شربل خليل: حزب سبعة وتمويلو مش قانعني.. وسوزان الحاج مظلومة وبِفهم وضع فاطمة بالنهار.. (Audio)

– ماذا يقول شربل خليل لعون وجعجع ونصرالله وفرنجية والحريري وبري وشامل روكز وجبران باسيل..؟؟

***

مقتطف من حديث الكاتب والمخرج شربل خليل ضمن برنامج “سطوح بيروت”: (11 آذار 2018)

عن برنامج “قدح وجم”، ونقد فاطمة عبدالله للبرنامج، يقول شربل خليل:

ما بردّ ع النقد، ومش دايماً النقد بِكون موضوعي. صرت ملاحظ مع فاطمة، انو كل ما يِمرُق “سكيتش” عن مالك مكتبي، بعد أسبوعين بيطلعْ مقالة بالنهار، عن “قدح وجم”.

بِفهم انو فاطمة بتشتغل بالنهار، النهار لمدام تويني، مدامتو لمالك مكتبي.. بعتقد في رابط..
بالنقد ما عندي مشكلة، بس انو ما فيشي بـ”قدح وجم”، ما بيسوى..؟؟ تسمحلي فاطمة، مع احترامي الها ولكتابتها، بفهمْ انو بتشتغل بالنهار، وعايشة من النهار، وعم يشيلو موظفين. بفهم وضعا، وبقدرو.. بس مش ضروري آخود برأيها..

انا بعرف قديه عم يعطي نتيجة عند الناس البرنامج. وبعرف الناس شو بيحكوني بالشارع. وكيف بيتفاعلو ع “تويتر” وعَ “فايسبوك”، فرأي فاطمة مش ضروري يكون صائب.

يُسأل عن دمية الرئيس عون، سيما وأنّه قبلاً لم يكن يُسمح بتناول الرؤساء.. يقول شربل خليل:

الرئيس عون يتقبل النقد، ويحب البرنامج، ويحب هذا النوع من الكاريكاتور. وكل ما شوفو، بْيِثني على البرنامج. وما عندو مشكلة أبداً بالدمية..

ولا مرة إجاني تعليق سلبي، أو احتجاج..

يُسأل: لأنك تحبّه؟ يردّ:

بحبّو، بس “السكيتشات” منها طرية..

يللي عم يفاجأني، دايماً من سنة 1995، لسنة 2006، كان تعاطي الشارع اللبناني مع النقد شي، وبعد سنة 2006 لليوم صار شي تاني..

بالتسعينات والـ2000، كانو السكيتشات أقسى بكتير، على وليد جنبلاط، وعلى رفيق الحريري، والسنيورة والمر وفرنجية.. ولكن من بعد سكيتش السيّد حسن نصرالله، ونزل جمهور حزب الله على الشارع، من وقتا لهلق، صار في مزايدات، إنّو مين بنزّل أكتر..

سوزان حبيش

المقدّم سوزان حبيش، من البداية ظُلمتْ، وبعدا لهلق مظلومة..

يُسأل: كيف تحكم بذلك، والقضاء.. يجيب شربل خليل:

ما القضاء اتهم زياد عيتاني بالعمالة، وطلع بريء..

انا برأيي القصة بلشت وتفبركتْ، وسوزان الحاج ضحية اشرف ريفي – اسعد بشارة، زياد عيتاني فرع الشمال..

زياد عيتاني فرع بيروت، المُتهّم، وفي زياد عيتاني اللي تابع للوزير أشرف ريفي.. وبعد تصويرهم للتغريدة، وتداولها، وأيصالها لخارج لبنان، فأُقيلت المقدّم سوزان الحاج.. وبرأيي هي ضحية..

إحساسي من وراء متابعتي للملف، أنا بشوفا مظلومة.. نظلمتْ من وقت ما عملتْ LIKE للتغريدة تبعي لليوم..

الحريات

روحو للقضاء، ادعّو عليّ وحاسبوني بالقضاء.. إذا كلنا تحت سقف القانون، ليه بدّنا نكون فوق القانون.

شو خص الحرية، ذهاب الإعلاميين للقضاء. دايماً في صحفيين وإعلاميين بيكتبو، وبصير في إدعاء ضدُّن، وبروحو على القضاء، ويا بياخدو حكم، وبيربحو، يا بيخسرو وبيدفعو 6 مليون ليرة أو 4 مليون ليرة.. هيدا كلشي بصير..

إذا الإعلامي واثق إنّو بريء، ليش بدّو يخاف.. ما بيطلعْ هوّي المنتصر..

17 دعوى لهلق، وما حدن غَلبني.. ما حدن قدر أخد حكم ليه.. حتى أيام السوريين، وكان محتل لبنان، والمخابرات يفزعونا، ويتلفنو، ولا مرة تراجعت عن يللي إعملو.. كانت “LBC” تحذف إشيا، بس مش أنا ما إكتب..

