باسيل من زغرتا: رح نِجاوب الحقد بالمحبة.. وما رح نخلّي الوطن يِغرق بالأحقاد.. (Audio+Video)

– قرارنا بلبنان. و 6 ايار، جايي وزغرتا – الزاوية الجديدي رح تتمّ

***

كلمة رئيس التيار الوطني الحرّ جبران باسيل في زغرتا: (29 نيسان 2018)

أهلي بزغرتا – الزاوية، رفاقي بالتيار الوطني الحر، بحركة الإستقلال، وبتيار المستقبل..

الواحد ما بيِقدر يِجي يوقف على الأرض الطيبة، يوقف قدامكم، وبيناتكم، الاّ ما يفكّر بكبار من هالمنطقة، عَطيتُن المنطقة لكلّ لبنان..

تاريخ لبنان بدِين لإلُن.. تاريخنا وعِزتنا وشرفنا، وكرامتنا مُرتبط بأساميُن.. كبار كتار، وشو بدنا نعِدّ لنعِدّ.. منِذكر: يوسف بك كرم ، العلامة البطريرك اسطفان الدويهي المكرّم ، العالم الأب يوسف يمين ، العلامّة جواد بولس ، الرئيس سليمان فرنجية ، الوزير الشهيد طوني فرنجية ، الرئيس الشهيد رينيه معوض.

كبار عَطيونا اليوم إنّو نِبقا على هالأرض. يوسف كرم اللي واجه الاحتلال ، واجهو ورفض إنّو شعبو يِركع أو يِنذلّ للمحتل أو الأجنبي..

البطريك الدويهي يللي أعطى للمشرقية وعمقها، وأسّس سنة 1666، بحلب المدرسة المارونية، وإجا من بعدو الرهبنات، وكونّت بأماكن واماكن، وصولاً للرهبنة المريمية..

هوّي اللي كانت حياتو صعبة. وعاش الوِشايات بالفاتيكان لأنو حبّ وطنو وأعطى أرضو، تضايقو منّو الصغار، وصَعبولو حياتو ومهمتو، بس بقي ووصّل معو رسالة لبنان.

العلامّة جواد بولس، هوّي اللي قال: إمبرطوريات القوة كلها زالت وبقي لبنان 6000 سنة حضارة واقِف وما مات..

منحكي عن رجالات من التاريخ القديم، لَ نعرف قديه تاريخنا بهالمنطقة قديم. ولنقول إذا بدنا نكرّم شهدائنا، يللي راحو من أجل المنطقة ومن أجلنا.. ما بيِسوا بهاللحظة الا نكون على مستوى شهداتهم.

نحنا ما فينا نكون خصوصي بهالمحلّ، الاّ ورثة لشي كبير، نُحافظ عليه بكِبر مشروعنا، وكِبِر فكرنا.. ننحني اليوم قدامكم، وقدام تاريخ زغرتا، وعظماء زغرتا وشهدا زغرتا، ومِنقلكم إنّو منعرف قديه إنتو بِتحبّوا.. والمشكلة قديه بتِحبّو.. والله يستُر اللي ما بتِحبّو..

بتِحبو من قلبكم، وبتعطو من قلبكم. ميشان هيك إنتو جزء أساسي من هالمشروع، ومن هيدا الوطن.

نحنا التيار الوطني الحر، جزء من نسيج زغرتا، ومن عائلات زغرتا، مِنشوف حالنا فِيا وبعائلاتها. بس نحنا كمان جزء من هيدا الوطن، ومن مشروع أكبر إسمو لبنان.

لبنان أكبر منّا كلنا سوا… لبنان أكبر من زغرتا، وزغرتا أكبر من عائلاتها.

مِنشوف الوطن، اكبر من العيلة. بس ما مِنشوف الوطن من دون العيلة، وهيي أساسو، ونواة تكوينو..

مِنشوف زغرتا أكبر من العيلة، بس ما مِنشوف زغرتا من دون العيلة.

مِنشوف لبنان أكبر من زغرتا، بس ما مِنشوف لبنان من دون زغرتا.

نحنا التيار ضحينا بحالنا بزغرتا، كرمال لبنان. وهيدي قليلة على لبنان. بس ضحيّنا من أجل ناس يكونو عَم يشاركو معنا بمشروع أكبر. مش ميشان نِترك زغرتا يصير اللي فِيا اللي صار فِيا، لا فينا ولا بأهلها.. نحنا ولا يوم نِلغي حدا. بس ما منِقبل حدا يلغينا..

