شاب يسرّب صرخة طوني أوريان بالفيديو: شوفو قديه صرنا بلا رحمة وقلب.. (Video)

– من منكم بلا خطيئة ليعيّرها.. 

***

سرّب أحد طلاب المناضل طوني أوريان مقطع فيديو  يظهر فيه إنتقاده الشديد لحالة الإنسان المعاصر المعفنّة الذي لا يحترم حتى الموتى، وذلك بعد وفاة إحدى المتسولات من ذوي الحاجات الخاصة:

• ما كان في حَدَن يقول: هيدا الشي غلط، بهَل كم يوم قَطَعو.. ما منِقرا الاّ ناس عَم تِشمت، او تنكّت.. ايه رايحين نِعمل شحادين، حتى نطلّع مصاري..
• قديه قلب العالم صار قاسي.. قبل ما نِحكي بالتفاصيل، أبشع شي إنّو شخص توفّى ، عم نِتداول صورتو هوّي وميّت بالإعلام.. في حِرمة للميّت، لازم نستحي.. مين ما كان يكون..

وإذا حكينا بالتفاصيل

يِنشرو قصتتها، ويجيبو وراق من البنك إنّو هيّي قديه مجمعّة ثروة.. قبل كلشي، حتى لو شخص توفّى ، منقول “المرحوم”.. يعني كم كلمة رحمة..

يعني بس ينتقل حدَن لعند ربنا، عن وعي أو لا وعي، نقول: مرحوم، يعني راحمين.. يعني مسامحينو لكلّ غلط يكون عملو تجاهنا..

ليش؟؟

لأنو ربنا بذاتو هيك علّمنا.. ولأنو ربنا كمان بِسماحنا.. وبالأبانا بأهم صلاة نصليّها، نطلب من الله يسامحنا متِل ما نحنا مفروض نسامح غيرنا…

بس حدا يتوفى، مِنقول مرحوم.. يعني نحنا مسامحينو، لأنّو نحنا كمان خطأة.. كلنا خطأة ومنّي وجِرّ… كلنا معرضين إنّو نِخطي ونغلط بحياتنا.. ما عدى اللي بيوصل لمرحلة القداسة (وهيدا إستثناء)..

هلق نحنا منِغلط، ومنِخطي.. هلق مين أكتر من مين…؟؟ ما فينا نعيّر.. ربنا دخيل إسمو ما بِعيّر..؟؟ لأنّو مجرّد ما الإنسان يِندَم ويِركع قدام ربّو ، ربنا بِسامحو..

مين نحنا حتى ندين الناس اللي ماتِت..!!

مين نحنا نحنا حتى نعيّر إمرأة مش قادرة تدافع عن حالها عَ وجّ الأرض، إنتقلت صارت بأحضان الرب..؟

قاعدين نحاسبها، ونشوف شو عندا حساب من البنك، وشَحَدِت من العالم، وكذبّت على العالم.. وما بَعرِف شو عِملِت..؟

الإنسان هوي بريء حتى يثبت العكس، هيدا هوّي وعايِش.. (قرينة البراءة).. كيف بقا شخص ما بقا موجود قدامنا وانتقلت روحو، وقاعدين نحاكمو.. شو بعرفنا شو الأسباب حتى تِعمِل هَيك.. حتى نقول عاملِة غلط..؟

شوفو قديه صرنا بلا رحمة، وبلا قلب.. وبدنا نصلّي الأبانا ونقلّو لربنا، سامحنا متِل ما عَم نسامح..

مش إنّو مش عَم نسامح.. ما عَم نِرحَم الموتى.. لو كان عدوكم، ما لازم تشتمو بالموتى، لأنو وقت بيِنتقل، ربنا هوّي بيصطفل فيه..

تخيلّو وين نحنا صرنا.. مين منّا بلا خطيّة.. حتى يِرجمها حتّى وهيّي وميتة..!!

كانو يرجمو الشخص هوّي وعايش.. معقول هوّي وجثة يرجموه..!!

https://www.youtube.com/watch?v=k7mhxjGgY-Q