الأب مروان خوري: جهنّم بمليارات الشياطين لا تغلب مؤمن والروح القدس هوّي “الأكسيجين” بدونه لا حياة.. (Audio)

– تساعية السلام تبدأ 15 حزيران لشكر العذراء.. وكل أقضية لبنان لكِ يا أمنا..
– رصيد لبنان قديسيه، صلّوا لبونا أنطون ليُرفع عَ المذابح…

***

مقتطف من عظة الراهب المريمي الأب مروان خوري “الروح القدس يعزّي ويُبكّت” قداس السلام في دير القديسة تريزيا الطفل يسوع – سهيلة: (4 حزيران 2018)

أبائي الأفاضل، واخوتي الأحباء.. بداية في حدثَين بحبّ أشير اليهم:

(1) 

تبدأ التساعية “السلام” من أجل لبنان، والتي بدأناها من سنة 2003، وكان الثمار وفيرة لبلدنا لمّا إستدعينا العذراء اللي حاملي سلام يسوع.. وفعلاً هالأم سِمعت ندائنا، ويللي وصلنالو ببلدنا رغم البراكين المحيطة، الفضل الأول للعدرا.. ونحنا ما زلنا بذكرى ظهوراتها بمديوغوريه نُعيد هيدا التكريس لقلبها الطاهر، ونطلب حمايتها الدايمة، واهمّ شي تَعطينا ياه حكّام مش فاسدين، حكّام صالحين..

تساعية السلام تبدأ بِ 15 حزيران (يوم جمعة) والجميع مدعو للصلاة للعذراء وشكرها لما فعلته معنا.. وتبدأ الساعة 6 مساءً بصلاة المسبحة، ومن بعدها الساعة 7 يبدأ القداس. ومن ثمّ السجود للقربان المقدّس.

ومن يوم 15 حزيران ولمدة 9 أيام ستكون الصلوات مستديمة في كنيسة مار الياس أنطلياس، وتنتهي التساعية بِ 23 حزيران نهار السبت، وتُختتم التساعية بذبيحة الهية، وبتكريس كل أقضية لبنان لقلب العذراء مريم. وصلاة المسبحة ستُصلّى طيلة التسعة أيام..

وفي 25 حزيران يوم الإثنين، سنعيد التكريس لجماعتنا في دير القديسة تيريزيا الطفل يسوع في السهيلة.

(2)

بذكرى مرور 20 سنة على وفاة الحبيس أبونا أنطون طربيه المريمي، في مسيرة درب الصليب في وادي قنوبين، وتنتهي بذبيحة القداس بالمحبسة عند ضريحه. ونأمل إعلان قداسته، لأنّو المؤمنين إذا صلّوا، الرب يُظهر قداسة الشخص، وهيدا هوّي رصيدنا بلبنان.

حماية لبنان بقديسيه: مار شربل، رفقا، الحرديني، الأخ إسطفان، بونا يعقوب.. هودي مفخرتنا بلبنان. وإذا العالم بيَعرفونا هوّي من وراء قديسينا.. بعدنا راجعين من مديوغوريه، إسم مار شربل صار “ملَعلَع”.. وهالراهب ما ضَهَر من مَحبِستو، وبس بِشوفونا، دغري بدلّو علينا “مار شربل”.

العالم عَم يحاول يحطّم هالبلد ويِعملو بلد إرهابي، وقديسينا عَم يِرفعولنا راسنا، وعَم يبيّنونا إنو نحنا شعب منحبّ الله، وشعب مؤمن..

من هيك بدنا نصلّي حتى الرب يكتّر قديسينا، وإن شاالله بونا أنطون يللي دعواه صارت بروما، يكون شخص يُضاف الى مسيرة القديسين في لبنان، ونصير نِفتخر فيه طوباوي على مذبح الكنيسة.

رَح يكون في 3 مسيرات: الساعة: 8 ، 9 ، 9:30 .. وتنتهي بالدير بقداس الساعة 9  و 11 صباحاً ، وبعدان في قداس الساعة 1 الظهر، وقداس 5 بعد الضهر، بمحبسة الدير بالوادي المقدس.

*♱*

العنصرة

نحنا دخلنا أحبائي بزمن العنصرة حتى عيد الصليب. وهيدا زمن لازم كتير نصلّي فيه، لأهمية الروح القدس، وأنا أسمّيه “الأكسيجين” تبعنا..

