليها. مين قال انو المدرسة سبب للنجاح الحتمي؟ النجاح والفشل مش مرتبط بمدارس..

9) تذكروا يا أهل قديه كنتوا تعانوا لما أهلكن كانوا يضغطوا عليكن، وما تنقلوا هالشي لولادكن.

وشكراً

Pierre Akiki