نقولا صحناوي: رمز التغيير بالأشرفية سقوط فرعون.. مع السوري – المستقبل – سليمان وهلق القوات.. وما عِمِل شي! (Audio)

– العاصمة بالشق المسيحي ناقِصها الزند القوي..
– معظم السياسيين تفرزهم الناس وما ضروري الأفضل، العماد عون فارزو التاريخ…
– عن مشروع سكن وقرية رياضية بالكرنتينا، ومرفأ ونهر بيروت ومواقف تحت الأرض..

***

نائب رئيس التيار الوطني الحر للشؤون السياسية نقولا صحناوي، في “حلقة خاصة” على قناة الـ”أو تي في” مع الإعلامية ريما نجيم: (13 آذار 2018)

حرب التحرير ووفاة الوالدة

توفت بالحرب، بقذيفة سورية بحرب التحرير، وكانت داخل البيت، والقذيفة كانت كتير صغيري، ولكن السقف كان من الطين، وبدل تفقع القذيفة فوق، ويهرّ شوية حجار، فَلَشِت جُوّا وميشان هيك توفّت في 6 آب 1989.

انا كنت بفاريا، وكتير أصريّنا على امي تطلع، كانت متل بَيْها جدّي، يكون في قصف والراجمات السورية بحرب “100 يوم” ، عم تِضرب 36 صاروخ بنفس الوقت على الحَيْ (راجمة)، وهوّي قاعد بأوضة السفرة عم ياكول، إنّو ما بدو يغيّر عاداتو..

أمّي متل جدّي، تَركتنا بكير كان عمرا 43 سنة. هلق بحس إنو ملاك عم يواكبني وحارسني.. شي المُلفت والإستثنائي، انو نْعَمل فيلم عن العيلة، وناس اجو عاشو معنا، وكنت بوقتا صغير عمري شي 14 سنة، بالتمانينات بيسألوها شو بيعني الك البيت.. وليه بعدك بالبيت، وفي حرب.. ليه ما بِتْبيعو البيت وبتروحو تشترو بيت بأي دولة بالعالم؟

بتقول: أنا هيدا البيت، جزء منّي. وإذا في حرب، بحسّ إنو لازم ضلّ فيه، حتى احميه، وإذا بدّو القصف يشيل البيت، بدّي موت فيه.. وصار متل ما قالت. الفيلم تصوّر سنة 1981- 1982، وهيّي راحت سنة 1989.

كل عِيلْ لبنان عاشت نفس التجارب، ورا خطوط تماس مختلفة..

يُسأل عمّا إذا كان يَحقد على تلك المرحلة، يقول:

انا بفلسفتي الداخلية ما بِحقد على حدا، بعتبر الحقد هوّي هزيمة.. بس نخلّي الحقد يفوت، معناتا خسرنا المعركة.. بأي معركة، لازم نوقف مع الحق، ومن وقت ما العماد عون اطلق حرب التحرير، وكان عمري 21 سنة، أنا كنت مناضل بالتيار الوطني الحر..

تجاوزنا تلك المرحلة، لأنّو بدنا نروح للمراحل اللي بعدا.. لازم نخلّد ذكرى الشهدا، بس بدنا نحصّن الحاضر والمستقبل للأجيال من اجل بناء البلد… أكيد ما منحمي لبنان بالحقد، وبمدّ الجسور والسماح وبالشراكة..

البيت

في طابع بريد من سنة 1905، منشوف من منطقة “مار متر” الأشرفية.. كانت كلها خضار، وفيها شوية بيوت، وفيها بيتنا مبيّن كبير، وعليه قرميد..

والقرميد راح، لأنّو الأتراك وقت غلّو سعر الخبز، لأنو كان في المجاعة والحصار.. وبوقتا مات حوالي 300 الف لبناني. بوقتا جريس تويني أضرب على تلال ايام، وسكّر التجارة ببيروت.. فبعتو فريق يحرقولو البيت، هرب، وحرقو البيت، فاحترق الطابق العلوي، والقرميد.. وما رجعت العيلة بِنيت القرميد..

السوريي كانو معتبرين، الجنينة مربض مدفعية للقوات، لأنو كان ياخدو الخريطة القديمة لبيروت، ويشوفو وين في مساحة خضرا ويقولو اكيد في مربض.. فكان تركيز القصف على البيت، على الجنينة، اجا 64 قذيفة، 9 منهم على البيت.. وحدي منهم أخدت الوالدة..

يُسأل عن حبه للبنان، يقول:

كل مراهق بكون عندو جاذبية لوطنو، ولبلدو كيف بدّو يساعدو.. بالفترة اللي قبل نداء العماد عون، ما كنت حاسِس إنّو الميليشيا بتمثّل طموحاتنا الوطنية وبناء دولة.. كان في زعرنات وفي جزء من المجتمع متضايق من الميليشيات..

