فريد البستاني: شو هالكذب ما دفعت قرش لأدخل لايحة التيار.. تركت أميركا ورجعّت ولادي لإيماني بلبنان (Audio)

– أناشد وزير الصحة يقِلنا شو صار بمستشفى دير القمر..؟
– تهمة إذا الشخص رجل أعمال!.. وعودة المسيحيين تعني مناصفة
– بالموازنات صار في الغاء لكل الجمعيات الوهمية.. مين كان يِستَرجي يِعملا غير عون؟

***

مقتطف من حديث المرشّح عن المقعد الماروني فريد البستاني، لقناة الـ”LBC”: (نيسان 6 – 2018)

عودتي الى لبنان كان قرار كتير مهم، كوني وزوجتي من دير القمر، ولكن أولادي خِلقو بأميركا، ودَرسو بأميركا.. فأنا ألقّب بالمغترب العائد.. يعني انا الذي أقوله نفذّت,، لأنو في كتير مسؤولين بيِحكو بالوطنية، وبيِبعتو ولادُن ولادُن لبرا، أنا عمِلتْ العكس.

مبارح كنت بسهرة بالجية، مسيحيي الجيّة وَين صارو..؟ صارو بدِنيي الإغتراب. بأميركا وأستراليا.. يا حرام عَ الجية وأهالي الشوف.. اليوم مِنقول لأهالينا: شاركو بالإنتخابات، لأنّو هيدي أوّل مرّة في إنجاز عظيم عِملتو وزارة الخارجية، صار للمغترب صوت.. وهيدا الصوت لازم يدوّي… هالمرّة 86 ألف مغترب سجلّو لينتخبوا، في المرة القادمة نامل أن ينتخب مئات آلاف المغتربين.

مشاكل الشوف

مِنقول لأهلنا عودوا، وما في مواصلات، ما أرخص يشترو بيت بالجبل من بيروت. والحياة أحلى وأريح بالجبل. لكن ما في خدمات.

بالدامور عاملين نادي رياضي، جامعين 240 ولد، بيلعبو بدَل ما يروحو على المخدرات.. لكن كلشي عَم يِنعمل بالشوف، عم يِنعمل بصورة فردية خاصة. ما في دولة بالنسبة للإنماء.

نُحيي العهد، عم يَعطو حيوية للبلد وزخم للإقتصاد. المطلوب ذهنية جديدي. القطاع الخاص لازم يفوت عَ الساحة، ونبلشها بالبرلمان.

بكل أسف بالبرلمان، ما في رجال إقتصاد، في محامين بارعين، وفي أطباء وسياسيين. بس ما في إقتصاد.. ومشكلتنا إقتصادية مش سياسية. ونحنا إذا حِليّنا المشاكل المعيشية نحلّت الهجرة، والإغتراب نحلّ.

كل التشريعات اللي عَم تصير بالبرلمان، تشريعات ضرائبية، وين النمو..؟؟ عنّا دين تقريباً 80 مليار $. حصّة أهل الشوف تقريباً 8 مليار $. شو عطيتونا؟؟

• ما عنا طرقات
• ما عنّا انارة
• ما عنا مدارس مِتل الخلق

بَدنا نطالب بحقنا، في قصة الإدارة بالشوف، بدنا مناصفة، يللي بيِطلع عَ دوائر الشوف، ما في مسيحية… ليه يا حبيبي؟

المناكفات

المناكفات وصلّت شعبنا أوقفت المشاريع الإنمائية والإقتصادية.. في عنا مستشفى دير القمر، طِلِع المرسوم من سنة 2003، عَ أيام الرئيس لحود، بمساعدة هبة من الرهبنة المريمية، والعميد أدونيس نعمة، وغير شخصيات.. اليوم 2018، ما في مستشفى..؟؟

اناشد وزير الصحة يِقلنا شو صار؟؟ ليه ما يُعيّن مجلس إدارة؟ 

من سنة 2010 لليوم محاربات، قلنا آخر شي بدنا نجيب الكهربا 24/24 ساعة. ما في حلّ، شو هالقصة، حتى نجيب البواخر لسنتين، بوقت نعمّر المعامل الثابتة.. كمان أوقفت.. إذا حدن عندو شي بالقضاء، يتفضّل.. إيه في حرية. بس الحرية مش إفتراء.