بلا الروح القدس ما حدا بيِقدر يعيش وصية يسوع بالإنجيل، وما حدا بيقدر يعيش الفضيلة. بلا الروح القدس نحنا نصبح متفرجّين، مع الروح القدس نصبح شهود ورُسل. مش منِنقُل كلمات وخبار، بتصير كلمتنا ذات سلطان وحق، وبِصير في تبدّل، وتغيير للقلوب…

مار بطرس، يللي هوّي صياد سمك، هرب عند الصليب… عِمِل وعظة من بعد العنصرة (سَطرين) بِقول أعمال الرسل، عن صياد سمك، أكيد مش عَم يِحكي بسِلطانو ولا حِكِمتو :

“يا شعب اسرائيل ، يسوع الذي صلبتموه ، وعذبتموه وقتلتموه ، قد مات ثمّ قام ، ونحن شهود على ذلك“.

وكان قد أقام مكَرسَح عن باب الهيكل، ووقفّو حدّو.. وفَرجاهُم إسم يسوع وسلطانو شو بيعمل..؟؟ وبقول أعمال الرسل بوقتا، تعمّد 3 آلاف إنسان…

بيِحكي يسوع عن الروح القدس وأهميتو، يقول: من دونه ما منِقدر نِشعر بحضور يسوع معنا. إذا بتِحسّ أوقات جافة العلاقة بينك وبين يسوع، وعَم تصلّي كأنو الله مش حاضِر.. رجاء خاص إترك كلشي، وبلّش عيّط للروح القدس..

الروح القدس هوّي الوحيد يللي بخلّيك تلتمس وتختبر يسوع معك، وحَدِّك، وبِقَلبك.. وما توقّف تصلي الاّ ما يغيّر مشاعر البرودة بالإيمان..

يقول يسوع للرسل: الآن انا ذاهب الى من أرسلني، ولأني كلمتكم أني ذاهب ملأ الحزن قلوبكم.

كنّا بمديوغوريه، هالأسبوعين السابقين، وعناية الله شاءت إنّو نِجتمع مع الرائية “ميريانا” بلقاء خاص.. رِجعِت ردّدت الي، على مسامعي “أبونا” أكبر ألم الي، وقت العذراء تظهر وبتفِلّْ..

هون بِقدر إفهم الرسل، شو معنى عَم يحِسّوا يسوع فالِل من بعد ما يكونو إختبروه… على الأكيد ما رح نحسّ هيك، لأنو بعد ما إختبرنا هالشي.. ولكن بس نِختبر حضوره، رح تعرفو شو ألم غيابو.. وهيك منِفهم أكثر كيف مريم المجدلية جنّت، وما قادرة تعيش دقيقة من دونو.. تركت العالم والرسل، وتحدّت قرار تبع امبرطورية روما، ووضع حراس رومان.. ما كان فارقة معا تموت.. وراحِت على القبر..

ولمّا ما شافتو بالقبر، راحت تبحّش بالتراب وتصرخ “مين أخد حبيبي، مين أخد معلمي”.. حضور الله فينا ومن ثم خسارته أمر مفجع..

بتعرفو ليه منِزهَق بالكنيسة..؟ لأنو الروح القدس مش عَم نستدعيه.. قلّن الرب للرسل، إنّو رح يتركُن بالجسد، وسيُكمل حضوره بالروح القدس.. لذا من لم يَنل الروح القدس لا يستطيع أن يعرف يسوع ويؤمن به.

عندما نقرأ الإنجيل بعقلنا، تصبح أخبار تاريخية وجغرافية عِمرها 2000 سنة. لكن مع الروح القدس نقرأ عن الله الحَي الذي يحبني..

نحنا بحاجة للروح القدس، حتى تتغيّر قَعدِتنا عَ “البنك” بالكنيسة، حتى ما صير عِدّ الدقايق.. ميريانا رائية مديوغورية، تقول، عندي بِنتان ، بِقتُل حياتي كِرمالُن. أجمل ما عندي هَالبنتين. بس لمّا تظهر العذراء بحِسّ إنّو مع ولادي بطّل عندي علاقة…

بِفكرّوني الناس بس عم إبكي.. كأنو العدرا فَرجِتني شي حدث مخيف.. ما بيفهمو الألم يللي أعيشه، إنّو العدرا فَلِّت، وبطلّت هون، وميريانا ما بَدها تِرجع على الحياة.. وقالتلي: لولا الصلا ، يومان وأوقات أسبوع، ما بِتحمّل إقبل إنّو رجِعتْ عَ الأرض..

