الأب مجدي علاوي: للأسف هَمنا العالم مش الله وأوقات كتيري أسرار الكنيسة حوّلناها لأعياد وثنية (Audio)

– 8 أطفال مَتروكين بأسبوع دون أم وبَي سعادة السما إهتمّت فِيُن… لنُبدِل هدايا ومصاريف العمادِة والأول قربانة بتياب للخِتيار أو قسط لطفل.. “سعادة السما” ما بتَعرِف تقول لاق.. لكن للأسف أكترية الجمعيات بلبنان بِتنقّي الأشخاص عَ الطَبليِّ..

***

عظة الأب مجدي علاوي – قداس السلام في دير القديسة تريزيا الطفل يسوع – سهيلة 20 آب 2018

مريم أختارَت النصيب الأفضل، ولن يُؤخذ منها… في أغلب الأحيان، وكثير من الأوقات نَلوم مرتا على كثرة الشِغل. المشكلة مش بكِترة الشِغل أبداً.

السؤال الأساسي هوّي، هل بِشِغلي أنا وبأعمالي، وبهمومي وإنشغالاتي، في وجود لله..؟؟؟

مريم راحَت خدمت نَسيبتها أليصابت، بس أخدِت الله معها.. وكتير اليوم مكرسين ومكرسّات، من بيناتُن الأم “تريزيا دي كالكوتا”، بس كانت عَم تهتمّ بالفقير، كمان كانت عَم تاخود يسوع معا…

هل الله موجود، وهوّي الأولوية بحياتنا اليوم..؟؟ اطلبوا أولاً ملكوت الله، وكل شيءٍ يُزاد لكم..

يللي بِحزِّن قلبي وقلب يسوع، وإمّي مريم، كيف عَم نحضِّر للزواج اليوم..؟؟ كيف عَم نحضّر عمادة ولادة ولادنا اليوم..!! كيف عَم نحضّر الدفن..!! كيف عَم نحضّر القربانة الأولى لولادنا.. وأعياد الرعية..؟؟

حوّلنا أسرار الكنيسة ونشاطات الكنيسة لإحتفالات وثنية، قبل بسنة بحضّر الزواج، وبنِق إذا بروح 4 مرات لحضّر كيف بحضِّر الزواج بقلب الأبرشية، بس قبل بسنة ببلِّش إعمل “بروفات” عَ شعري، وعلى لِبسي، ومين المَعازِيم، وكارت العزيمة.. وبِنسى الأساس…

وبس إجي على العِرس بِجي حتى قول، بِتصوَّر وفِل، وبحطّ زينة بملايين ومِنكون عارفين في ناس جيعانين، ومُرضا بدُّن دوا.. ومِنكِبّ الزينة بذات النهار.. هيدا الشي هوّي مطلوب منّا اليوم..!!

وبعد فترة منِسمَع راح عَ المحكمة..!!

كيف مِنحضّر العمادة اليوم..!! ما بعَمِّد إبني بس أوّل ما بيِجي، لأنو بدّي إنطر يصير معي حَق المطعم… ومش أيّ مطعم.. ونسينا إنّو بالعمادة هوّي عيد ميلادو الحقيقي… نسينا الأساس وضِيعّنا الجوهر… لأنو الزيت والمَيرون والماي يللي عَم يتقدّس فِيا هيّي الأساس..

بالقربانة الأولى، صار في زفِّة وأمور.. شو هَودي..؟؟ ومنوصل مأخرين على القربانة، ومنرِدّ بقلب الكنيسة عَ التلفون، حتى نقول إنو الطاولة مش مزبوطة، وهيدي الكِرسة مش مزبوطة..!! هيدي هيّي القربانة الأولى لولادنا..؟؟

أنا بِهمني شو بدّو يقول عنّي العالم أو يسوع..؟ نِحكي بصراحة ومش عَم دينْ حدا.. بس إدّيه اليوم بِبيوتنا همُّنا العالَم..؟؟؟

أمّا بمهرجانات الرعايا وعيد السيدة ومار  الياس، مِنجيب رقاصة وفنان… وَين السجود وين الصلا..!!! يا جماعة عمِلو حفل بساحة البلدية واللي بَدكُن ياه بس إحتفالات الكنيسة ترِكوها للكنيسة…!!!

نوعية الصلاة

بدّي إسأل عن نوعية صلاتنا اليوم؟ هل يا ترى مناخود وقت حتى نِسمع لَ الله شو بدّو منّي..؟؟ أو ما عنّا وقت!! عنّا وقت لَ كِلشي، بس ما عنّا وقت لصلاة المَسبحة والسجود والذبيحة الإلهية..!! بس منِقعُد ساعة على الأرغيلة وبالـ”mall”…

ومنِرجَع نقول: شو عَم يصير ببيوتنا..!! بس نكون مأسسين عَ صخر مزبوط، أبواب الجحيم لن تقوى علينا أبداً.. بس إذا أنا:
– ما بقدِّس
– ما بِعمُل مسبحتي،
– ما بِقرا بالإنجيل،
– ما بِجي عَ كِرسي الإعتراف،
– ما بصوم..
أكيد أنا بعيد عن النور.. وما عندي وقت لكلمة الله.. كِرمال هيك بقول لمَرتا: تَهتمّين بأمور كثيرة والمطلوب واحد.. ونحنا اليوم منِهتمّ بالخارج ومنِنسى الداخل.. ومنِنسى إنّو قلبي بدّو يسكن في الله..

