بالصوت جيسكار لحود لسامي الجميل: كبار وروق.. في اوقات لازم نسكت (audio)

 

– عم تلعب بيت بيوت كبار شويْ – لا بتعرف تنكّت وبدك تعمل عادل امام…

دقيقة “صمط” مع جيسكار لحود على إذاعة “صوت المدى”:

لما تجوّز سامي الجميل استبشرت خير وقلت هالشب رح يروق ويِركَز ويركّز وخاصة انو بوقت من الأوقات، حسيت إنو طالع طلعتو،

بس للأسف يوم عن يوم عم اتأكد إنو سامي مش عَ قدْ المسؤولية،

ومش عَ قد توقعات الناس.

وما بعرف ليه، كل كل ماشوفو عم يحكي، او عم يتعاطى بالسياسة بحسّو عم يلعب “بيت بيوت”

وبعدان يا استاذ سامي، مش عَ طول بدنا نبرعط، وننطنط، ونفزفز بس كرمال نجرّب نبيّن حالنا

هيدي قصة تَ تشدّ البنات، لازم تحطّ “gel” عَ شعراتك، مش هون محلا.

بدك تنسالي “الناضور” و “الستارة” بالمجلس، و”ميريام كلينك”، في بلد بدنا نشيلو من الجورة نحنا وياك، بس ما كبار شويْ

نضاجْ.

طيب لا كاريسما، ولا معلومات، ولا خبرة، ولا بتعرف تنكّت، وبدك تعمل عادل امام.

Ok  يمكن نيتك صافية، ما عم تعرف؟

تعلّم

والله انو حابين نحبّك، بس خلينا نحبّك!

في أوقات لازم نسكت، ونتأمل ونتسمّع، ونعترف بهزيمتنا وبفشل تكتيكاتنا السياسية ورهاناتنا

بدك تعرف تخسر عَ السكتْ. تَ بالمستقبل كمان تعرف تربح عَ السكتْ.

متل ما عمل الرئيس ميشال عون.

مش عيب تتعلم من الكبار ومن تفاهمات الكبار

سامي الجميل الطريق قدامك طويل.

وفيك تكون من أساسات المستقبل إذا بتروق.

روووق، وما تزعل منّي، لأنو الراحة بالصراحة.