العَونية يهتّون القوتجية..!! 👈 ليه…؟؟ 👈 وكيف تُلملم الجراح..؟ 👈

ضجّت وسائل التواصل الإجتماعي والرسائل النصية الـ”whatsapp” أمس بردّ العونيين على دعوة رئيس القوات اللبنانية سمير جعجع الى شراكة كاملة في الحكومة بين التيار الوطني الحرّ والقوات اللبنانية، كما هي حال التكامل بين الثنائي الشيعي حركة أمل وحزب الله..

وبعيداً عما ساقه العونيون بحق جعجع، المسألة تفرض ضرورة ترميم نظرية “أوعا خيّك” بالفعل والقول.. سيما وأنّ ذلك جاء بعد اتهام القوات اللبنانية للتيار الوطني الحرّ بالفساد قبيل الإنتخابات النيابية، ما جعل الشرخ يزداد بين الفريقين.. وممّا ساقه العونيين على جعجع، ما يلي:  

***

لما بدك تحكي بالثنائية الشيعية وتتمثل فيها بدو يكون عندك حد أدنى من شي بيشبهها.

الثنائية الشيعية ما بتغدر ببعضها..
ما بتحارب وزراء بعضها..
ما بتعمل اتفاقات من تحت الطاولة ضد بعضها تا تخوزق بعضها.

بال ٢٠٠٥ راح الجنرال بعد عودتو من المنفى زارك
بسجنك لما حلفاءك استحيوا فيك وما حدا منهم زارك. قلك بوقتها خلي التاريخ يكتب الماضي وينصف الحقيقة بس خلينا نتحالف لمصلحة المسيحيين.

كان جوابك لأ أنا متحالف مع المستقبل وركب التحالف الرباعي وضحكوا عليك بكم مقعد.

بعد الانتخابات انت شاركت بالحكومة..
الحكومة يلي ما شارك فيها التيار وكان حاصد أكتر من ٧٠% من أصوات المسيحيين بشهادة البطرك صفير.

انت شاركت، وكيف؟ بوزير واحد للسياحة هو دجو سركيس…؟؟؟
هيدا التمثيل المسيحي يلي رضيت فيه وما رضيت بميشال عون حليف.
انت رضيت بميشال سليمان رئيس للجمهورية وما رضيت بميشال عون من بعدها.

كنت ترضى بالفتات من وزارات او مقاعد نيابية يعطوك ياهُن الحريري و جنبلاط وما رضيت بميشال عون.

بقانون الانتخاب…
لما كان عنا فرصة ذهبية لتحقيق المناصفة
انت غدرت بالمسيحيين وللتاريخ انسحبت من تأييد قانون اللقاء الأرثوذكسي كرمال ما تزعل المستقبل والاشتراكي على حساب المسيحيين وروحت على المسيحيين فرصة تاريخية.

عملنا معك تفاهم معراب…
وأيدت وصول الجنرال عبعبدا.. وعطيتنا ٨ أصوات نيابية…
بس المهم عأساس نطوي صفحة الماضي.
فوتناك عالحكومة بحجم الكلّ ما قبلان فيه وأخدت 3 حقائب ووزير دولة وموقع نائب رئيس مجلس وزرا..

شو عملت ؟ جندت هودي ذاتهن ضدنا.
وزراءك ما عملوا ولا اي إنجاز وكل شغلهم كان عرقلة مشاريع وزراء التيار وتعطيل أي إنجاز للعهد.
طعنت سعد الحريري بالضهر وبعت حالك للسعودية تا يعملوك زلمتهم بلبنان وقعدت ناطر جثة سعد على ضفة النهر.

حملتك الانتخابية كلها بنيتها ضد التيار…
وما خليت تهمة فساد وصفقات وإشاعات إلا ولزقتها بالتيار. زادت كتلتك بفضل قانون انتخابي صنعو التيار الوطني الحرّ ورئيسه جبران باسيل لحسن التمثيل..

بدل ما تشكرو صرت بدك تقوص عليه وتعمل حالك بحجم التيار وال١٥ قد ٢٩.

منتذكّر شعارك الشهير “الجنرال بيمون”، ما تشبه حالك بالثنائية الشيعية يرضى عليك. و اذا فكرك تاخود وزارات على حساب التيار متل ما حركة امل عاملة بحزب الله بتكون غلطان كتير بالعنوان.