يُسأل: ما كنت تشوفُن: بيحمو الوطن؟؟ يردّ:

مبلا يمكن.

لكن نحنا كنا بسنة 1982 وصولاً لسنة 1985.. يعني كانت صارت الميليشيات تقاتل بعض.. يعني الناس عاشِتْ معاناة، ولكن بس طلع العماد عون بشعار الجيش اللبناني، والسيادة والعلم اللبناني، قلت: إنو هيدا المحلّ يللي بدّو كون فيه…

وكان برأيي أفكارو إذا تطبقّت، ودعمو الشعب من كل الطوائف، ممكن نْسَيّج الوطن، وساعتها منركّز السهام على الأجنبي.. وهالسبب جعلني أنخرط بالتيار الوطني الحرّ.. وناضلنا بتاريخ طويل، حتى عودة العماد عون..

العلاقة مع القوات

مع إقرار ورقة النوايا بين التيار والقوات.. الهدف كان:

1) المسيحيي يقوُوا بلبنان، بالكباش الداخلي، وهيدا بدأ تحقيقو..

2) إيقاف التشنّج الدائم داخل المناطق المسيحية

ولهذا السبب اتفقنا، على استعادة الجنسية للمغتربين من اصل لبناني.. (وهيدا كان اوّل تحدي للفريقين، بعد ورقة النوايا) وكان مبيّن بالتصويت إنّو ما بيقطعْ.. ولكن لمّا كل فريق شدّ بحلفائو وحَشَرناهم، قَطَعْ القانون.. وهيدا الشي عطانا معنويات..

الفريقان شدّ لإقرار قانون الإنتخاب، حتى يقدرو المسيحيي يصوتو لعدد أكبر من النواب، ويكونو هنّي عم يطلعوهم بأصواتُن..

• قانون غازي كنعان كان يسمحلنا نجيب 21 نائب
• قانون الدوحة، صارو المسيحية بينتخبو 35 نائب
• القانون النسبي، صارو المسيحية بطلعو حوالي 50 نائب

وكان التيار بدّو يقدر المسيحيي ينتخب 64 نائب.. إذاً حتماً التقارب بين التيار والقوات كان صَحْ، وبمحلو، وعطا إنجازات للبلد، وللمسيحية، لأنّو البلد لِحِمْ.. واللحمة بين المسيحيين قربّت البلد كلّو.. لأنّو في فريق سنّي بدّو حليف مسيحي، والفريق الشيعي ما بدّو يكونْ معزول… وأصلاً نحنا ما خلينا ينعزِلْ..

هالشي اليوم مخلّى عهد الرئيس قوي.. ووصول الرئيس عون كانت انجاز بالنسبة للبنان والمسيحيين، وهيدي أوّل مرة بيوصل لبنان رئيس قوي، ومعو كتلة نيابية ووزارية..

يُسأل من أتى بالعماد عون رئيساً للجمهورية، حزب الله أو تقارب التيار القوات؟؟ يقول صحناوي:

التاريخ لازم ينكتًبْ صح، بالأولوية..

• صلابة العماد عون بالدرجة الأولى ، واصرراه مع التيار لأنو هيدا حقّ لهم..
• ثبات حزب الله، ورغم الرهان انو سيتراجع، ورغم حشره بحليفه فرنجية.. نْعَمَل كلشي حتى يضهر من التزامو، وما غيّر.. والقوى الإقليمية والدولية انصبّت لتغيير رأي حزب الله، وبقي الحلف صلب.. ومع وثبات العماد عون والتيار، وقول الآخرين: اتفقوا يا مسيحيي على مرشّح، جاء

• اتفاق التيار – القوات.. وأحرج الذين يعارضون

يُسأل عن بري؟ يقول صحناوي:

شو بدّو يحكي الواحَدْ ، نحنا ولا مرّة نُشَخصِن الأمور.. ولكن هيدا الفريق بممارسته بالسلطة عندو ممارسة بتشبه الممارسة الفئوية، يللي فيها القوي بياكولْ حق الضعيف..

تعودوّا إنو المسيحيين ضعاف، ويمكن فرقاء غيرو بيعتبرو ذات الشي.. ولكن نحنا المسيحيين إجو أخدو حصتهم، ما فتنا نحنا على الضيع يللي فيها نفوذ لحركة أمل، وحاولنا ناخود حصتهم..

حصة الأشرفية من النواب كانت بقانون غازي كنعان: 0.
بقانون الدوحة 2009، صارت 5.
وبسنة 2018، رح يطلعو 8 نواب..