اليوم عَم تِرجع زغرتا تلاقي حالها، وتوازنها. اليوم عَم يِرجع التيار على زغرتا يلاقي حالو، وشخصيتو فيكم. بكل واحد منكم. حتى يِرجع يِلعب دورو.. وحتى يقول على مستوى الوطن كلّو سوا..

يلّلي رفض الهيمنة والتسلّط بلبنان، مش قليل عليه ، لا بل واجب عليه يواجه التسلّط والهيمنة بزغرتا ويكسرا، ورح نكسرا…

أنا بدّي قلكم، إنّو مجرّد ما إلفنّا هيدي اللايحة، نحنا إنتصرنا. وانتهت الهيمنة. وبدّي الكم بشكل أكيد. 6 أيار يوم جديد، و7 أيار رح يكون في من لايحتنا بشكل أكيد نايب بزغرتا. وبدنا نشتغل ليكون في عنا نائبين من لايحتنا بزغرتا، وإذا ما قدِرنا هالمرّة، المرّة التانية أكيد.

هيدا الموضوع إنتهى، وخلص. هيدا ماضي بالنسبة النا. التوازن يللي بميّز لبنان بدّو يرجع يميّز زغرتا. اللايحة ونتائج الإنتخابات، بدها تقول رِجعت زغرتا لتوازنها.. هيدا الموضوع ما تفكرو فيه.. النتايج ما تحللّو..

واقع جديد إجا.. حقيقة جديدة وصلت.. ليه؟ وكيف؟ هيدا اللي بدنا نفكّر فيه… شو بدنا نعمل بعد 6 أيار.

الربح تمّ. بس الربح الحقيقي لمّأ منعطي زغرتا شي اللي نحَرمِت منّو قبل. إن كنّا مسؤولين أو لاق؟ ونحنا محلّ منكون مسؤولين مِنقول إنّو نحنا مسؤولين. ومحلّ منكون مقصرين مِنقول إنّو نحنا مقصرّين.

نحنا على طول مِنقول لازم نِعمل أكتر. وهيدا اللي بيِرفع التحدي علينا أكتر. هيدا اللي بخلينا نتأمّل ونتفاءل، انو لما في حدَن بِمثلنا بزغرتا – الزاوية مِتل الوزير بيار رفول، حدا ضحّآ بحياتو كلها من أجل لبنان. عطا كِلشي لسيادة وحرية واستقلال لبنان.

أكيد رَح يعطيها لزغرتا.. بكم شهر عِمل كتير… فكرو بالأربع سنين الجايين شو بدنا نِعمل نحنا وبيار رفول والعهد لزغرتا ولاهل زغرتا.. ومع جواد بولس هيدا الآدمي، وميشال معوض والست نايلة معوض..

مع جواد وميشال، عَم نِحكي أكتر من تحالف إنتخابي.. ومنّو ظرفي، ومنّو ردّة فعل..

نحنا على طول عَم نبّش على شركاء، وكيف فينا نلحّق يكون عنا كتير شركاء.. نحنا مِنساع.. زغرتا بِتساع.. لبنان بِساع… نحنا ولا يوم ما مديّنا إيدنا للكل..

نحنا مِدَّينا إيدنا.. مدّو إيدُن..
هنّي مَدّوا إيدُن.. مِديّنا إيدنا…
مش مهم.. المهم التقت الأيادي..
ونحنا مادّين إيدنا للكل.. يللي ما بدّو يمّد إيدو.. فيا تكن تكون إيدو قصيرة بِمَدتها للناس، او ايدو طويلة على جيوب العالم.. مش مهم هوّي بِكون قرر ما يِمدّ إيدو..

عَم إحكي عن كل الناس ، ما عَم إقصد حدا.. هيدا مبدأ وعنوان.. ويللي ما بِمدّ إيدو هوّي حرّ.. ولأنو حركة الإستقلال مدّت إيدها، واجبنا إنّو نتطلّع لأبعد من مرحلة إنتخابات، ونتطلّع كيف بدنا نِعمل العهد القوي للبنان القوي.. ولزغرتا القوية، ولناس لبنانيين قوايا، ونِشتغل نحنا وياهُن.. مش مهم مين؟؟

المهم النتيجة..!!

شو فارقة معُن أهل زغرتا، مين عِملُّن..؟ المهم شو نعَملُّن؟؟ المهم حياتُن تِتحسّن، وتِتغيّر.. مع حركة الإستقلال كان في عنا فوارق. ورح يضل في عنّا فوارق.. هيدا نحنا، وهيدا هنّي، وهيدا لبنان…

بس اللي بيِجمعنا هوّي لبنان القوي الحر والسيد والمستقل..

