✝ يسوع ملك غير كل الملوك… (مارينا شليطا) 🙏

ملك عظيم حَبّ يزور مدينة خلال 3 أيام.. بيِبعَتْ خبر لأهلا، وبِبَلشو تحضيراتُن..

صارو يزينو الساحات، ويِفرشو الطرقات، ويعلّو قواص النصر..

بِقيو شهر على هالحالة، حتى معالم المدينة ما عادِت معروفة..

بس وصل الملك على الساحة، استقبلوه أجمل إستقبال، وبيوقف أحدُن، وبقول خطاب، ومن بعدا بِقلّو:

• بِشرّفنا يا جلالة الملك، انك تِلتِقي باليوم الأول النواب والوزرا والوجهاء..
• وأحبّ على قلبنا باليوم التاني، تِلتقي المهندسين والعلما بهالمنطقة..
• أمّا باليوم التالت، مِنحبّ إنّك تجتمع مع الأساتذة، وأطباء المدينة..

كلّ الحاضرين تحَمسّو ، ولكن الملك بيوقف، بيطلّع بكل الحاضرين، وبِقِلُن: بِشكركُم على هيدا الإستقبال، وعلى كل التحضيرات، بس زيارتي مش هيك رح تكون، ولا هيدا هدفها..

• حابِب بأوّل يوم، زور المرضى اللي ما عندُن يهتمّ فيُن.
• وباليوم التاني حابِب زور المساجين، اللي ما عِندُن حدَن يفكّر فيُن.
• أمّا اليوم التالت، رح خصّص زيارة للعجزة والأيتام، واتبارك منُّن، وهيك صارت زيارة هالملك، اكبر عيد لكل إنسان كان متروك ومهمّش..

* ♰ *

هيدي القصة بتقلنا، قديه يسوع ملك غير كل الملوك، كتار حَضّرورو زيارتو، وحِملو قواص النصر، ولكن قلال اللي عِرفو إنّو يسوع هدفو زيارتو يزور كل الأشخاص المتألمين، والمهمشين، واللي مش مذكورين ولا مطرح، الاّ بقلب الله.

شو حِلو نفكّر بيوم الشعانين، إنو الله حابِب يزورنا، لأنو بحياتو ما فرّق بين الأشخاص..

شو حلو نفكّر إنّو يسوع هوّي الملك الحقيقي، وهوّي العيد، وهوّي زينة إيامنا..

تعوا اليوم بعد ما إنعجقنا كل الأسبوع بالتحضيرات الشكلية، ما نِنسى نستقبل يسوع ملك حقيقي عَ قلوبنا وحياتنا..