ايلي أسود عن استشهاد بشير الجميل، والإنتفاضات المتلاحقة، وفادي فرام وحبيقة وقبول جعجع بالإتفاق الثلاثي (Audio)

– سألت وزير الصحة حاصباني سؤال.. لهلق ما في جواب منو، بس بيجيني شتائم ونحنا ما منردّ عَ الشتائم

***

مقتطف من حديث نائب رئيس هيئة قدامى ومؤسسي القوات اللبنانية ايلي أسود لقناة الـ”OTV”: (20 تشرين الأول 2017)

يوم إغتيال بشير

• هالنهار كان مأساوي، وضرب صميم الضمير اللبناني،
  الناس كانو بحالة غليان وضياع تام.
• عشية الإغتيال 11 أيلول كنت انتخبت نائب القوات اللبنانية مع فادي فرام قائد القوات اللبنانية. وبقي الاجتماع للساعة 11 ليلاً، وانتخبنا.. وبقينا مع الرئيس بشير الجميل لحوالي الساعة 1 – 2 الصبح.. وطلعنا عند الرئيس كميل شمعون، وهنّانا.. وطلعنا بسيارتو الشهيرة “الهوندا” نعمل جولة، ووصلني عَ البيت..
• تاني يوم بتلفنولي، بقولولي: انو “الباش” جايي على الأشرفية…
  وبطبعي مني من الأشخاص اللي بتلزق عَ الشخص.
  قلتلن: مبارح بقينا للصبح.. خلّي يودّع الشباب.. وإذ بيطلع الإنفجار..
• في ممّر من مكتبي من بناية “السنا” لـ”السيوفي” (ممّر خاص) نطلع ع بيت الرئيس شمعون.. وصلت لعند شمعون، وكان الجو، (مات – ما مات) إشاعات متناقضة، وسؤال إن كان طلع قبل الإنفجار..
  حسيت الرئيس شمعون، متل مقتنع إنو حصل الإغتيال، وبقلي: لقد نالوا منّا..
  بعدان القصص أصبحت معروفة..
• النهار كان تعيس جداً،
  ورغم كل شيء، وصل رئيس جمهورية،
  وصار متل إجماع عليه، المسلم كما المسيحي انتخبوا..
  وفقدنا رئيس جمهورية، وبذات الوقت زعيم..
• الوضع بقلب القوات كنا وضع مأساوي،
  كان بشير رمز.. والشعار تابع للرمز..

المحاكمة

• 35 سنة إنقضت، وما في محاكمة.
  التحقيقات موجودة ومعروفة من زمن طويل.
  ولكن ما انعملت.
  يُسجّل للعهد الحالي، تحريك الملف، وللمجلس العدلي، رئيساً وأعضاءً المثابرة بهالموضوع. وتهانينا الن.
• الرئيس عون وقت إجا، قال: في سلطة قضائية مستقلة.
  وبالنهاية الحكم حصل بهالعهد.
  خلينا نكون واقعيين، بلا زيادة ونقصان. منقدر نقول: المجلس العدلي، مارس صلاحياتو كما يجب. ولقط الملف، وشاف وحاكم..

وهون السؤال: بشير حيّ فينا.. كتير منيح.. بس ليه حزب القوات اللبنانية الحالي ما أخد صفة الادعاء الشخصي، وليه حزب الكتائب ما أخد صفة الادعاء الشخصي؟؟؟

• اللي أخد إدعاء الشخصي، هوي العيلة وأهالي الشهداء يللي سقطو بالتفجير؟
  معقولي رئيس جمهورية معو أو ضدّو، ومعترف فيه..
  صار يللي عم يدعّي بقضية إغتيالو، هي فقط العيلة؟؟ 
  شي غريب!!
  كل الدور بحزب الكتائب وهوي اللي أنشأ حزب القوات..؟؟
• ما إدعوّا ولا حضرو ولا جلسة..!! شي غريب!!
  أحد المحامين يللي عم يدافعو، قلتلو: وينن؟؟ قلي: ما اجو..!!
• بالموضوع هيدا، نحنا واقفين جنب العيلة.
  نحنا رفاقو موجودين،
  عملنا هيئة قدامى ومؤسسي القوات اللبنانية، عم نشتغل أد ما فينا..
  ولكن المؤسسات القائمة (الكتائب – القوات) غريب هالدور المزدوج، بيدعو للمشاركة باحتفال ساحة ساسين، وبذات الوقت مش مدعيين..!!
• استيحاء القصة!!

