Agoraleaks Agoraleaks
– كل إنسان مدعو الى: تقديس البيعة والميلاد والدنح والصوم والألم فالقيامة والعنصرة…
***
عظة الأب مروان خوري عن الزمن الليتورجي اللي محورو يسوع، في لقائه مع الكشافة (تشرين 2 – 2017)
الكنيسة من خلال الزمن الليتورجي، بتاخود حياة يسوع وبتعيشنا كل الأحداث اللي عملن يسوع لخلاصنا. ومنبرم حواليهم بصلا ليتورجية ببحر السنة..
- تقديس وتجديد البيعة (أول أسبوعين) شو يعني؟؟
. يعني انت عضو مدعو للقداسة بالكنيسة. القداسة هيّي نعمة متل الشمس. كل يوم بيشرق نورا، وما بتستثني حدا.. الاّ اللي بسكّر عليا، وبيقعد بالعتمة. قداسة ربنا متل الشمس، كل يوم بكبّ نعمو عَ كل البشر.. لكن الناس مش فاتحين موجة عَ الله، ميشان هيك ما بيلقطوها هالنعمة… عندن غير مشاريع..
. بأسبوع تقديس وتجديد البيعة، الكنيسة بتذكرني، بإنو أنا مدعو حتى كون قديس. والقداسة مش معناتا روح إقعد بمحبسة او بمغارة، او فوت عَ الدير.. بالموقع اللي اختارك الرب، إذا بتعرف تعيش عملية الحب الإنجيلي، بتصير انت قديس…
. القديسين ما صارو بالأعمال العظيمة قديسين، صارو بقوة حب صادق، حبّو في الله + وحبّو في الناس. بتقدر تحب بالموقع اللي انت فيه.. الأم ببيتها، المسؤول بشغلو..
ومن بعدا تبدأ الأحداث الخلاصية - الميلاد
شو بحاول يخبرني الرب، قبل الحدث الخلاصي في شخصيات حضّرت لمجيء المسيح.. شو بدّو يقلي؟؟ الرب مجيتو بمجتمعنا، منها ارتجالية.
. الله بيجيْ بواسطة أشخاص بحضرو مجيئو..
والكنيسة لما بتحطلي أشخاص بأحداث متل:
– بشارة زكريا
– بشارة العدرا
– زيارة العدرا لأليصابت
– البيان ليوسف
– الرعاة
– مولد يوحنا
كل هودي ساهمو بمجيء الرب.. والكنيسة بتقلي أنا واحد منن.. أنا مطلوب مني ساهم وصّل يسوع لنفوس كتيري الرب بحطّا عَ دربي كل يوم.. ومفروض الإنسان يعمل فحص ضمير.. حياتنا إعاقة للنعمة او من خلالي كلمة الله بتوصل؟؟ حريتنا هيي اللي بتسهل مرورو.. الميلاد ومجيء المخلص منها خبرية من 2000 سنة.. في كتير من النفوس بالعالم ما بيعرفو شي عن يسوع؟؟ والرب متكّل عليّ إني أنا خميرتو… وهوي بقول: إذا فسَد الخمير، كارثة؟؟ إذا المسيحي بطّل هوي الواسطة من خلالها الرب بيعبر للنفوس المتعطشة….
ومن بعد الميلاد، بيجي.. - الدنح.. شو يعني العمادة
الكنيسة بتذكرني اني أنا معمّد… شو يعني تعمدّت؟؟
العمادة للأسف مش فيلم ضبيناه عَ الرف، منا حفلة فولكلورية..؟
انت بالعماد متل الزوج، بسر الزواج بتصير تخصّ شريك حياتك، ممنوع يحب / تحب غيرا / غيرو..
إنت بالعماد صرت تخصّ الله. ممنوع قلبك يعبد غيرو؟؟
فوتو على القلب وتفرجو قديه في خيانات للرب كل يوم بحياتنا..
قديه في اشخاص وقديه في عبادات على القلب، تملكت فيه وشحطتْ الرب..
شو يعني تعمدّت؟؟
شو فيك بيشبه الله؟؟
بقولو الولد بيشبه بيّو؟؟ بالعماد الرب تبناك، انت إبنو، وهوي بيّك.. بشو بتشبهو؟؟ إطلّع بنوعية كلامك، كم مسبّة بتقطع بالنهار؟؟ إطلّع بأفكارك وبقلبك مين بتحبّ؟؟
إذا اطلعنا بأفكارنا وبقلبنا، منعرف إذا ماشيين بمواعيد عمادنا إيه أو لاق؟؟؟
ومن بعد العماد منفوت عَ.. - الصوم
الكنيسة عم تمشي معي مش حتى تعيشني فولكلور ليتورجي؟
الكنيسة عم تعلمني حتى تصير حياتي تشبه الله.
هيدا معنى مجيء الرب عَ أرضنا. نحنا بدنا نصير متلو.. ولاد السما.. لأنو حريتنا تغربّت عن الله. صرنا نشبه كلشي الاّ ربنا. ميشان هيك صار الإنسان مئذي.. بالصوم بتعلمني الكنيسة انو الحياة مش أكل وشربْ..