أكيد معنا قرارنا ما رَح يكون خارج لبنان. وما رَح نأجرو لحدا.. وما رح نعيرو لَحدا.. وما رَح نعطي ثانية لحدا.. قرارنا على طول النا… ونابع منكم.

مشكلتنا هون منعمل معاركنا بالواسطة، لواسطة حدا، ولصالح حدا.. نحنا معاركنا النا، ولتيارنا، و لبلدنا ولوطننا، ولسيادتنا، ولإستقلالنا، وهودي أغلى شي عنّا.. هودي ماتو من أجلن شهدائنا.. كل واحد على طريقتو.. وماتو من اجل لبنان ليبقى لبنان.

بدّي الكم، إنو نحنا وانتو، ورثة تاريخ كبير.. بس نحنا وَرثونا وطن مفكك، ودولة مهترئة، ورتّونا أحقاد، قتلة منا ناس،وبعدنا عايشين بالنكايات، عَم تِقتل فيكم الأمل للبنان، وطموح الشباب.

كلها سياسات صغيري، ومناكدة، واحقاد ، وشخصنة. وكل واحد بيتطلّع بِشوف بحالو لبنان والعالم، وببطّل شايِف حدا تاني.. نحنا سياستنا ما فيها:

• شخصنة
• حقد
• شعور بشع تجاه حدا

سياستنا كبيري على وسع لبنان، وانتشارو. وفكرنا مشروع وطن.. وولا يوم رَح نِعمل ردّة فعل على حدا.. رح نجاوِب الحقد الا بالمحبة. رح نجاوب مشروع الصغير بالمشروع الكبير.. هيدا نحنا وهيدا البديل اللي نقدمّو..

ولا يوم رَح يِنخدش واحد لبناني بحقد طالع من عنّا.. ولا يوم رَح نئذي واحد لبناني.. ورَح نسببّ الضرر لدولتنا ولناسنا..

يللي بدّو يعيش بأحقادو، بيغرِق فيا. بس نحنا ما رح نِغرق بأحقادو وضغينتو، وما رح نخلّي الوطن يِغرق بالأحقاد، وبالشخصنة.. الوطن بدو يقوم بمشروع الوطن الكبير.

هيدا نحنا.. وهيدا هنّي.. وهيدا الفرق اللي نحنا بدنا نجيبو للمشروع الكبير، وما رَح نخلّي حدا ياخِدنا على مشروعو الصغير..

بدّي الكم، إنّو 6 ايار، وِصل والنصر معو إجا.. وحقيقة زغرتا – الزاوية الجديدي رح تتمّ.. والسؤال أبداً لمين بكرا..؟

بكرا هوّي النا سوا.. لكل لبنان ولكل اللبنانيين، والاّ ما في بكرا..

السؤال مش لمين بكرا.. السؤال بكرا بيشبه مين؟؟ واي لبنان ناطرنا.. لبنان الحرية والسيادة والإستقلال، أو لبنان التبعية والهيمنة والتسلّط.

أيّا لبنان الدولة، أو لبنان الدويلة.. لبنان الرئيس القوي والجيش القوي، والمؤسسات القوية، او لبنان الأشخاص، والمشاريع الصغيري، والدويلات والمزارع…

هيدا هوّي السؤال الكبير، والتحدّي قدامنا وقدامكم.. والوعد اللي بدنا نعطي لحالنا وعلى نفسنا وقدام ربنا، إنّو بكرا يكون احسن من مبارح، لأنو  موجودين وفاعلين، وحَدكم، وما رح نترك حدن من أهل زغرتا..

ما رَح نعمل مشروع فئوي بزغرتا.. زغرتا لكل أهل زغرتا، اللي بحِبنا.. اللي بيستهضمنا، واللي بيستسئلنا.. نحنا الو، نحنا الكم كلكم، حتى نعمل الخير.. وحتى يجي عن إيدنا الخير..

ما رح تشوف عن إيدنا ولا يوم الشر.. الشر مش بقاموسنا.. بقاموسنا محبة أرضنا وناسنا ووطننا.. هيدا نحنا، وعاشت زغرتا الزاوية، وعاش لبنان..

رصد Agoraleaks.com

https://www.youtube.com/watch?v=oMnSUV-QQMs&feature=youtu.be