ما بعد التفجير

• نزلنا على مقرّ القوات اللبنانية، بما يُسمّى بالمجلس الحربي.
  كنا بحالة ضياع وزعل شديد.. والوضع دقيق.
  والناس عم يبكو، وناس منهارة..
• جربنا قدر الإمكان، المجموعة اللي إنتخبت:
  فادي افرام وأنا إنتخبنا قبل بنهار، ومفروض نكون متمالكين أنفسنا،
  واللي حصل بعملية ضبط أعصاب، واستشراف المرحلة المقبلة..
• جمدّنا الوضع شوي..
  والبلد بدّو رئيس جديد..
  بوقتا، الرئيس شمعون كان متراجع وقت الشيخ بشير.. وكان في توجّه بهيدا الموضوع..
  ولكن بالنهاية تمّ إنتخاب الشيخ أمين الجميل

• ما كان الجو مريح بوقتا، بين الشيخ أمين وانصار بشير الجميل..
  كان في حساسية..
  ولكن إجا الشيخ أمين على المجلس الحربي، وصار اجتماع الليل، وكنت أنا موجود، وكان
  – زاهي بستاني
  – ايلي حبيقة
  – فادي فرام
  – بريدي
  – شارل غسطين
  وبالنهاية مشينا بالشيخ أمين، وحصل الإنتخاب..

توالي الإنتفاصات

فادي افرام – فؤاد ابي ناضر

في حينه، حزب الكتائب كان عندو ميل، إنو القوات اللبنانية يكونو حزب الرئيس. متل ما كان يٌال حزب الكتائب حزب الرئيس… (كان بدّن يمشو حزب القوات ضمن خط رئيس الجمهورية أمين الجميل)

• كان عندن الدكتور فؤاد أبي ناضر (رئيس أركان)
  مشيو فيه، عَ أساس بيعملو إنقلاب على فادي فرام…
  وهون الخطأ، لو بقي فادي، يبللي هوي إرادة بشير الجميل، وإرادة الشيخ بيار الجميل، وكميل شمعون.. وأنا كنت مع الرأي هيدا.. ما كانت حصلت الإنتفاضات..
• التغيّر يللي صار..
  فادي لمّا حسّ هيك.. قلي: انا كرمال ابقا، ما بريد تنزل نقطة دم..
  وكان قادر يبقا ويفشّل هالعملية..
  وطلب منّي امشي مع فؤاد ابي ناضر..
  ولكن بس إجا فؤاد ابي ناضر.. بلشّت مراكز القوى تبيّن، وحصلت الإنتفاضات

1. الإنتفاضة الأولى: 12 آذار 1985
2. الإنتفاضة الثانية: بقلب القوات – 9 أيار 1985
   صار في اتفاق من تحت الطاولة، ما بين سمير جعجع وكريم بقردوني مع أمين الجميل، وكشفها ايلي حبيقة.. وجاب الورقة الموقعّة.
   – فادي فرام في حينه بقلي: خلينا نجتمع.. وقلتلو: في فرصة ترجع انت رئيس حزب القوات…
   – بردّ: انو مضطّر يسافر، وبيطرح ايلي حبيقة، فوافقت.. وسمير جعجع والآخرين وافقوا على ذلك، وكانوا متفاجئين… تحت وقع كشف القصة (وحصل التصويت لصالح حبيقة)
   وفي حينه أصبح ايلي حبيقة رئيس الهئية التنفيذية بالقوات اللبنانية
   – من بعد ذلك، حصلت خضاّت، وصولاً لإتفاق الثلاثي..
   كلمة للتاريخ (جعجع كان مع الاتفاق الثلاثي)
   الكل كان ماشي بالإتفاق الثلاثي، والتصويت اللي حصل، مش مع أو ضدّ الاتفاق الثلاثي.. لاق؟
   التصويت حصل: إذا كان المثالثة داخل المناصفة في مجلس النواب، حين الإنتخاب، وليس حين التعيين.. وفي حينه ايلي حبيقة شافن مزعوجين، بيضربْ عَ الطاولة وبقول: انا بتصّل بأبو جمال بقلو، ما بدّي روح.. ولكن سمير وغيرو، بقولو: لاق روح.. ليه؟ لازم تروح..؟؟
   – وبحينه راح كريم بقردوني اجتمع بأبو جمال (عبد الحليم خدام) بهدف توزير سمير جعجع.. ولكن بجاوبو: انو عنا قصة سليمان فرنجية الرئيس الجد، وما فينا نطلع منها، وهو حليفنا..
   – وبوقتا بصير في الإنقللاب على الاتفاق الثلاثي..

