Agoraleaks Agoraleaks
✝ نحنا أبناء الله، مش الأرض؟؟؟ (مارينا شليطا) 🙏
بقول الأب “أنطوني دي ميلو”:
- في أشخاص بيخلقو هنّي ونايمين،
- بيكبرو وبيبقو نايمين..
- بيتزوجو وبجيبو ولاد، وبموتو.. ولكن للأسف بكل هالمراحل بكونو نايمين..
بكمّل وبقول، حتى تفهمو عليّ أكتر رح خبركم هالقصة..
في إنسان لاقى بيضة نسر، بيوضعا مع بيض دجاج.. وهيك بفقسو الصيصان وبعيشو مع بعض، وكان النسر معُن ياكول ويشرب، ويتصرّف متلُن..
وبيوم من الإيام، بشوف نسر عم يطير ويحلّق بالسما.. بيسأل: شو هيدا..؟؟
بقولولو: هيدا من عالم السما، ونحنا من عالم الأرض..!!
وهيك بكمّل النسر حياتو، هوّي ومفكّر حالو صوص، وبموت من دون ما يعرف إنو هوّي نسر…
***
مع بداية هالأسبوع، شو مهم نعرف مين نحنا؟؟؟
نحنا أبناء الله، ومش من هالأرض؟؟؟
مع بداية هالأسبوع، شو مهم نقدّر هويتنا الحقيقية كأبناء الله، ونعرف إنو نحنا على الأرض زوار، دعوتنا ما نخلّي جاذبية الأرض تحجب صورة الله اللي فينا.. ولكن على العكس لازم نحافظ عليا، ونعكس جمال هالصورة أدْ ما تكبر التجارب، وأد ما نتحارب، لأنو ما في هوية اهم من نكون أبناء الله…
