الأب كميل مبارك: بجوز أترشّح لإنتخابات مجلس الشيوخ النيابية لاق.. وبموضوع مرسيل غانم ما بيزعل، إدارتو كانت خاطئة (Audio)

– هالسنة ممنوع يدفع المواطن فرنك، لكن عنا 600 الف مواطن بعيشو عَ حساب الكنيسة.. 
– يا مغشوشين وعوااا.. ليه عم تعطونا رقم غلط عن الفلسطينيي.. !!

***

مقتطف من حديث الأب كميل مبارك في حديث لقناة الـ”otv”: (كانون الأول 2017)

عن وجود الشر

• العالم كل عمرو هيك، سيدنا المسيح لمّا تجسّد وتألّم وِنْصلب كرمالنا، ما الغى الموجود بالدنيْ، بس عطاه معنى جديد. غفر الخطايا وسَمَحلك إذا بدّك انتا (إن شئت) لأنو عطانا كل الحرية تمشي بتعاليم الكنيسة..
• اللي بقول ما بدّي، حرّ.. وفي كتير ناس عم يقولو ما بدّي، ميشان هيك في شرور وخلافات وانقسامات.. وكل انقسام بالدني هوي من عمل إبليس.. حتى بيقسم الإنسان على حالو، وبصير في قوى تشدّ فيه طلوع، وقوى تشدّ فيه نزول.. ونحنا مش عم نحارب ناس عاديين، مار بولس بقول: انتو عم تحاربو قوى روحية شريرة، بدكم تتسلحو بسلاح الله، وبغير سلاح الله ما بتقدرو تتغلبو عليها..
• المدافع والرشاشات ما بقيمو حدا اليوم.. في نوع من الشياطين لا يخرج الاّ بالصوم والصلاة…

عن الوضع في لبنان

• نحنا ماشيين نحو الأفضل. وخطوة الـ1000 ميل تبدأ بخطوة، ما فينا نعمل عجيبة بيوم..
• الوضع الحَسنْ عم يتطوّر نحو الأحسَن إن شاء الله، ولكن بضل في ناس يحطو عصي بالدواليب، بس بعتقد انا هالمرّة الدواليب رح يكسرو العصي. مش العصي رح توقّف الدواليب.
• في ناس مش بسهولة بيطلعو من المزرعة، بالنهاية رح يبطّل في مزرعة.

إذا عددّنا اللي جرى بهالعهد:

– موازنة: صار في موازنة
– قانون إنتخاب: عملو قانون انتخابات
– سلّم رتب والرواتب، وغلاء المعيشي، والتشريع الضريبي..
– تحرير عرسال…
– تعيينات أمنية وقضائية..

عن الحرية الإعلامية

• منحلم يكون في حرية إعلامية، ومنرغب، ومنشتغلها، ومنحبها، ومنقدسها.. ولكن ما في إعلام حرّ بمعظم العالم.. وأدْ ما يدعّي الإعلامي انو حرّ منّو حرّ.. والصعوبات اللي بتقيدّلو من حريتو:
  1) التزامو بالمؤسسة اللي عم يشتغل فيا
  2) التزامو بالسياسة اللي عم ينهجها
  3) التزامو بالممولين للمؤسسة أو بالداعمين (كلمة أفضل ومهذبة)
  وإذا زدنا عليُن: الإعلانات والمداخيل..
  من بعد 3 التزامات عم تدعّي الحرية..
• في مؤسسات اليوم بتقدر تشتري عليا مساحة معينة، وبتقول اللي بدّك ياه، عَ طريقة “هايد بارك”.. ولكن نحنا ما عم نقول وضعنا بالحضيض، منشكر الله انو نحنا بمستوى العلاقات الشرق الأوسطية والعالمية منعتبر انو لبنان إعلامياً من بين الجيدين..

مرسيل غانم

• القانون فوق الجميع، وكل الإعلاميين عم يقولو نحنا تحت القانون. بيُخطر ببالي قصة مرسيل غانم، (صديقنا) ليه وصلتْ هالقد القصة…!! بالبداية كانت استمزاج رأي، شوي كِبرتْ وصار يطلع كلام شي يمين، وشي شمال..
• صار شي ممكن، وإذا زعل مني مرسيل غانم شوي، ما رح يزعل.. صار في سوء إدارة لما جرى..

يسأله غابريال مراد: من الطرفين أو من طرف واحد؟

• أوّل شي هوّي بلش.. أنا بدي آخود رأيك بموضوع معيّن.. بتنشر عرضي!!! طوّل بالك..؟؟
• هذا التدبير اللي صار وسّع الخرق، وصار في مناصرين ومش مناصرين، ودخلت السياسة..

عن الأقساط المدرسية

• لما منسمع الأخ… ما فينا نسدّ دَيْنِتنا إنو مش موجوع، في حلول كتيري، اقترح فخامة الرئيس الحل، تضامن الدولة مع المدارس والأهالي.. والقصة بدها عين ساهرة. من الدولة أولاً، ومن المواطن ثانياً، ومن الضمير العامل في هذا المجتمع ثالثاً…
• المسألة مش بس المدارس الكاتوليكية، (شيلو هالبرداية اللي بتغطي نص المدارس الأخرى) كل المدارس الخاصة:
  – الكاتوليكية،
  – الإنجيلية،
  – الأرثوذكسية،
  – العلمانية.. يمكن منقول المدارس الكاتوليكية لأنو الواحد بيعتب على امّو أكتر من غيرا..

الحل..