وهلق بس نقول الكلام الجوهري، يسوع رَح يِحضر.. أهمّ من ظهور مريم.. كل مرّة نقدس حضور الله الحي حاضر.. ولكن منِقعد متفرِّجين، وفي ناس بياخدو القربان، وبضلُّن رايحين..!!

ليه؟؟ لأنو مش عَم نِسمح للروح القدس، ان يُدخلنا للإختبار..

مواهب الروح القدس

الحكمة، ويعني المعرفة.. ونحنا منفكّر إذا معي شهادة دكتوراه، يعني أنا صِرت عالِم.. بس كل حكمة هيدي الدنيي ما بِتوازي حكمة هيديك الدِني.. حكمة السما غير حكمة الأرض.

مار بولس بس كان رايح أسير على روما، كانو بدّن يطلعو بالسفينة، كانو خايفين من العواصف. دَرس القبطان وضع البحر، وبحكمة الأرض، قالو: لازم نِمشي لأنّو الريح آتية من الجنوب، وكان بحينه أيام صوم اليهود، يعني متجهين على الخريف.. (هيدي حكمة الأرض) ؛ ولكن مار بولس ركع وصلّى، وقلّن: أنصحكم الاّ تُقلعوا بالسفينة، لأن هذا السَفر سيعود ليس بالخطر على السفينة بل على أنفسنا أيضاً…

ولأن قائد المئة كان يَميل الى ما يقول القبطان أكثر مما يقوله بولس، سافرو… ودخلو بدوامّة زوبعة 15 يوم، ما شافو فيها نور الشمس..

حكمة الأرض تعطيك رأي خاص، ولكن إذا بِتصلّي.. الرب يمكن يكون عندو رأي غير ولصالحك أكيد.. ميشان هيك بس بدّك تقرّر صلّي للروح القدس.. نحنا بس نوقع بمشكلة منِركض لعند الجيران، والأصحاب، ومن هاوية لهاوية ، ومتل ما بِقول يسوع بالإنجيل: أعمى يقود اعمى، فيقع كلاهما في حفرة..

الفهم: الروح القدس يعطيك أن تفهم ما يريد الله منك، وأن تعمل به. يعطيك روح العِلم.. أن تدخل الى اسرار قلب الله، وتفهم حقيقة وجودك.. وهويتك ومشوارك على الأرض، حتى تفهم أبعاد الأحداث التي تحصل بحياتك..

في أحداث تحصل، ومنروح ندق باب الكبير والصغير، بدّك تَعرف ليه..؟؟؟ وما حدا بيقدر يعطيك الجواب..!!! ليه فلان مرِض..!! وليه فلان عَم يتجرّب..!! ليه فلان عندو مصايب..؟؟؟ إذا نبشنّا بكتب الأرض، مهما تكون متعلّم ومعك 20 دكتوراه، ما بتِقدر تعرف الجواب…!!!

إذا اتكلنا على الروح القدس سيُعطينا العِلم لنفهم بُعد الأحداث.. ومن الروح القدس وحده نأخذ العلم الحقيقي.. بالفيزياء والكيمياء نستطيع فكفكة الحدث، بس لنفهم ليه صار الحدث، بدنا “روح القدس”…

التمييز: أن نميّز الخير عن الشر.. ونحنا كتير بحاجة الها.. أوقات منوصل على مفترق طريق، شو منِعمل… صلو للروح القدس؟؟

القوة: يا ما الشيطان يتَمرجَل علينا بالخطايا وبالتجارب.. وما منِقدر نوقف بوجّو.. الروح القدس يعطيك القوة والسلطان، ان تكسرو بحياتك باعادة سلطان الله عليك…

مخافة الله: الروح القدس يعطيك القوة حتى تحبّ الله من قلبك. وتحرّر قلبك من كلشي منّو من الله.

التقوى: لكي نصبح أتقياء، وروحانيين، ومتحررين من الأرض وماديتها.. وقلبنا بصير معلّق بيسوع وبالسما..

من دون روح القدس ما فينا نعيش الفضائل المسيحية، لأنو بس نِسمع يسوع بقول: أغفر لأعدائك وسامِح، ومن طلب أن تمشي معه ميل واحد، إمشي معه ميليَن.. ما بتقدر تعيشها دون الروح القدس.. وهيك كل شخص يأذينا منصير نشفُق عليه.