تحالف التيار المستقلين

تحالف التيار الوطني الحر مع المستقلين، هدفه توسيع مجموعة الناس يللّي بدها تحط إيد بإيد، لتساعد لتطوير البلد. ولم ينحصر فقط بالحزبيين، لأسباب إنو كلهم حزبيين باللائحة، سيأخذون من ذات مصدر الأصوات.

أن يأتي مستقلّ، بِجيب أصوات من برّا.. والإختيار كان على كفاءات، وعلى إحصاءات.. الجماعة إشتغلو بطريقة علمية جداً.. وبحبّ قول شي على الهوا وصرّح علناً:

أنا ما دفعت لا قرش حتى دخلت عَ لايحة التيار، وكل هالأكاذيب إنو فريد البستاني دَفع 4 – 5 ملايين $. انا فِتِت بكفائتي، ونظافة كفّي..

الإحصاءات شو بِتقول: 46.5% من اهل الشوف مش حزبيين.. أنا غير إنّو بدّي آخود من 46.5 % اللي عِندن رسالة بيللي عَم قولها… لكن التيار عندو مساواة بكل المرشحين.. وعَم يقول بدنا نعلّي الحاصل تبع اللايحة، وإنتو قرروا..

قدامى الجيش، ما بِصوتو وقت كانو بالخدمة، اليوم بدّن يصوتو.. هنّي التضحية والشرف، عَم قلّن إنتو إذا كنتو ركيزة البلد، ودَفعتو غالي بكل شي، اليوم عنّا العهد هوّي العماد عون.. وهوّي الشرف.. مفروض تِدعمو العهد، وبدعمكم بيعلى الحاصل، ومنكون فاعلين أكتر، ونحضنكم مرّة تانية..

رجال الأعمال

يعلقون، عَم تجيبو رجال أعمال..!! القصة مش وجاهة، انا فايِت لأنو حابِب غيّر.. ولو ما شِفت شعب الشوف مظلوم ، وفي يأس.. أنا ما فيّي حطّ إيدي عَ خدّي وإتفرّج..

أنا جِبت ولادي من أميركا.. وبدنا نرجّع المغتربين شوي شوي عَ بلَدُن. ويللي ما بَدُّن يِرجعو على طول، بدنا يزورونا ، وتكون إيدُن معنا…

البرنامج معي إنمائي.. وانا داعِم العهد، لأنو لازم ينجح.. وكل مشاريع الشوف بالحوار. ما فيشي بالصريخ والعَييط..

عودة المسيحيين يعني مناصفة، ونحنا شركاء بالوطن، ونحنا حواريين، وما عنّا مصالح شخصية. وعَم نحكي لمصلحة أهل الشوف من كل الطوائف. وبدنا نكون إيجابيين. وبِ 6 أيار عنّا إستحقاق وطني، وبدنا نغيّر الواقع. إذا كنت مُحبط وغيري مُحبط، عَ مين نترك البلد؟؟

إنجازات العهد

• الموازنات
• قانون الإنتخاب
• التعيينات الإدارة والقضائية

في مرشّح حابِب كتير إشتغل معو، هوّي نِعمة فرام، عنّا أفكار إقتصادية عديدة.. وعندي شخص كتير بحترمو هوّي شامل روكز، شعبنا بحبّ الجيش والعماد عون.. وبهالسنة ونص، صار في نقلة نوعية.. والرئيس قال أيضاً، بعد الإنتخابات وأول حكومة يبدا العهد..

بالموازنات صار في الغاء لكل الجمعيات الوهمية.. مين كان يِستَرجي يِعملا قبل؟؟ هيدا فساد وهدر للمال، لكن بعهد الرئيس عون صارت..

تمّ تنزيل أسعار الأدوية 70%، ليه ما نعملِت قبل..؟؟

الأرغيلة

الشوف فاضي، ولكن الشباب بعض الضهر، بأرغلو.. ليه؟؟ زهقانين.. عَم يئذو صِحتُن، وما حَدَن عَم يِشتغل.. في ظاهرة، قسم كبير من شعبنا يلعب “LOTTO” لأنو ناطِر الفَرج… أد ْ ما يِئسو صار بيحلمو إنّو يِربحو مصاري.. كل شعب بِحط كل أملو باليانصيب، يعني في عِندك أزمة نفسية غير المخدرات.. صار الناس عايشين مش بالواقع، وهالشي كتير بِزعّل.. ولازم نغيرو..

رصد Agoraleaks.com