العلاقة مع سورية

• العلاقة مع سورية كانت مضطربة كتير..
  وما كانو آخدينا بجدّ..
  وصارت عدة اتصالات مع السوريي، وعملها ايلي حبيقة مع عدة مسؤولين..
  المهم فُتحت خطوط، وانشغل على الاتفاق الثلاثي..
  وكان في اتفاق على:
  – وقف الحرب
  – إعادة المهجرين
  – تحسين الوضع الاقتصادي (كان الدولار واحد يوازي 8 ليرات)
  وبوقتا بيبعت ايلي حبيقةورا مسؤولي البنوك، طالباً منهم عدم التلاعب بالليرة اللبنانية..

العلاقة مع إسرائيل

• مع وصول ايلي حبيقة رئيس حزب القوات اللبنانية، 9 أيار 1985
  أوّل شغلة عملها، سكّر المكتب تبع الضبية،
  وجاب ليزبك كان مندوب القوات بالقدس.. وانتهت العلاقة مع اسرائيل
  وفتح على فرنجية، وعمل وفد..
• من بعد الاتفاق الثلاثي، وسقوطه.. واستلام جعجع القوات، نحنا ما عدنا تعاطينا..

• بقينا عَ جنب، وبكل صراحة لحين دخول الأشرفية من قبل الجماعات التكفيرية في 5 شباط 2006..
  كنّا نجتمع طبعاً،
  بس ما كان عنا نيّة إنقلابية، طالما موجود جعجع..
  كل واحد بشغلو وبعيلتو..الخ
• من بعد 5 شباط، يعني الناس صارو ببيوتنا..
  وينكم؟

هل بشير الجميل عميل إسرائيلي، يُسأل أيلي أسود، يردّ: 

• أكيد لاق.
  ما في حدن الاّ ما تعاطى..
  بيار الجميل، كان يقول: منتعاون مع الشيطان، بس نخلّص حالنا..
• وقت بتنزرك بالزاوية، وعندك شعب.. كيف بدّك تدافع عن نفسك؟؟
  كان في خطة توطين الفلسطيني على حساب المسيحي..
  و “دين براون” (المبعوث الخاص الى لبنان دين براون للرئيس فورد ) عرض عَ المسيحيين مغاردة لبنان.. وشخصياً شفتو بباريس بعد الاتفاق الثلاثي، وسألته عن الموضوع..
• وقت الإنسان بيندفش تيعمل علاقة معينة،
  وبوقتا السلاح ندفع حقو.. كل خرطوشة ندفع حقها للإسرائيليين..

بالنهاية اللي قتل بشير الجميل، هوي 10452 كلم2 وزائد جيش قوي بلبنان، وقيام الدولة

• وقت قدر جمع أُزيح..
  يعني موتو هوي صك براءتو من العمالة..
  يعني لو هوّي عميل بقي طيّب..
• هالرجل من بعد ما إنتخب رئيس، فتح على كلّ الناس، بقلب الوطن، من صائب سلام الخ.
  وكان الكل متأملين فيه، انو البلد يوقف.. ولكن قُتل..
  وقُتل كرئيس جمهورية، وملفو اجا على المجلس العدلي، وبالتالي، مقاربة الموضوع بشكل:
  – شرعي
  – قانوني
  وقت إجا المسلم انتخبو، ما بقا فيك تقول الإسرائيلي انتخبو..
  وطلع رئيس للجمهورية، وانفتح عَ كل لبنان.
  وصار في انتظام بالإدارة من قبل ما يستلم..

من كشف حبيب الشرتوني

• اللي كشفها ايلي حبيقة، ووقت كشفو للشرتوني، (كان في قرابتو – عمتو – بالبيت الكتائب يللي تهدّم..)
  وبوقتا، بشير الجميل، منّو هالشخص اللي فيك تسيطر عليه، بمعنى يكون عندو حرس، كان يزمط من الحرس، ويسوق سيارتو.. وكانت الشكاوى بهيدا الخصوص للرئيس الياس سركيس والرئيس شمعون، لإقناعه يطلع على القصر.. ولكن ما بيقنعْ، وبقي يتجوّل..
• وقت ايلي حبيقة كمش الشرتوني، سألو وين حطيت آلة التفجير، قلو: زتيتا بتنكة الزبالة..
  نزلو مطرح الزبالة، بقيو كل الليل، حتى لقيو آلة التفجير.
  وسُلّم بموجب محضر للرئيس الجميل..