نحنا بحاجة للروح القدس، لنولد ولادة تانية…

لكن أيضاً بالإنجيل سمّاه يسوع، الروح الذي يبكّت. يربّي.. ويبكّت على :

• الخطيئة،
• البرّ ،
• الدينونة.

مش عَ طول روح القدس بِغنّج.. ومش عَ طول بيعطيك الفرح والسلام. الله متِل الأم والروح القدس روحه. الغنج بيِنزع.. في مطارح الأم بدها تكون حازمة مع أولادها. والبَي أوقات بدّو يكون بقراراتو في قصاص.. بس القصاص مش حتى يكسّر بإبنو أو يحطمّو.. لأنو فيشي غلط، ويجب أن يتصلّح…

من هيك روح القدس يبكّت العالم بداية على الخطيئة.. واوعا تفكرو إنّو بتِقدر تحسّ حالك خاطئ، إذا ما فيك روح الله. ميشان هيك نصطدم بناس يقولون: ليه بدّي إعترف؟؟ أنا مِش عامِل شي…!!

إختبار

مرّة إجا لعندي شخص، كانو عَم يقنعو بدّك تعترف.. طلبو منّي عرّفو حتى يقرأ خطاياه.. أوّل ما قعدت معو، سألتو شو عندك..؟؟؟

قلّي: مَا فيشي..!!

جربّت إفتح الحديث.. فسألتو إذا بِقدر أعطيه طَلَب، فقبِل.. فعطيتو صلاة روح القدس (صلاة مسبحة روح القدس) وقلتلّو: صليها… وقول: يا روح الرب، يا نور الرب ضوّي بقلبي، وخليّني شوف البشاعة الموجودة فيّي..

راح وراجع لعندي بعد أسبوع، معو 14 ورقة كاتبهم.. وما بقا يِسكتْ..

بدنا نطلب مساعدة الروح القدس.. لأنّه يبكّت العالم على الخطيئة، لأنو الذين لا يؤمنون بالمسيح.. لا يستطيعون أن يخرجوا من خطاياهم الاّ بقوة دم يسوع وبكرسي الإعتراف…

الروح القدس أوّل شي يقودك للإيمان بيسوع، ثم الى التوبة.. ولأنو الخطيئة لا تُرفع حكمها عنك، لو ندمت عنها 100 سنة، الاّ ما تروح تحت إيد الكاهن يللي بيِحمُل دم يسوع.

من يرفض يسوع إنّو مات من أجل خلاصك، وكإله… لن تُغفر خطاياك. “يبكّت العالم على الخطيئة، لأنهم رفضوا خلاص يسوع.

يبكّت العالم على البرّ.. “لأنّي ذاهب ولم يرونني بعد الآن”.. لأنو كل ما نقرأه بالإنجيل.. إذا بدنا نعيشهم، بدّك تصلّي للروح القدس حتى يَعطيك القدرة أن تعيش الفضيلة والبرارة.

يبكّت العالم على الدينونة.. لأن سلطان هذا العالم قد دينَ..

ممنوع بقا نِحكي، وأنا أوقات بِزهق من حالي أد ما بِحكي مع ناس، بيجو لعندي، ما بيحكوني الّا بالشيطان..

ممنوع بقا نخاف من الشيطان. الشيطان قد أدين. وإنكسر.. وإذا عَم يِرجع الو قوة لأنّ خطاياك عَم تغذيّه. لكن أنت استعيد التوبة بالغفران، واستعيد علاقتك مع يسوع. الشرير لا سلطة له على المؤمن. بِحرتِق عليك، متِل الموج عَ السفينة.. مش أكتر…

بِجَرِّب إنّو يهدّدك.. إذا خِفت، ونسيت إنّو بالسفينة في يسوع.. إيه ساعتها رح تِغرق، ورح تتلبّك.. لكن تذكّر الشيطان أكثر من موجة ما بيقدر يِعملْ.. قد أدين، وممنوع نعطي سلطة للشرير.. كل السلطة والمجد ليسوع، انه صاحب القدرة..

من يؤمن بالمسيح، ويتناوله، ويعترف، وبرفقة امّو.. جهنّم إذا بتحطّ راسها فيك بمليارات الشياطين لا تغلب مؤمن… والمزمور الذي نصليّه: إني وإن سلكت في وادي ظلال الموت، فلا شيء يؤذيني”… هودي مش كلمات لترتيلهم فقط، علينا أن نتأمّل بهم..

كل المجد ليسوع الى أبد الآبدين..

رصد Agoraleaks.com