اليوم رئيس الجمهورية، والكتل المسيحية الكبيري، الممثلة بمجلس النواب، اخدت، حقائب أساسية، وطلّعت قائد جيش، ورئيس تفتيش، ورئيس جهاز أمن الدولة، والقضاة والتعيينات، مثال رئيس كازينو لبنان.. 

يعني اليوم هالحصّة اللي كانت رايحة للكلّ، أكيد كان في مُشارك بالحصة، ومش حَقّو، هلق منّو مبسوط، وصوّت ضدّ الرئيس القوي.. 

ما في غير عند المسيحيين، في مرشحين، ولوائح، ومجتمع مدني.. وكل واحد عندو 3 – 4 اشخاص بحبّو، بيعتبر إنّو إذا عِمِل حزب، رح يكتسح..

رئيس الجمهورية ضمانة، ومن مصلحة الجميع تقوية صلاحياتو.. وبالنهاية رئيس الجمهورية مع مين بدّو يشدّْ..!! انو مين في وراه غير شعبو..!!

هيدا اللي ما عندو غير البحر خَلفو.. وما عندو حليف إقليمي او امتداد معيّن، معناتا ما عندو غير خيار واحد، بدّو يعمل دولة.. والمسيحي يا بيعمل دولة، يا بفلّْ.. إذا حدا أكلّك حقّك من طايفتك أو من غير طايفة، مين بردلّو حقّو..؟؟ القانون والدولة…

ميزة اللبناني

أولى الشركات العالمية في مجال المعلوماتية والإتصالات هي لبنانية… وهذا السبب يعود لجغرافيتنا وقوة دماغنا، وتراثنا الفينيقي، الذي يسمح للبناني أينما حلّ ينجح..

رئيس الحمهورية قال: الحكومة الآتية يجب أن تكون إستثنائية.. الفريق اللي بدّو يجي بدّو ينجح..

الإنتخابات

القطب الذي يواجهني هو النائب ميشال فرعون. دعيته لمناظرة تلفزيونية لترى الناس البرامج، رفض التحدّي.. لو كان ما بِخاف بيقبل..

لو فرعون بيحترم الناخبين، كان قبل.. برأيي رمز التغيير بالدائرة الأولى هو سقوط ميشال فرعون. لأنو صرلو 22 سنة نايب.. 

• كان نايب وقتا كانت القوى والأحزاب المسيحية مقاطعين الإنتخابات
• كان نايب، من بعد 2005، وصار سيادي.. ومشي مع تيار المستقبل
• رجع مشي مع الرئيس ميشال سليمان
• هلق مع القوات اللبنانية..

22 سنة شو عِمِلْ للدائرة؟؟ هيدي الدائرة بعاصمة لبنان… !! هيدي منطقة ما الها أم وبَيْ..!! ونحنا عم نعيشا كل يوم.. بدّو يجي حَدَن يطالبها بحقوقا..

مش هلق بعد 22 سنة بيكتشف إنو صار بدّو يطلب بتقسيم البلدية.. نحنا عم ندعي لتقسيم البلدية من سنة 2009. وما زلنا على موقفنا، لأنها الطريقة الوحيدة لمحاسبة أعضاء البلدية

البرنامج

عاملين مشروع، وبرمنا عَ كلّ الأحياء حتى يكون لكل حَيْ موقف تحت الأرض.. وهيي دراسة هندسية.. ويمكن تأمين التمويل من بلدية بيروت، ولديها الكثير من الأموال.. والبرنامج الذي أطرحه كلفته 538 مليون $، لتنفيذ 15 مشروع..

• في مشروع سكن، لأنو ولاد الدائرة عم يفلّو.. ما معن يشترو (العقارات غالية الثمن)
• مرفأ بيروت، ليه مسلوخ عن الدائرة الأولى؟؟
  رصيف السواح تحت الجميزة.. نوضعت دراسة منتزه سياحي للسواح يوصلك الى الجميزة..
• نهر بيروت، بدل ما يضلّ فاضي. لقينا طريق ليمتلئ، ويكون نضيف.. مساحة 150 الف متر مساحة عامة للبيروتيين والساكنين، يصبح لديهم مكان للتنزّه، ويوجد شجر، وطاقة متجددّة.. ومنظر..
• الكرنتينا، في 80 ألف متر مربّع، تملكه البلدية.. كان فكرة البلدية، تشييد أبنية للبلدية ولوزارات الدولة… فكرتنا تحويلها الى قرية رياضية، وثقافية.. قاعة لكرة السلة لفريق الحكمة، وملعب كرة قدم لفريق الراسينغ..