عن التعذيب، والتنكيل بعيلتو… يقول: ما بعرف، وما كنت موجود، بعرف إنّو سُلّم للدولة رسمياً.. ونحط بالسجن.. وما بعرف ليه ما تحرّك الملف، مع إنو كانت المحاضر كلها موجودي.. والإقرار تبع موجود، والإعتراف موجود

• هالأسئلة عن المحاكمة لازم تنسأل للعيلة؟
  يللي بقدر قولو اليوم تحريكو.. مش قصة فضل لفلان او علتان.
  نعطى القدرة للقضاء بإنو انتو سلطة مستقلة، شرفو إشتغلو بكل الملفات العالقة..
• في ايعاز لرئيس مجلس القضاء الأعلى، مع التشكيلات القضائية ساهمت بالموضوع، وفي ملفات كتير إن كانت مدنية أو جزائية تحركت..
• حزب القومي بوقتا كان شقفتين، ومقسوم، وفي كتير بالموضوع، وما بدّي غوص فيا.. وهني عندن نظرة معينة.. وبقولو “العلم” توفى.. دايماً بأمور من هالنوع، لإخفاء بعض الأدلة بينحكى عن وفاة المنفذين..

في رئيس جمهورية إغتيل، وكان عم يمثّل كل اللبنانيين، وعم نحكي من الناحية الشرعية، طبعاً عندو خصوم، (متل وين مكان) وفي عندو أخطاء، وكلنا عنا أخطاء.. كل الناس عندا أخطاء.. ولكن في رئيس جمهورية إغتيل، وكان بمثّل و شعبي، ونظرة معينة للبلد..

ولكن

يسأله أبو جوده: البعض يقول:
– عندما تقول أنّ بشير الجميل رئيس جمهورية شرعي، يقولون: هو شرعي بالدبابات الإسرائيلية
– وعندما تقول هو رئيس إغتيل، يقولون: ولكن هذا الرئيس قبل أن يكون رئيساً، إغتال آخرين…

يقول أيلي أسود:

• إذا بدنا نقول دبابات إسرائيلية،
  ومنرجع نقول، دبابات سورية،
  وقبل سنة 1958، نفوذ ناصري على أميركي..
  كلو سوا بلبنان، باستثناء مرتين: انتخاب الرئيس فرنجية، والرئيس عون.. هودي كان الشق الداخلي طاغي على الشق الخارجي..
• إذا بدّو يللي عم يحكي هالموضوع، يفتح الدفاتر،
  بدّو يفتح الشق الإسرائيلي، والشق السوري، والشق الفلسطيني، والشق الناصري…
  لبنانياً رئيس جمهورية، إنتخب،
  نعم في أخطاء عند كلّ الناس…
  إذا الواحد بدّو يضلّ “يبرحش” بالأخطاء ما بيخلص..
  ولا منقدر نحكم البلد، ولا نقدر ننظر لقدام..

البطاقة رقم 4

رقم 1 هوي الرئيس شمعون (رئيس الجبهة اللبنانية)
رقم 2 هوي الشيخ بيار الجميل (نائب رئيس الجبهة اللبنانية)
رقم 3 بشير الجميل
رقم 4 ايلي أسود
اليوم القوات الحالية، هيي عايشة على أمجاد القوات الماضية، إذا بدّك تلغي هيديك، اليوم القوات شركة مساهمة.. نحنا ما كنا نقبض معاشات، كنا موجودين بجو شعبي.. ما كان في جو وظيفي.. باستثناء السكرتيرات يللي كانو يقبضو رواتبن..

وزير الصحة

سألتو، سؤال واحد: إنتي إعترفت انك عن تمضي 7.5 مليار ليرة بالسنة يعني 5 ملايين $ لطبابة الأجانب، المقصود فيون، 
– فلسطيني 
– سوري

بأي حق الك حق، إنك تمضي بمال المُكلّف اللبناني، عن أجانب؟؟؟

لهلق ما خدنا جواب.. 
الجواب بتجي، شتائم… 
نحنا ما منعرف شتائم…

رصد Agoraleaks.com