في حرية مطلقة بلبنان، ولكن إدارات التلفزيونات، في عندا إعتبارات ذاتية وخاصة، بيبقا عندا مصلحة مع سياسي معيّن، او عندا ظرف معيّن، أو في مسألة سياسية، بدها تراعيها.. هيدا يُفترض على الإعلامي يتفهّم المحطة.. بس إنّو في تهديدات، وما في إعلام، وبدنا نروح على زمن القمع، هيدا حكيْ..

حزب سبعة

تفاجأت إنّو ترشحّت مع حزب سبعة، لأنو أصلاً حزب سبعة مفاجأني كلّو.. هالحزب اللي طلع فجأة وفي تمويل مش طبيعي.. هلق قالو إنّو هيدي مصادرنا، ما إقتنعت..

بولا يعقوبيان تركت المستقبل، ونقلت على حزب سبعة، نشالله تنجح.. بس بشكّ إنو المجتمع المدني (حزب سبعة أو غيرو) يقدرو يغيرو، او يوصلو بعدد من النواب ويكونو فاعلين..

الإنتخابات

المعارك اليوم معارك حيتان مال، يللي بكبّ أكتر بيقدر يجيب أصوات تفضيلية.. نص الناخبين، بيقتنعو بـ1000$ أو بقسط مدرسة، او توظيف إبن.. اليوم قصة الإنتخابات، قصة مصاري وخدمات..

أترشّح إذا حسيّت قادر غيّر، بس تعليق نمرة، ويقولو سعادة نائب لاق..

شربل خليل بعدسة إبنه شربل..

عن شبه شربل الإبن بشربل الوالد:

أحبّ كتابته، بس بالسياسة أكتر.. انا بتابع السياسة كتير، وبحبّ النشاطات السياسية والشأن العام، وبنزل معو بس يكون في مقابلات مع السياسيين، بتعرّف عليُن، وبحضر المقابلات كيف بتتصوّر.. في ضيوف متل النواب ابراهيم كنعان وزياد اسود وحسن يعقوب، وفيرا يمين..

عمّا يتفقان عليه؟

أتفق معه على إنتقاد جميع السياسيين.. انا هيدي معو فيها للآخر..

عن ميزة والده

شخص كتير بيسمعْ ، وحمدلله ديمقراطي للماكسيموم..

عن اكثر أمر يُفرّح شربل خليل الأب..؟؟

نضلّ رافعينلو راسو بكل شي، بالمدرسة او بالنشاطات.. وين مكان نحنا منسوبين إنو نحنا ولادو لشربل خليل..

عن أكثر شي بعصبّو..؟

قلّة المروّة، التخاذل.. يعني عنّي أنا، بكونْ عارف بقدر أعطي أكتر بكتير.. وبيعرف إنو طاقتي اكبر من ما عملت..

عن أكتر سياسي صديق شربل خليل..!!

النائب ابراهيم كنعان.

نصيحة الأب للإبن..؟

ما كونْ ولا مرّة آداة لسياسي معيّن.. دايماً يكون عندي رأيي ولا مرة كون تابع بشكل أعمى. إعمل قناعاتي متل ما لازم..

عن مرّة رأى والده زعلان..؟

مرّة لأمر حصل معي في الكلية.. شفتو زعلان، ولكن ما بعبّر ، بس بحسّ عليه قديه كان متضايق ومعصّب، يكبتْ زعلو، يكبت تعصيبو.. لو حَدَنْ غيرو يمكن يعمل قصة، بضلّ رايق..

المخرج شربل خليل ماذا يقول للرئيس عون؟؟

الله يطوّل بعمرو، لأنو لبنان من بعدو مش متفائل

لسمير جعجع..؟؟

صار بدّا حكيم..

للسيد نصرالله؟

بحبّو وبحترم مواقفو

لسليمان فرنجية؟

تحية لعفويتو

لنبيه بري؟؟

يضبط شارعو…

لسعد الحريري..؟

بلشت غيّر رأيي فيه للأحسن..

لجبران باسيل..؟

كمان بلشت غيّر رأيي فيه.. وللأحسن، أصلاً في صداقة قديمي، ولكن صار شوية نفور بمرحلة معينة..

يُسأل: ولكن ما غيرّت توجهاتك عن التيار.؟؟ يقول:

لاق، اكيد توجهاتي بتبقا.. منها قصة بطاطا، عم يشتري كيس، ويبيع كيس.. أنا ما بغيّر مبادئي ابداً.. طالما الجنرال عايش، مطمّن بالي، ونشالله يبني لبنان

للجنرال شامل روكز؟

نشالله تنجح بالإنتخابات..

رصد Agoraleaks.com