• ممنوع السلطات مالكة المدارس، (مجلس البطاركة والأساقفة – الرؤساء العامين، الرؤساء العامات – مرجعيات أخرى) يتركو المسؤولية على الخوري رئيس المدرسة، أو على الراهبة رئيسة المدرسة.
• انتو بدكم تتحملو المسؤولية، الكبار.. تفضلو اجتمعوا، وشوفو شو بدكم تعملو.. السنة ما تدفعو الأهالي ولا فرنك.. انتو بتغطّو العجز، وما تتكلو عَ الدولة، لأنو منا قادرة..
• كانت الكنائس عم تحمل عبء كبير عن تقصير الدولة، فكمان الناس يطولو بالن… بالزمانات البطريرك بايام الحرب الأولى، والمجاعة رهن صليبو، ورهن عدّة الكنيسة لَ يطعمي الناس.. ما حدن يقول ما معي.. يقول ما معي كفاية..
• انا بحكي هالكلام مش كمان نكسر الكنيسة، ولا بقبلْ، وهون بدعي الناس ليوعو لمسألة كتير دقيقة، وخطيرة.. في عنا بلبنان مش متل إحصاء الفلسطينيي… عنا 600 الف مواطن  بعيشو على حساب الكنيسة، وبكل المناطق اللبنانية.. (600 الف مواطن مش عيلة، يعني إذا ربّ البيت عم يشتغل وعندو 5 أشخاص، منحسبو 6..)
  – العاملين بالمدارس
  – العاملين بالمستشفيات
  – العاملين بالأوقاف
  – العاملين بالأملاك..
  وصحيح انّو معظمن مسيحيين، ولكن مش كلن مسيحيين، في من طوائف أخرى، إسلامية أو درزية… الناس بدها توعا إنو إذا سكرّنا أبواب الكنيسة، رح نسكّر 600 الف… لاق ما رح نخلي هالأمر يصير…
• قصة الميزانيات منها قصة آلة حاسبة.. في خبرة بالحقل التربوي.. عَ وين عم تصرفْ، ومن وين عم تقبض؟؟ إذا ما عندك هالخبرة آلة الحاسبة بتبيّنلك انك خسران..

الفلسطينيون

• ليه عم تعملو إحصاء؟ شو السبب؟ ما الن عنا من سنة 1948، هلق فقتو تعدوهم؟؟ في مشروع مخفي ما قلتولنا عنّو، ودايماً اللي بكون تحت الطاولة، بكون مش لصالح المجتمع اللبناني.. وليه عم تعطونا رقم خطأ.. !!
• إذا في مشروع مغطّى من الأمم المتحدة، فهي بشخص “بان كي مون” قال أكتر من 10 مرات، وطنّوا السوريين ببلادكم، ووطنوا الفلسطينيين ببلادكم؟؟؟ فحتى يبلعونا ياها، بصير يعطونا أرقام صغيري.. انو 174 ألف أو 200 الف بينحملو…؟
• يا حبيبي عنا 460 الف فلسطيني، وعنا مليون ونص نازح سوري.. صارو مليونان شخص، ونحنا اللبنانيين 4 ملايين، عم تجيبو عَ قدْ نص اللبنانيين وتحطوهم بلبنان… يا “بان كي مون” ويا أمم متحدة، ويا حضرة المغشوشين، وعوووووا.. لا للتوطين ونعم لحق الدولة، مع انو صارت “يافطة” خشبية.. 
• عملياً هذا القرار مرفوض، وهذا الإحصاء مرفوض. عنا إحصاءات أخرى.. هيدا خداع. المنطقة عم تغلي ومضعضعة.. لاق حبيبي طويلي عَ رقابكم كلن..

القدس

• إعلان القدس عاصمة يهودية، ينعكس سلباً على، المستوى الإنساني العالمي، وعلى المستوى الثقافي العالمي، لأنو في تراكم حضاري عمرو 6 آلاف سنة.. مينك انت حتى تجيرّوا الك؟؟
• المعروفين بالتاريخ:
  1) من أيام الملك “ملكيصادق” اللي كان قبل إبراهيم الخليل، كان هوي ملك أورشليم. ولما اجا إبراهيم ما كان عندو شبرْ أرض.. إجا لعند ملكيصادق، قدملو ذبيحة كناية عن خمر وقمح (برغل) وطلب إذن حتى يبخششوا الملك “ملكيصادق”…
  2) الأمبرطوريات الثقافية العديدة: كنعانيين ، الفينيقيين ، الآراميين.. كل هودي مرقو على القدس وباركوا القدس، وتباركت منها القدس…
  3) الأمبرطوريات العسكرية: بلاد ما بين النهرين (نبوخذ نصّر اللي شحط اليهود قبل 500 سنة ميلادية) الفرس .. اليونانية.. الرومانية.. العرب.. الأتراك… لمين القدس؟؟
• القدس عاصمة ثقافية.. البعض بحبو يقولو، عاصمة للديانات التلاتة، حلو.. بس ما بكفي؟؟ لأنها كانت موجودة قبل الديانات التلاتي.. واليوم من سنة 1967 أخدوها اليهود.. وعم يستوطنو ويعمرو ويحتلو أحياء.. وفي بالجوارير 86 قرار دولي..

يُسأل عن تداول إسمه في الإنتخابات النيابية في دائرة عاليه، يقول:

• لاق مش وارد، بالمرة الماضية، الكنيسة أخدت قرارا، وقالت مش وقتو، ومش لصالحنا.. قلنالها: نحنا ما منختلف مع الكنيسة امنا.. لا لأجل أمر جيّد، ولا لأمر منو جيّد.. مستحيل نختلف.
• لاق مش مرشّح على الإنتخابات، إذا عملو إنتخابات مجلس شيوخ، موضوع آخر، بجوز اترشّح..

رصد Agoraleaks.com