Agoraleaks Agoraleaks
– البعض ظنّ إنو نِمتو وما رح تقومو، وإنّو نومكم السياسي كان طويل.. فصعبة يِجي تيار سياسي يِعمل فيكُن إستفاقة سريعة… نريد شراكة الأقوياء، وبيروت قيمتها بتنوعها وتعددها..
***
مقتطف من حديث رئيس التيار الوطني الحرّ جبران باسيل في حفل لائحة بيروت الثانية، في لقاء مع المرشّح التيار إدكار طرابلسي عن المقعد الإنجيلي: (قاعة مار الياس انطلياس – 20 نيسان 2018)
حزينين عَم نلتقى بإنطلياس، وهيدا اللقاء بمكانه معبّر. لأنّو يعني إنّو أهل بيروت التانية، قسم كبير منّن فيها.. واليوم عندن فرصة يِرحعو بقلب بيروت، ووجودكم اليوم وفرصتك حتى تِرجعو بصوتكم بقلب بيروت، وبقلب قرار بيروت، وهيدي أهمية الإنتخابات.
رجعت إسمع بهالفترة الحكي عن بيروت الشرقية وبيروت الغربية، وبِعتقد هيدي لغة، وإن كان الها معنى جغرافي، معناها السياسي لازم يكون إنتهى. وأقلّه النا، لأنو ما كنّا سبب بالحرب، وما كنّا الاّ آداة للسلم بلبنان…
لقائنا حتى نِرجّع لحضورنا ميزته الأساسية، وتاريخ بيروت كبير، لأنّو تراكم عليها حضارات.. وبيروت هيّي عاصمة للبنان وللشرق كلّو، وأهم شي فيها، هو التنوّع والتعدد، وما بيكتمل، وما الو طعمة وجمال إذا كا نتو إنتو مزينينو..
عم تِرجعو تكون بقلب الحدث، وهيدا القانون أردناه نسبي، حتى يعطي حقيقة التمثيل لكل الناس. كانو البعض يتغنّى إنّو المسيحيين يتميزون بتنوعهم.. إجا هيدا القانون النسبي، حتى يقول إنو المسلمين متعطشين أكتر من المسحيين حتى يفَرجو عن تنوعهم، وهيدي الإنتخابات بتدلّ على هالشي..
حقّن الثنائي الشيعي او كل الطائفة الشيعية تأكّد على دورها بهيدي الإنتخابات، وعلى موقعها بطريقة ديمقراطية، وهيدا حقها، وهيدي شَطارتها.. وحق الأطراف السنية تقول إنّو بدها تِطلع من الإنتخابات بقلل ضرر مُمكن، ونحنا ما منتمنالا الاّ القوة، لأنو بدنا شراكة مع الأقوياء… ونحنا شريكنا القوي مِختارينو، حتى نكفّي معو مسيرة العهد..
بس كمان حقنا، إنّو نِمنع محاولات إضعافنا، ومحاصرتنا، ونزع الصفة التمثيلية عن العهد…
ونحنا بدنا نقول إنّو هيدا العهد، لكل اللبنانيين، وأول شي ببيروت، ووجودنا ببيروت الأولى والتانية وبكل لبنان.
المسؤولية اليوم عليكم.. عَم نلتقى اليوم حول رسول، عاش كلّ حياتو وهوّي عَم يقدّم رسالة. انا اليوم بدّي قلّو، إنو رسالتو أكبر وأعظم.. لأنو إذا المسيحية هيّي رسالة، ونحنا منعتبرها رسالة إنسانية تخصّ كل البشر، إنما اللي بآمنو فيها يللي بيعتنقوها.. اليوم رسالة إدكار طرابلسي تخصّ كل البيارتة مسيحيين ومسلمين، وكل اللبنانيين..
أنا بَعرف إنو مشاكل بيروت كتيري، من:
- ماي
- مساحات خضرا
- مواقف سيارات
- أزمة سير
- شقق الغالية
ويمكن أسعار الشقق الغالية أبعد قسم كبير من أبناء بيروت عنها، ويمكن الحرب بمرحلة تانية.. ولكن مش المشاكل هيدي اللي أبعدتكم فعلياً عن بيروت..
الأزمة النفسية هيّي السبب الأول، وجعلتكم تِعتقدو إنّو إنتو معكُن أو بلاكُن، بيروت نَفس الشي.. بصوتكم أو بلا صوتكم، النواب بيِطلعو..
