خاص – “الكلمة”: انتبهو من الحجارة الزغيرة مش الكبيري!! (Audio)

✝ كل شي بِحيدْ عن الحق، باطل، لو الكل أيدّو… (مارينا شليطا)🙏

كاهن عم يوعظ قال: انتبهو توقعو بالخطية.. وحتى ما توقعو.. لازم بمسيرتكم اليومية تنتبهو من الحجارة الصغيرة، لأنو الحجارة الكبيرة بتشوفوها واقفة حاجز قدام نموكم الروحي، فَبْتِبْتِعدو عنّا..

أما الحجارة الصغيرة، ما بْتِنْتِبهولا، وهيّي اللي بتوقِعكم..

شو كتار الحجار الصغار، اللي بكونو حجر عثرة النا بحياتنا الروحية… وشو كتار الأوقات اللي منحاول نبرّر ونسمّي الخطايا اللي منقوم فِيا، بأسامي مقبولة بالمجتمع، وان كانت مرفوضة على المستوى الإيماني..

كم مرّة الحجر الصغير كان على شكل كذبة بيضا، وكأنو تلوين الكذبة بخليها تتحوّل لحقيقة.. وكم مرّة عدم الأمانة سميّت بمفهوم الشطارة..

شو حلو اليوم نكون مقتنعين، انو كل شي بِحيدْ عن الحق، هوّي باطل، حتى لو الكل قامو فيه..

تعوا اليوم نتذكّر إنو الرب دعانا نكون الملح والنور، يعني متل الأقلية، لأنو هيدي عمق الدعوة المسيحية النا..

مع بداية هالنهار، ننتبه من الحجار الزغار، وننتبه أنو اكبر حجر عثرة النا، تأجيل عمل الخير لبكرا، لأنو مين بيضمن انو النا بكرا…