رياشي لجبور: هواء معراب بارد.. وريتا نصور تسألهما نفس السؤال والجواب وفق الشخصيتين

كنعان شريكي وما بتخلى عنو – ريتا نصور أنجيليني – OTV – متابعة Agoraleaks.com – (Video+Audio)

عم يودّع ملحم رياشي مكتبو في معراب، كرئيس جهاز الإعلام والتواصل بالقوات اللبنانيي، الأغراض الشخصية نُقلت، الكتب الكتيري وُضبّت، امّا الأوراق والمستندات فرح يورتا الخلفْ مدير موقع القوات الإلكتروني الصحفي شارل جبور. وما في على لسانو بهالإيام باطار المزح، الاّ كلمة وحدي لملحم، “شهّل بقا”.

يقول رياشي: حبيت اتركلو لشارل ايقونة القديس بولس. الوزارة إذا إجتْ بتكون إجتْ. إذا ما إجتْ، في موقع تاني الحكيم مهيئلي ياه لأخدم فيه القضية.

تسأل ريتا نصور انجيليني: تعودنا عليك دايماً مع زميلك النائب كنعان رح تتخلى عنو وتروح على الوزارة، يردّ: شريكي كنعان ليه بدّي اتخلى عنو.

جبور ورداً على سؤال عن مواقفه المتطرفة يقول عن توفيق مواقفه مع منصبه الجديد: لغة الصدام بتواجهيها بلغة صدام. لغة الحوار بتتعاطي معها بلغة حوار. طبعاً المركز بيفرض عليي اتعاطى انطلاقاً من مسؤولية قواتية وليس من صحفي ومحلل سياسي. بدي آخود بعين الإعتبار موقف القوات الرسمي، بنفس الوقت إنو انا عندي طبع معيّن، بيدفعني انو روح شوي وأحياناً نحو التشدد باتجاه المحلّ اللي انا بكون فيه.

ملحم عمل كتير على مستوى الجهاز. انا جايي كفّي. ومتل ما ملحم ترك بصمتو، اكيد انا رح اترك بصمتي، ودوري الأساسي بهالمرحلة انو اعمل قدر المستطاع التعبئة الوطنية والسياسية التي ستدفع باتجاه ان تدخل القوات اللبنانية بكتلة نيابية كبرى، وندفع قد ما فينا الرأي العام اللبناني والوطني ان يكون في هذا التوجّه.

رياشي، ينصح جبور بضرورة “يدفي راسو” يقول: طقس معراب مسقع كتير بالشتوية، لازم يدفي “القريعة”..

يردّ جبور: ما بحب السقعة، وكنت بفضل لو صارت الحكومة، وانتخب الرئيس عون بمطلع الصيفية مش بآخر الصيفية..

اختلاف الشخصيتين

بين السلف والخلف، اكتر من قاسم مشترك حول وحدة المبادئ والتوجهات السياسية، تَ يبقى الفارق الأساسي المتعلق باختلاف الشخصيتين، وللدليل شوفو معنى كيف بيختلف السؤال على نفس السؤال بين صاحب الشخصية الدبلوماسية وصاحب الشخصية الأكثر حدّة.

تسأل نصور أنجيليني رياشي، عن كلام بري ومطالبته “عطوني الأشغال والتربية، وتركو حلفائي عليّي، وتحديداً المردة، مستعدين تتخلو من حقيبة من حصتكم؟

يردّ رياشي: نحنا والرئيس بري العلاقة وديّة وطبيعية جداً، وبالعكس بس كل يللي بهمنا انو نبلش الكلّ يتعودو على نمط جديد، انّو في رئيس جمهورية جديد، ودستور الطائف بخولو صلاحيات حقو يمارسا، مش انو تُمارس عليه.

امّا جبور فيقول: انا الأمور بشوفا من زاوية أخرى، انا عندي منا مسألة حقائب، الواضح انو منكون بتعقيد ندخل بتعقيد جديد، هيدا أكبر دليل انو ما في نيّة لتسهيل عمل العهد، المسألة ليست محصورة وموجودي عند القوات، هناك رسائل عم توجّه للرئيس عون، ولذلك الهجمة هيّي هجمة على العهد، من اجل وضع ضوابط لإلو، وباعتقادي لا احد يستطيع ان يضع ضوابط على الرئيس عون.

 

https://www.youtube.com/watch?v=vh7N_OwhCVo