خاص – “الكلمة”: الأم والصبي والتطنيش.. (Audio)

✝  فوق عيوننا في جفون.. (مارينا شليطا) 🙏

صبي كبير بيوصل لعند إمّو  بِقِلها:

ما عَمْ تشوفي شو عَمْ يعملْ خيّي..!
صَرلك فترة ما عم تقوليلو شي..؟؟
مع إنّو عم يزعجني.. حتى إنّو ما عَمْ تْقاصيصيه..؟؟
بدّي إفهم لشو الله عطانا عيون؟؟
الله عَطانا عْيون، لنقشَعْ، ونميّز بين الغلط والصَحْ.. وإنتي ما عم تقولي شي..؟؟

بتِبتِسِمْ الأم وبتقول:

مين قَلك إنّو ما عم شوفْ غلط خَيَّك..؟ بس مش دايماً عَمْ عَلِّق.. لأنو متل ما الله عطانا عيون، تَنشوف، عَطانا مَعُنْ جفون حتى نطنّش.. لأنّو إذا ركزّت بس على أغلاط خيّك.. ما رح يِبْقالك وقت تحبّو، او تِتْسلّى معو..

***

ونحنا شو مهم بهالنهار، نتذكّر إنو عيوننا فوقُن جفون..

شو مهم نَعرِف أيمتى نفتّح عينَينا، وأيمتى نْسّكرُّن بعلاقاتنا مع الآخرين..

شو مهم نتذكّر إنو عيوننا ما إنوَجدو،  تَنِقشع أخطاء غيرنا، ونضوّي عليُن بكل الأوقات، ولكن هنّي نْوَجَدوا حتى نطلّع بحُب، ونفتّش على الحلو والإيجابي في الآخر..

تعوا اليوم نظرتنا تكون بهالصوم، نظرة قبول، وحُبْ، ومنّا نظرة حكم على الآخر، وإدانة، حتى يكون عنّا وقت نحبّ كلّ الأشخاص اللي حَوالَينا..