سيمون أبي رميا: حلمُن رح يكون كابوس بِ 6 أيار والطاووس رح نردّو لحجمو… (Audio)

– جبيل ما بدها مال و “Mall” جبيل عندا الكرامة..

***

كلمة النائب سيمون أبي رميا المرشّح عن التيار في قضاء جبيل، في مهرجان لبنان القوي 2018

يا شعب جبيل وكسروان الحر..

أنا راجع.. مش لأعمُل نايِب.. أنا راجع لضلّ مواطن متِل كلّ واحد منكم ، مناضل…

راجع لكمّل مسيرة، بلشّت بـ18 أيلول 1988، لمّا صرخ قائد المسيرة، مؤسس تيارنا، واطلّع بكل وجّ وقلكن: إنتو شعب لبنان العظيم..

راجع، من أجل كل التضحيات، وكل الشهدا، يللي حَطّو دم لنضلّ كلنا أحرار، وراسنا مرفوع..

أوليتنا العيش الكريم.. وبدنا بجبيل نأمّن

• الإنماء،
• المياه ،
• المواصلات ،
• السياحة،
• الثقافة ،
• المهرجانات ،
• الكهربا ،
• الصرف الصحّي ،
• الجامعة اللبنانية ،
• المعاينة الميكانية…

كل مشاريعكم رح تتحقّق لأنكم إنتو تنتمون لتيار بحقّق المعجزات…

جايي من ضيعة بسمّو ولادا “دِب إهمج” ، وبكل فخر دباب إهمج، كانو أوّل من كانو ببيت الشعب وكسرو الجرّة قدام العماد عون.. يا ريت خلّونا الجرّة ، وخلّولنا اللي فِيا ، كان ضلّ معنا شوية مصاري ، لنواجه المال الفاسد.. والمال الإنتخابي ، والرشوة ، يللي اليوم عَم يشترو فِيُن الضمائر والأصوات…

جبيل ، ما بدها مال ، وما بدها Mall ، جبيل الكرامة ، والسيادة ، والحرية ، والتيار الوطني الحر..

معالي الوزير قلتلنا من شوي ، إنّو البالون لمّا يِنفخ كتير ، بالدبوس بِتنفسّو … بطمّنك ، الأحجام ستعود الى طبيعتها بِ 6 أيار ، ومعروف إنو الطاووس بيِنفُخ ريشو ، و بِ 6 أيار رح نردّو الى حجمو… والطاووس بغيّر لونو.. وأنا لوني هوّي هويتي ، هوّي لون التيار الوطني الحر…

أحبائنا ببعبدا في جبل مارد، وصخرة.. بس طمنّو بالكم بِ “بيبلوس” في تصغير لجبل، هيّي جبيل، وجبيل هيّي:

• سيمون أبي رميا
• وليد خوري
• ربيع عواد

طمّن بالك معالي الوزير “جبران” لأنك توجهّت لأهالي، وقِلتلُّن “دخيلكم”.. نحنا مِنقلك: ما تخاف بجبيل في تيار وطني حرّ… إجريه بالأرض ، جبينو مرفوع ، وراسو بالسما…

ولأهلي بجبيل، مِتل ما التحرير كان حلم وصار حقيقة، ومتل عودة العماد عون كان  حلم وصار حقيقة، منوعد جبيل ولبنان، إنّو جبيل رح تضلّ الحقيقة الثابتة، والراسخة.. ونحنا قلعة عونية وفية للوزير باسيل ولرئيس الجمهورية العماد ميشال عون..

رح نقول للآخرين ، حِلمُن ما رَح يضلّ حلم، و وعد لأهالي جبيل ، حلمُن يضلّ كابوس ، لأنو رح يشوفو بِ 6 أيار إنو نتيجة 7 أيار رح تأكّد إنّو جبيل قوية وعونية ومع التيار الوطني الحر ورئيس الجمهورية..

رصد Agoraleaks.com