Agoraleaks Agoraleaks
– يا رب كتار من الناس بخافو منك، وبيرتبطو معك بحسابات، ويفتكرو بالصلا انو بيرضوك، تما تغضب علين
***
سجود أمام القربان المقدس مع الأب مروان خوري (21 تشرين الأول 2017)
1-
- قلت يا يسوع بالإنجيل:
من يحبني، يحبه أبي، اليه نأتي، وعنده نجعل منزلاً…
شو حلو هالكلام يا رب.. الحب هوي اللي بِعَيطلك.. وما في غير المحبة بتجيبك لعنا.. - أوقات كتير منختبر،
منصلّي.. منصلّي.. ومنشوف اله صامت قدامنا،
قليل ما منعمل فحص ضمير، إذا نحنا اللي عم نصلي، في محبة بقلبنا…
لأن يا رب.. الحب بخليك دايماً حاضر معنا، وبتصير حياتنا بيت الك.. ما بتعود تفارقنا.. - علمنا انو نحصل على المحبة، الكنز اللي بخليك دايماً معنا..
علمنا ما تخلي الخطية تقتل الحب فينا، وما نخلي روح العالم يقتل روح المحبة بداخلنا.. - علمنا يا رب أجمل صلا تكون عنا، هيي أفعال محبتنا، والصلا اللي نابعة من قلب محب..
- حرّر حياتنا من كل العوائق اللي بتمنع المحبة،
حتى يكون حضورك شفاف وصادق.. - علمنا يا رب، انو اللغة اللي بتفهم عليا، هيي لغة المحبة..
هيدي اللغة، أياً تكن الأديان اللي مننتمي الها،
وأياً تكن الطوائف،
وأياً تكن معتقداتنا..
القلب اللي بحبك، بجيبك لعندو.. وبصير مسكن الك.. - علمنا انك منك اله الأديان، ومنك اله منوصل لعندك باسم الدين.. علمنا انو المسحيية هيي فعل حب.. وكل إنسان عَ وج الأرض هوي مسيحي.. أياً تكن الوانو أو صفاتو أو معتقداتو…
- علمنا ننشر حضارة المحبة، وتكون محبتنا نوعية مميزة عن محبة الناس..
عطينا قلب متل قلبك بحب.
عطينا أخلاق متل أخلاقك..
وأفكار متل أفكارك..
ساعدنا حتى نغيّر وجّ العالم، ونطفي الشر فيه، بقوة الحب اللي منحبك ياه، واللي بتحبنا ياه..
الك المجد الى الأبد آمين
2-
- يا رب قسمت العالم قسمين..
قسم سميتو حكيم
وقسم سميتو جاهل..
أرجوك يا سيدي، ما كون بمصافي الجهال..
بتختلف حكمتك عن حكمة هالدني… - بنظر هالدني، الجاهل هوي اللي ما بيتعلّم.. او اللي ما عندو مركز مرموق بالمجتمع… او ما عندو وظيفي مهمة.. هيدا منبعد عنو، ومنعتبرو حظو سيء بالحياة وجاهل..
لكن بحكمتك يا رب، الجاهل هوي كل انسان، غني بالدني، وفقير بِ الله.. - انتا اللي قلت المتل بالإنجيل، يا جاهل، في هذه الليلة تُطلب نفسك منك، وهذا الذي أعددته لمن يكون!!
- علمني يا رب اني كون بهالحياة حكيم..
لأن حكمة السما غير حكمة حكمة الأرض
الإنسان الحكيم عندك والذكي، هوي إنسان عرف إرادتك، وعاشا..
هوي إنسان تبنّى مخططك، وجعلو أسلوب حياتو.. - علمني يا رب، ما إنجرّ بحكمة هالدني…
وبتفاهاتا، وتزييفا.. - علمني اطلب حكمتك، وكون من مصاف حكماء أبناء السما.. حتى لو اُنتقدت، وإستهزئت من أبناء هيدي الدني.. واعتبروني مجنون، أو جاهل.. بيكفيني يا رب كون بنظرك حكيم لأني أخدت قرار امشي بحكمتك..
- يا رب إنتا بتعرف بهالحياة، قديه في إغراءات، وقديه في أهواء، وجسدنا قديه متطلباتو كبيري.. ممكن إنو يفرض حالو علينا.. وبلحظة انو نصير برات مشيئتك وارادتك…
- ما تسمح يا رب، انتا اللي قلت بالإنجيل.. الجسد ضعيف، أما الروح فمستعدة، ما تخلي رغبات الجسد تطفي رغبات الروح، خلّي العكس، اغلب بروحي، وخضّع جسدي لرغبات روحي…
- خليني اعرف، إنو اربح الأبدية، لو خسرت هالدني..
خليني كون حكيم، وما أجّل توبتي..
إشتغل على نفسي.. وكأن موتي قريب..
علمني يا رب إمشي بأفكار إنجيلك، هيي فيا النور والحياة الأبدية، واستعمل هالدني وسيلة حتى أوصل فيا لعندك.. - منشكرك يا رب انك عطيتني حكمة الإنجيل.
ومنشكرك إنك عرفتني على ارادتك،
وبشكرك اني انا مسيحي، وبصلّي، حتى كل الكون يعرفك.. ويعرفوك انو ما في غيرك اله ومخلص..
الك المجد الى الأبد آمين..