اليوم إختلف الوضع، إذا كنتو كتار أنا أؤكد إنّو رَح يكون في نايب يمثلكم، هوّي ادكار طرابلسي بالإنتخابات الجايي.. هيدا الموضوع مأمنين عليه نحنا حسابياً، ومأمنين إنو في حَدَن بيِحمُل المهمة، وواثقين فيه، وبطريقة شغلو وتفكيرو.. وواثقين إنّو عَم نقدّم للبيارتة شخص بيحمُل عَ كتافو كلّ النهار والليل قضاياهُم.. ورضح يروح لعندكم وين ما كنتو بكسروان وجبيل والمتن، وبكل الزنّار حوالى بيروت، حتى يقِلكم رجعو على قلب بيروت.. ورح تشعرو إنّو مش مهم متل قبل إذا صوّت 100 أو 200 مقترع، هالمرة واصِل لأنو كسرتو القاعدة..
48 ألف مقترع، إنتو ببيروت… (أد ما نحنا بالبترون، شوي أقلّ).. وكِنتو عَم تصوتو بين 15-20% بس، لكن اليوم بِكفّي إنكُن توثقو وتآمنو.. وكل واحد منكم يكون إدكار طرابلسي، يروح ينبّش على أهلو ورفقاتو وجيرانو، وأهل حيّو، ورفاقو بالسجل، ويقلُن: فيشي تغيّر لبيروت، تعو نترافق بـ 6 أيار ونحطّ صوتنا لنردّ وجودنا لَ 48 ألف إنسان ببيروت بدّن يتمثلو تمثيل حقيقي..
نحنا اليوم التيار الوطني الحرّ ، عم يِعمُل خياراتو السياسية على أسس جامعة، والتيار الوطني الحرّ جسر تواصل بين كل البيروتيين، وقادرين.. ونحنا مختارين من موقعنا من خلال ادكار طرابلسي، ومن شبكتنا الوطنية مع تيار المستقبل، اللي قايمة على الإعتدال والعروبة، وعلى الدولة القوية، ومن تفاهمنا مع شريكنا حزب الله، اللي قايم على قوة لبنان، وحمايتو ممناعتو بوجه الإعتداءات عليه.. نحنا اللي قادرين نربط أهل بيروت ببَعضُن، وهيدا النايب لو كان وحيد رح ينجح بالدائرة التانية بدنا نتكّل حتى يِجمع البيروتيين، وحتى وين في فواصل بيناتُن بدّو يهدما..
أكيد نحنا بمعركة سياسية ببيروت، بس معنا ما حَدَن لازم من أهل بيروت لازم يحسّ حالو إنو مهدّد.. ما حدا في يِلغي حدا ، وإنتو الـ48 ألف مقترع فَكرو إنّو يلغوكم بالماضي، بس اليوم نحنا بقوتنا السياسية وتفاهماتنا الوطنية، رجعنا رِديناكُم على الخريطة البيروتية، وعَم نرِدكم حتى تكونو حاضرين فإنتو ما تكونو غايبين..
إنتو باسمكم، وبإسمنا، بدكم ترجعو تكونو النور القوي لبيروت.. أنا بعرف منيح مشكلة سوليدير عند البعض، بس نحنا بدنا كل بيروت عايشة من ضمنها “سوليدير”. وبدنا كل بيروت متل سوليدير، فيها خدمات.. وبمجرّد إنو يكون عندكم نايب ببيروت رح شعور إنو بيروت الكم تشعروا فيه..
بدنا نحنا وإنتو نبني الدولة القوية، ونحنا متكلين عليكم.. وإيماننا فيكم كبير.. ولكن لليوم مِتكلين إنكُن نِمتو وما رح تقومو.. إنّو نومكم السياسي طويل.. وإنو صعبة إنو يِجي تيار سياسي هالسنين الطويلة من النوم السياسي، يِعمل فيكُن إستفاقة سريعة.
بدنا معكم نعمّر بيروت سياسياً لأنو تعمرّت بالحجر. بس بدها تِرجع الروح الها بكل أبناءها.. وبِ 6 أيار كلنا إدغار طرابلسي، وأصواتنا لإدغار طرابلسي.. وكل الموجودين هون بدّن يكونو المكنة الإنتخابية..
بعرِف إنو تعذبنا حتى نقلّع، لأنو كنتو فاقدين التواصل مع كتير منكم، وعَم نبّش عليكم، بدفتر التلفونات، وبالأحياء البعيدي.. بتعرفو إنّو 7000 مقترع بدائركم تسجلّو حتى يِنتخبو بالإغتراب بالإنتشار.. بتِقبلو إنو 7 آلاف لبناني على آلاف الكيلمترات رَح يصوتّو لبيروت، وإنتو هون على بعض أمتار من بيروت رح تغيبو عنها بِ 6 أيار..؟؟
مدعوين بهيدا النهار تصوتّو وتِفرحو لأنو عَم تردو لبيروت جمالها بمشاركتم.. يا أهلنا ببيروت ردّو لبيروت كرامتها وعزتها.. عاشت بيروت وعاش لبنان.
رصد Agoraleaks.com