يُسأل عمّا إذا إنتخب، هل سيعمل إعادة أمجاد نادي الحكمة، يقول:

في كتير إشيا بتنعمَلْ شرط يحسّ حالو مسؤول عن هالدائرة.. الحكمة لازم يكون عندا ملعب وقاعات رياضة… الدعم يأتي من البلدية أو من الدولة أو وزارة الرياضة.. الفكرة إنّو ممنوع الإستسلام أمام العقبات.. الموضوع المالي منّو سهل..

كرم الزيتون

أدعو الجميع للمنافسة الإيجابية، انا ما بلشت الشغل قبل الإنتخابات، عم إشتغل من زمان.. دَهن احياء كرم الزيتون.. جاءت من فكرة دهن منطقة الأوزاعي، ولما سُئلت عن التمويل، أجبته: بانا مستعدّ لتمويل المشروع.. منعملْ الشارع، ومنشجع نقنع البلدية ترجع تعملْ كل المنطقة..

اخدنا ولاد اليسوعية، ليشعر ولاد المنطقة إنو قادرين على تحسين المنطقة. ولكن الصورة اللي تداولوها على وسائل التواصل الإجتماعي، خصمي اللي نَزَّلها، وخَصمي اللي قوّص عليها… وانا بحبّ الرياضة، وكوني شفت واحد 3 أيام ورا بعض، على راس الحبلة برأس البناية، قلت بدّي جربّها..

جربّت، حدن من شبابو صوّر، وهوي نزل الصورة، وهوّي قوّص عليها.. عال، انا ما بستحي من شي..

بما يختص بيع الخضرا.. شو فيها.. عيب..!!! اكيد إذا بعنا خضرا نص نهار عَ ساحة ساسين، ما رح نغيّر شي.. الفكرة هي توعية الناس على مشاكل النزوح السوري، والعمالة اللبنانية، لأنّو كلنا منروح على الأوفر.. والأوفر نجيب دهّان سوري، وناطور سوري… ونحنا مش عم نحكي عنصرية انو مش منيح السوري.. كل يللي عم نقول مش قادرين نحمل مليون و800 الف نازح سوري…

على الوزارات تعمل واجباتها، ما الهم حق، ينافسو التاجر اللبناني والصناعي اللبناني… بالقانون.

وزارة الإتصالات

الناس ما كانت تعرف، إنّو وزير إتصالات، بوجود مدير عام بالوزارة للإستثمار والصيانة، ومدير عام أوجيرو بشخص واحد، عبد المنعم يوسف.. وكان عندو تقريباً: 3000 شخص، بين أوجيرو والوزارة، بيدفع معاشات 3000 موظف..

الوزير بيدفع معاش 50 موظف بالطابق عندو، وما عندو مال حتى يشتري قهوة للضيوف..

كل الموظفين بطيعو مدير عام أوجيرو.. فكنت بالظاهر مبيّن انا الوزير، وما فيّي أعطي إنطباع تاني، وكان بالفعل لازم إربح لعبة الشطرنج، بشخص واحد.. وبعتقد حالي ربحت، ميشان هيك، أنا فخور من هالمرحلة، بس ما حَدَنْ بيعرف بأيّ إمكانيات إشتغلت…

فصل النيابة عن الوزارة

العماد عون بس كان رئيس التيار كان يؤيدها شرط أن تلتزم بها كافة الأحزاب.. لكن بالنظام الأنغلوساكسوني، العكس الصحيح، ما بتقدري تعملي وزيرة، إذا ما كان نائب….

عون

الرجال اللي بتفرزهم الظروف الصعبة، مش متل رجال السياسة.. المجتمع ما بِغَربِل أحسن ناس، السياسي حتى بأوروبا، بِغربل أسوأ ناس.. يمكن منلاقي أسوأ ناس بالسياسة، وأفضل ناس بالإقتصاد أو بالقطاع الخاص..

بأوقات إحتلال وتخاذل طبقة سياسية، وظروف إستثنائية، بْيِطلع إنسان غريب عجيب، ومنّو سياسة.. ميشان هيك بيتمسّك فيه الواحد..

معظم السياسيين يفرزهم الناس، ولكن العماد عون فارزو التاريخ…

لأبناء الأشرفية، أقول: 

أوعا حَدَنْ يعتبر إنّو ما فيشي مهم.. لأنو المسار التصحيحي اللي صار، منّو سهل، وكلشي بالمنطقة بقول: ما فينا نستردّ حقوق، وضعاف وما حَدَن معنا ولا بالو فينا.. رجعنا وثبتنا حالنا، ورجعنا حقوق.. الشقفة اللي بعدا مُهملة هيّي العاصمة، ناقصها الزند القوي..

رصد Agoraleaks.com