بالفيديو – سليمان فرنجية من مقرّ الرهبانية المارونية في غزير: أنا رجل حوار ومنفتح عَ الجميع وضدّ الفساد ومع الإصلاح وولائي للكنيسة و 8 آذار

– ما فيشي شخصي ومآمنين بنوايا عون بس بدنا نشوف إذا النوايا رح تتحقق.. ونحنا وبري مشروع سياسي واحد، اللي بِخالفو بخالفنا..

***

مقتطف من حديث رئيس تيار المرده سليمان فرنجيه من أمام مقرّ الرهبانية اللبنانية المارونية في غزير، حيث إستقبله الرئيس العام للرهبانية الاباتي نعمة الله الهاشم والآباء المدبرين مع جمهور من الآباء: (14 آذار 2019)

(1) العلاقة مع رئاسة الجمهورية
– نحنا داعمين لأي مكافحة للفساد، ولأي موضوع إصلاحي..
– رح نصلّي نشالله على نية نِطلَع من المأزق الإقتصادي يللي يطال كل مواطن بلبنان 🙏

س: زيارتك للكرسي البطريركي، وللرئاسة العامة للرهبنة، تحمل المعنى الديني، لماذا لا تستغلّونه مثلاً في العلاقة مع فخامة الرئيس ومع القيادات الأخرى المسيحية؟؟ في أي وقت سيكون الموارنة متحدون؟؟

– نحنا ما عنا خلاف
– نحنا دايماً بتصرّف فخامة الرئيس وقلناها كذا مرّة، وقت اللي بدّو يانا بيستدعينا..

(2) التعيينات
– لحدّ هلق ما فيشي ببشّر بالخير… كل التصرفات والتعيينات اللي صارت، ومطروحة حتى ياخدها فريق معيّن..
– نحنا مآمنين بنوايا فخامة الرئيس، بس بدنا نشوف إذا هالنوايا رح تتحقق

(3) بري
س: هناك حلف بينكم وبين دولة الرئيس نبيه بري، واضح إنّه بوجه الرئيس ميشال عون؟

سليمان فرنجية:
– أنا بحلف مع بري من سنة 1990، من وقت أنا دخلت عَ الحكومة، ومنّو بوجه الرئيس ميشال عون، ولا حدا..
– نحنا وبري مشروع سياسي واحد، اللي بِخالفو بخالفنا، ونحنا منعتبر حالنا بنفس المشروع السياسي يللي مع الرئيس عون
– مشكلتك إنّو التيار الوطني الحرّ بدّو يحتكر هيدا المشروع السياسي.. يا خيّي نحنا فيه من سنة 1990

(4) الرهبنة المارونية
– أنا جايي عند الرهبنة المارونية، قدّم ولائي للرهبنة وللكنيسة
– بالسياسة أنا مطرح ما أنا.. أوراق إعتمادي بِ 8 آذار
– أنا منفتح عَ الجميع، وأنا رجل حوار ونحنا ضدّ الإلغاء، اللي بدّو يتفاهم معنا نتفاهم معو
– ما عنا مشكلة شخصية مع حدا، في خلافات سياسية، وعنا موقفنا السياسي
– نحنا أكتر ناس منلاقي حالنا لازم نتفاهم معُن هني التيار الوطني الحرّ، ولكن بتصوّر إنّو نحنا موجودين

– الوصول الى بعبدا، هيّي ظروف اللي بِتقرّر من هو الرئيس، وكيف ستكون الرئاسة
– اليوم إذا فخامة الرئيس عَ رأس الدولة، وهيدي الحكومة حابين يصلحو البلد، نحنا داعمينُن..

– نحنا هون كلنا بمعية الشيخ فريد هيكل الخازن..

وشارك في الزيارة عضوا التكتل الوطني النائبان فريد هيكل الخازن وطوني فرنجيه والوزير السابق يوسف سعادة.

https://www.youtube.com/watch?v=E3fj3unXxnI&feature=youtu.be

(مقرّ الرهبنة المارونية في غزير – 14 آذار 2019)