باسيل بعد التكتل: الإتفاق عَ الحكومة تمّ وبقيت التفاصيل.. وبري عندو دور مهم وكبير (Audio)

نطالب بتمثيل المردة والكتائب والقوميي ولكن بعدالة – لا اعراف على الحقائب.

مقتطفات من حديث رئيس التيار الوطني الحر جبران باسيل بعد اجتماع تكتّل التغيير والإصلاح:

• فيما يتعلق بتشكيل الحكومة، نحنا عم نحكي عن حكومة انتخابات، محددي بالوقت، وعندا مهمي واضحة إنو تجري انتخابات نيابية بموعدا
• نحنا عم نحكي عن حكومة وحدة وطنية، وهوي مطلبنا بالأساس، وبالنسبة لإلنا بتشمل الجميع. وبالحد الأدنى بالقوى الممثلة بالمجلس النيابي
• من الأول واضح لإلنا انو ما في رفض لحدا
• عم نطالب بهالحكومة انو يكون في كتائب لبنانية، ويكون في مردة، وقوميين، وأطراف سنّية خارج تيار المستقبل، وارسلان.
• الحكومة بتساع الكل، حتى لو تألفت من 24 وزير
• عم نطالب للجميع عن كانوا متفقين معنا بالسياسة أم مختلفين
• في ناس ما رغبت تشارك او الظرف ما سمح، من كون عم نحكي عن حكومة وفاق وطني
• نحنا عم نحكي عن حكومة ميثاقية، بمعناها الكامل. وبتمثيل صحيح
• عم ندخل عَ مرحلة جديدي بدو يكون أي خلل موجود يتصحح، برئاسة الجمهورية تصحح، بالحكومة تدريجياً لازم يتصحح، وبالمجلس النيابي عبر القانون
• بما توصلنا اليه نحن سعيدين بما وصلنا اليه وتحديداً بالتمثيل المسيحي، ونبشر اللبنانيي انو عم ندخل الى مرحلة شراكة جديدي، باعتراف ورضى ورغبة وقبول من الجميع
• بالنسبة لإلنا ومتفق عليه مع الكل، انو ما في اعراف ولا حجز لوزارات لا لطوائف ولا لأحزاب
• بهيدي الحكومة ما في فيتوات من حدا على حدا، ونحنا ولا لحظة حطينا فيتوات على حدا ونرفض يكون في فيتوات الحقايب وعلى الأسماء
• مش صحيح ابداً انو حطينا فيتو ع حدا
• عن نعمل حكومة اهم شي فيها تؤلف بسرعة ضمن الوقت المقبول للتأليف
• في فرصة نبلش جهد حقيقي بين الأطراف السياسية لإقرار قانون انتخابي وبري عندو دور كبير، ومندعي بصوت عالي لشراكة نحنا وبري وكل الأطراف السياسية
• قانون الانتخابات ما بيطلع من اتفاق ثنائي ولا ثلاثي ولا رباعي، القانون بدو توافق
• بما يعني معظم الأطراف المعنية بالحكومة، الاتفاق تمّ على الأجزاء الأساسية والكبيري، وما بقا في سبب فعلي انها تتأخر، ما عدى بعض التفاصيل، ولكن هيدا الأمر قواعدو السليمة، بما يعنينا وما نعرفو وضعت، وفي احترام للجميع وايّة إيجابية لازم تنعطى لحلّ اية عقبات تانية ما في مشكل، لكن لازم نضلّ كلنا سوا محكومين بالحدّ المعقول
• كلشي فينا نسهلو قمنا فيه
• كرئيس جمهورية وكتكتل ما بقا فينا ناخود متل ما أخدنا بالحكومة الماضية، وكانت حكومة مؤقتة، قلنا بوقتا عم نقبل عَ أساس حكومة 4 اشهر، ضحينا كفاية، بس كل طرف بدو يحافظ عللي عندو، نحنا بالحدّ الأدنى بدنا نحافظ على الحدّ تبعنا ويللي هوي ظالم ومجحف
• ما حدا بدّو يبقي على قانون الستين، وعم احكي عن الرئيس بري، لأنو نحنا وهوي متفقين بشكل كامل