Agoraleaks Agoraleaks
✝ تعوا نستفيد من الثقة الكبيري والحرية.. (مارينا شليطا) 🙏
متعهّد صرلو زمان بيشتغل بشركة مهمة، بينطلبْ منّو يبني بيت مثالي، وبحسب الهندسة اللي بريدها، وبالمكان المناسب، وقالولو:
ما رح نسأل معك عَ التكاليف.. إستعمل الأفضل.. بدنا ياه يكون بيت الأحلام..
بلش المتعهد بالتنفيذ مباشرة، وقدام هالثقة العميا صار يفكّر:
- شو بصير إذا حطيت مواد باب تالت؟؟
- أو إذا شغلّت حيالله حدن بهالمشروع؟؟
- هيك هيك صاحب البيت، غاضِض النظر..!!
لمّا خلّص العَمَار ، وإجا وقت تسليم البيت، كانت المفاجأة؟؟
صاحب الشركة قلّو للمتعهد: هيدا البيت هوّي هدية الك.. كعربون شكر على كل تعب تعبتو بهالشركة..!!
***
قديه هالمتعهد بيشبه ربنا،
عاطينا ثقة عميا،
وحرية،
حتى نبني حياتنا بالأسلوب اللي بدنا ياه..
وقديه أوقات عم نكون مهملين بحق ذاتنا…
تعوا اليوم بهالصوم، نبني حياتنا على صخرة الإيمان لأنو بيوم من الإيام رح نوقف قدام هالبناء، ونفرح أو نخجل من يللي عمناه..
والدعوة النا أيضاً، بمطرح ما كنّا، وبأي مجال عم نعمل… نشتغل بدون إستغلال الثقة العميا اللي بتنوضع فينا.. لا بل تكون الثقة الكبيرة مفتاح لمسؤولية أكبر..
