خاص – “الكلمة”: إشتغل أكتر وحَطَّب أقلّ، إشتغل أقلّ وحطّب أكتر.. ليه!! (Audio)

✝ بالصوم، هيدا المطلوب (مارينا شليطا)🙏

راح رِجالَيْن عَ الغابة، وقَضو نهار عم يْجَمعو الحطب..

كان الأوّل عَم يِشتغل بلا توقف، حتّى جمّع بآخر النهار كَومِة كبيري من الحطب..

التاني كان عَم يِشتغل فترة، وعم يْوَقِّف فترة تانية، بس بالنهاية كانت كَومِة الحطب اللي جَمعا أكبر بكتير من كومة رفيقو..

تفاجأ رفيقو، بقلّو: خَبِّرني كيف قدِرت تجمّع حطب اكتر منّي، مع إنّي شِفتك كِنت عم ترتاح كل شوي..؟؟

بِجاوبو: مزبوط، بس أنا وعَم إرتاح كنت عَمْ سِنّ الفرّاعة اللي مَعي..

***

بهالصوم، هيدا هوّي المطلوب.. يكون عنّا وَقفِة تْبَيْعِدنا عن شِغلنا وإنشغالاتنا يومياً، حتى نقدر نِتجدّد ونِقدر نَعطي ثمر بحياتنا اليومية..

تعو اليوم نِتقصّد ناخود وَقفة صمت وصَلا حتى نِتجدّد، وساعِتا إنطلاقتنا بِتكون أفضل وأقوى بهالنهار الجديد..