هل بيسأل كل واحد منّا.. هل الله جاهِز يِسكُن في الله..؟؟ منِعمُل جردات للشِغل وللبيت، بس لنهاري منِعملّو جَردة..؟؟ هل إذا أنا كِنت بِبَه يسوع..؟؟

يسوع بالماضي كان ضَيف لمريم ومَرتا، واليوم هوّي ضيفَك..؟؟ هوّي واقِف قدام باب قلبك.. عَم يدقّ.. هل بدنا نِشلَح الإنسان العتيق اللي فينا، وتقرّروا تكونو مِتِل مريم اليوم..!!

بَدها تكون بطل.. يسوع بدّو ياني أعرِف إتخلّى، واتواضَع وإنسحِق.. هل قادِر اليوم إتواضع وإنسحِق..؟؟ أو كبريائي آكِلني ومَركزي…؟؟

8 ولاد

الأحد الماضي، كان عندي قداس عَ العشرة الصبح.. إضطرّيت أخِّر القداس تقريباً شي 45 دقيقة، عرِفِت من اتصال إنّو في 5 أطفال لبنانية مسيحية نايمين عَ البحر…!!

أكيد يسوع بدّو رحمة مش ذبيحة..!! القداس فيّي إعملو على 11 ، او عَ الساعة 12.. رِحت جيب الولاد.. عَن جدّ يللي عَم شوفو كارثة..!! فِتنا عَ القداس، بعد شوي بشوف بَي بِحطّ 3 ولاد قِدام باب الكنيسة مسيحية لبنانية وبِفلّ.. 8 ولاد نهار الأحد وما عندي مَطرَح وما عندي تخت ولا شي..

ما بَعرِف قول لاق.. بس بَعرِف بس قابِل الله: رَح يقِلّي كِنت مِلتهي بأمور كتيري، همّك يقولو عنّك: مَيتَمَك أهمّ ميتم.. ومنظّم أهم تنظيم.. ومركز الخِتياريّة أهمّ مركز… المهم ما جيب ناس الأ عَ الإيتيكيت..!! يعني بالعربي المشبرَح أكترية الجمعيات بلبنان بِتنقّي الأشخاص عَ الطَبليِّة..

• أهم شي يكون عندُن وراق
• أهم شي ما يكون عندُن مشاكل
• أهم شي يكونو مَعروفين..

لاق جمعية “سعادة السما”، بتاخُود الشخص اللي ما عِندو حدا.. بَدنا نفكّر إنو بكل شَغلة عَم نِعمِلها هيدا يسوع… وبكرا يسوع رَح يِتقيأني..!!

السبت مبارح الساعة 2:45 بالليل، بدِقّو من القضاء، الدولة بتِعمل مداهمة عَ “الدورة”، بياخدو الموجودين بالبيت، وبيِنتَرك طفل عمرو 3 سنين إسمو يعقوب.. سميّتو طفل يسوع، أدْ منّو حِلو..

قانونياً بنا نِنطُر  حتى يِطلع تاني نهار، ومحكمة وقضاء الخ… نِشكر الله اليوم في قضاء ما بيِعتل هم الوقت.. مُلتزِم بالكنيسة.. وفي أشخاص كتير رائعين، بِفكرو إنو الطفل لازم يكون بمؤسسة او بعيلة..!!

هودي يللي عِملتُن جمعية “سعادة السما” بأسبوع.. غيرُن في كتير أمهات نايمة عَ الطريق أو خِتياريِّة أو أطفال..

دعوة

بِدعيكم اليوم تفكرّوا، إذا بَدكم تِعملو عيد ميلاد أو عمادة.. أيّا هوّي أحلى.. ما أنا منّي بحاجة لهديّة.. مش أفضل نبدُل الهدية بتياب لخِتيار او دوا لجاري، أو خبز لعيلة مش قادرة.. أو بدل إيجار لعيلة مش قادرة.. أو لَ طفل حتى نعَلمو.. لأنو رَح يكون يوماً ما مهندس او حكيم أو قديس.. وما رَح يكون مجرم ولا مُنحرِف ولا بالسجن..

مَحَل عزيمة عَ الأرغيلة كل جمعة او سهرة أو سينما نِبدُل هالإشيا ونقول: نساعد بقسط تلميذ بالمدرسة بالسنة بِ 580$.. كنّا آخدين 2000 طالب، صار عنّا 2400 تلميذ، و600 تلميذ بحاجات خاصة.. يعني صار عنّا 3000 تلميذ..

بالنهاية أشكر ربّي على كِلشي.. ولا مرّة بخَطِّط أبداً.. أنا بسَلمو وهوّي بيِعمُل كل هالمشاريع.. لنصلّي اليوم عَ نيّة “Ave Maria” ومؤسسها الأب مروان خوري، والأب مارتن، وأبونا قزّي.. والرهبنة المَريميّة والرهبنة اللبنانية، وكل الأشخاص بهالقداس..

آمين.

نؤمن بإله واحد…