3-
- قلت يا رب بالإنجيل، انو نحنا المسحيي لازم نكون سراج، خاصة بعتمة المجتمع..
وبتقول، انو مش لازم السراج يكون مخبا،
انما يكون بمطرح عالي.. تيضوي بنورو عكل العايشين بالظلمة - بتطلب منا يا رب، انو نشهد ببطولات المحبة الصغيري. امام عالم رافض الحب.
بتطلب منا التضحيات بأماكن، والتنازل عن حقوقنا..
بتطلب منا ما نتراجع حتى عمّا هوي حق لالنا، وعن كرامتنا..
بتطلب منا نغفر حتى لَ يللي أذيونا..
بدك بقوة الحب نضوي بعتمة الغضب.. وبعتمة الإنتقام، نضوي ونبيّن بشاعة العالم.. - يا يسوع اللي طلبتو منا كبير، وصعب علينا، منقرّلك الليلة انو نحنا ضعاف، جربنا كتير انو نكون شهود الك، وبمطارح كتير انكسرنا، وغلبتنا طبيعتنا، وكبريائنا، بمطارح كتيري، بدل ما نشهد لحبك، فقدنا أعصابنا، وتصرفنا بطريقة دنيوية..
- يا رب كل مرة، بقرّر وبوقع، وما بقدر اوفي.. بتذكّر انو إنت اللي بدك تربح فّي.. انت اللي بدك تضويني وتجعلني نور بعتمة الدنيْ..
- بتذكّر انو بعد ما سلمتك كلياً ارادتي وحياتي، قلبي وأفكاري، قراراتي..
كل مرة بسقط قدام الخطية، وكل مرة بنغلب بالتجربة.. بعرف انو بعد ما صليّب كفاية.. وبعد ما اتحدّت فيك.. وبعدا روحك عاجزة عن العمل اللي بداخلي… - علمني يا رب انك بتكبر فيّي بالغيمان والثقة،
علمني اني إمنحك ثقتي، وأمنلك عَ حياتي..
علّم حريتي، تكون مطواعة كلياً الك.. وتكون خاضعة بقراراتا لالهاماتك.. حتى يا رب اقدر اطلب فعلاً اللي طلبتو مني بالإنجيل، واقدر اشهد وكون منارة أمام عالم رافض لحبك… - ساعدني يا رب، ما انغلب بأفكار هالدني، وكون مؤمن انو افكارك هيي أفكار الصح.. وحقيقتك هيي الحق، وما نادي وبشّر الاّ فيك.. وشوف خدعة ابليس اللي بسوقا الي بأفكارو الجهنمية، وبكل الرغبات السيئة اللي بحطا بقلبي.. يا رب امحيا واجعل رغباتك المقدسة بداخلي، وافكارك الحلوة هيي المسيطرة عَ ذهني.. واجعل من حياتي وكل قراراتي وتصرفاتي نور بيتعزّى فيون كل إنسان ضايع بهالحياة..
بمجدك وبسبحك الى الأبد آمين..
4-
- كلماتك يا رب بالإنجيل، عند ما منتأمل او منقرا فيا.. بتعبّر قديه في من الحب والعذوبة بقلبك تجاه البشر.. غريب يا رب كتار من الناس بخافو منك، وبيعتبروك اله قاسي.. وبيرتبطو معك بعلاقة حسابية.. وبصيرو يفتكرو بالصلا انو بيرضوك..
تما تغضب علين…
تما تكبُن بجهنم.. - يا رب انجيل اليوم بخبّر عن عرس،
عريس دعا اللي بحبن على عرسو..
بيكفي نتأمل بعذوبة هالكلمات، ونعرف انو علاقتنا معك هيي علاقة عريس بعروستو…
مش علاقة قاضي بمحكوم عليه بالموت.. - يا يسوع منسلمك افكارنا، حتى تصلح صورتك فينا..
وذهننا يسيطر عليه صورة البيْ.. ويقوا حبنا كأبناء الك..
والحب بحررنا من الخوف منك.. - يا رب علمنا نطمح بمحبتك، ونشبع منا..
محبتك اللي بتشفينا من كل نقص الحب من الناس لالنا..
حبك هوي بعوّض عن كل الإساءات اللي صارت بحياتنا،
حبك اللي بيشفي ماضينا..
حبك اللي بردّ الفرحة لالنا… - كتار الليلة من الموجودين بالكنيسة، بيحملو ندوبات بقلبن، وأحزان، ونقمة، وماضي منو حلو، ومشاكل تقيلي علين..
يا رب خليُن يحسو بحبك، وباهتمامك فيون.. ويكتشفو انو هني هالقد غاليين بقلبك، وانك هالقد بتهتم فيون، وهالقد حاضر بحياتن.. ساعدنا يا رب ما يبقا ايماننا ايمان العقل، وايمان التقليد.. انما نختبر هالمحبة يللي بحبك ياها، وبتحبنا هيّي.. - ساعدنا يا رب انك تصير بحياتنا اله معيوش، مش اله..
– الأفكار
– والنظريات
ساعدنا يا رب حقيقة ارتباطك فينا، وعطفك علينا.. - باركنا يا يسوع، وحررنا من كل ظلمة الجهل، و عطينا بروحك القدوس قوة الإختبار لحبك الإلهي..
الك المجد الى الأبد، آمين..
