ناجي غاريوس: ما حدا أحسن من التاني، الأحسن من التاني ببرهن بأعمالو (Audio)

– بس تخدم المواطن ضمن القوانين بتعمل مؤسسة ما بتخدم مدير المؤسسة بس تخدم الناس .
– الرجل يللي قدر يجمع باتفاق بينو وبين حزب الله وبينو وبين القوات وبينو وبين المستقبل معناتا هيدا رجل منو منحاز لأي طائفة .

مقتطفات من حديث النائب ناجي غاريوس لقناة الـ”OTV” ضمن برنامج “حوار اليوم”:

• ما يحطو كل المشاكل يللي تشكينا منها 26 سنة، يجي يحطوها بسحر ساحر رئيس الجمهورية بدّو يحلها
• يتفضلو يألفو حكومة، مش بيللي هيي احسن، بحكومة من ناس ذات كفاءات، ت يقدرو يشتغلو بالتعاون
• في شي وزير اشتغل مع وزير، بدن يغيرو النهج، ما بقا في اليوم ناس تعمل يللي بدها ياه وبالأخير بعتذر ما تواخذني
• اليوم عنّا زخم جديد للعهد الجديد، نحنا هيدا الزخم ما رح نتركو، عم نطلب من جميع الأفرقاء السياسيين متل ما هني عندن ناس صوتولن، نحنا عنا ناس صوتولنا أو انتخبونا، ميشان هيك لازم نتعاون كلنا سوا، ما بدنا نفرق بين ناس انتخبونا ببعبدا وناس انتخبونا بالجنوب، هودي كلن لبنانيين، عشان هيك كلنا لازم نتعاون ت نخدم المواطن
• بس تخدم المواطن ضمن القوانين وضمن الدستور بتقدر تعمل مؤسسات ما تخدم مدير المؤسسة بس تخدم الناس، هيدا الكلام طوباوي وكل كلام مرتّب هوي كلام عندن طوباوي ت يهربو من المسؤولية
• أوعا يفكرو انو نحنا مش موجودين، نحنا رح نساعد الكل. رح نساعد الناس يللي مش فاسدين، نحنا ما منشتغل نكدية
• موقع رئاسة الجمهورية إذا قوي، بكون لمصلحة كل اللبنانيين، وقالا العماد عون بالخطابين(2) تبعو، مش مصلحة المسيحيين، وعلى كل حال السنة والشيعة مصلحتن هني اخوة، (وعندي صداقات كتيري واحترام) بقلن نحنا المسيحيين منّا ضدن، نحنا اذا كنا قوايا متل ما هني قوايا، نحنا المسيحيين منعمل ركائز لبناء دولة حديثة
• من اليوم ورايح، ما حدا أحسن من التاني، يللي احسن من التاني ببرهن بأعمالو
• الرجل يللي قدر يجمع باتفاق بينو وبين حزب الله وباتفاق بينو وبين القوات اللبنانيي وباتفاق بينو وبين المستقبل معناتا هيدا رجل منو منحاز لأي طائفة، ومش منحاز الاّ لحتى يبني دولة مع مواطن