الصوم مش انو وقّف عن نوع من الأكل وكم ساعة. الصوم بحقيقتو، إنو فضّي كلشي مَلَكْ على حياتي وصار آخد كل وقتي واهتمامي، وارجع لربي.. الصوم مش إنقطاع عن الأكل للساعة 12 ضهر، وبعدو قلبي عابد وثن..! الصوم انو يصير الله هوي الحب الأول. ويصير الله مالك على قلبي.. وهيدي منقولا بالأبانا، “ليأت ملكوتك” بس منكررها متل المسجلة.. شو يعني ليأت ملكوتك؟؟ يعني إنت بتتملك عليّ.. وحياتي تعيسة لأنو مَلَكها أغراب، وصار قلبي عابد هيدا العالم ومجدو… بالصوم بتقول لَ الله: يا رب رح أتخلى عن مباهج هالدني، حتى ترجع ملوكيتك عليّ..
ومن بعد الصوم، بيجي.. - الألم
أحداث الألم شو معناتا؟؟ مش معناتا تجي تعمل واجبات مع الله، ونهار جمعة العظيمة الناس بتصير لبرا. ومن بعدا الكنيسة بتفضا.. شو هيي واجبات عم تعيشا مع الرب..!!! إنو الله مات، منجي نعزّي؟؟؟
شو هوّي حدث الألم؟؟ منعرف شو معنى الرب تألم؟؟
خطاياك فيُن حكمْ !!! وهيدا الحكم آخدك على دينونة؟؟
إجا الرب دفعلك حق الحكم.. لحتى ما تروح عَ الدينونة، لَ تروح للحياة.. وهيدا الحكم عطاه الرب للكاهن، حتى بكرسي الإعتراف يلغي خطيتك، والحكم..
والكاهن بكل ذبيحة الهية بالقداس، ذبيحة يسوع بتتجدّد ، واللي صار عَ الصليب بينعاد.. ونحنا أقلّ شغلة بتطيّر القداس من حياتنا؟؟ الهنا عم يدفع خطايانا، ونحنا ملهيين بشي تاني.. ملهيين بِ:
– زيارة صغيري
– نومة
– إنشغال
– طبخة… !!
ومن بعد الألم، بيجي - القيامة
بالقيامة الرب انتصر، ممنوع تعيش بالتعاسة..
تعيس، لأنك مش عم تعرف تاخود من هالنعمة اللي عطاك ياها الرب…
ومن بعدا بيجي.. - العنصرة
هوي زمن الروح.. الروح اللي قال عنو الرب رح يبعتلنا ياه، حتى يفهمنا كل حقيقة الخلاص.. وشو معنى الوهية الله.. وننتبه بس بدنا نحكي عن الرب، ما فينا نحكي عن اله تعلمتو بالجامعة.. أنا ما بحكيكن عن يسوع لأنو درست لاهوت. بلاهوتي ما بقدر خبركم عنو… العقل عاجز والكلمة عاجزة عن فهم الله الرب..
بالروح القدس ايه.. بقول يسوع للرسل، الأن لن تفهمو شيء، لكن سأرسل لكم الروح،وهو متى جاء سيُذكرّكم بما قلته لكم، ويجعلكن لي شهود..
الروح القدس هوي الوحيد اللي بيقدر يدخلك على الوهية يسوع، وبلاه ما بتقدر تفهم شي عن الله. بصير الله خبرية بحياتك مش أكتر. وبتصير انت مؤمن لأنك ورثتو، بس منك مسيحي.. الروح القدس بخليك تصير مسيحي.. ومن زمن العنصرة بترجع الكنيسة بدورة جديدة نبرمْ حول حياة يسوع..
أحبائي،
هيدا هوي الزمن الليتورجي، يسوع معلمنا، ومرجعنا، ما تتعلمو الاّ بمدرستو.. قروه الإنجيل، وتعو عَ الكنيسة سمعوه، وسمعو الشرح عنو.. تعمقو بكلمة يسوع.. لأنو كل ما تعرفنا على يسوع كل ما كبرتْ محبتنا الو، وكل ما ازدادت نعمتو فينا..
النعمة متى حلّت، بتلاقو الخطية إنطفتْ، والإنسان بيتحوّل من كائن مئذي الى كائن خيّر.. هيدا اللي بحاجة الو بلدنا، وهونيك التغيير بصير..
منصلي بهالأمسية وبهالليلة، وكل مرة بتقدسو، اعرفو مقار محبة الله النا، ما تستلشقو بهالمحبة، وخلو يكون القداس محطة غالية بحياتكم..
منصلّي لأحباءنا الكشافة حتى الرب يقدسن، ويثبتن.. وتكون ايامكن سعيدة ومفرحة…
رصد Agoraleaks.com
https://www.youtube.com/watch?v=lMbMrN77lNU&feature=youtu.be
