جان جبران يعلنها صراحة شو كان في السبت بشامات.. والحاضر يقولا للغائب.. (Video+Audio+Pictures)

– جان جبران: ما حدن يهَوبر علينا.. التيار رح يفاجئ الصديق كما العدو بالإنتخابات
– جان جبران: في مجموعة مندسّة بالتيار شغلتها زرع الشك.. منطمنها…
– جان جبران: مين ما يسمّي التيار مرشّح، كلنا رزمة وحدة ضدّ المال والزفت (التفاصيل)

***

مقتطف من حديث مستشار وزير الطاقة والمياه جان جبران بذكرى 13 تشرين 1- 1990، للتيار الوطني الحر – جبيل، في دارته في شامات: (14 تشرين الأول 2017)

• لولا من هالعهد، نحنا مش رايحين على انتخابات نيابية؛
  لولا من هالعهد، ما عنا قانون إنتخاب بساوي الجميع؛
  لولا من هالعهد، ما عنا مشاريع ماشية، وناطرين: الماي والكهربا والنفط…
  لولا من هالعهد، ما عنا أمان، وما عنّا جرود محرّرة من الإرهابيين…

للنواب، والكوادر وأصحابنا كلن بعرفو… في مجموعة اليوم، من قلب التيار مدسوسة بالتيار، عم تقلن: إنتبهو الوضع مش منيح، الانتخابات رح تكون فاشلة..

– نوابكم عاطلين
– وزراءكم مش مزبوطين.
– السمسرة بعدا ماشية.
هيدا كلّو تشكيك فينا.. !!
واللي ما عندي إيمان قوي، بينجرّ..
ايماننا قوي كتير ببيْ الكلّ.. ما بيقبل حدا فاسد معو..!!!
وما بيقبل حدا مش ماشي عَ الطريق المزبوطة…!!
وإيماننا كتير كبير بالوزير باسيل، يللي بَرَمْ الكون كلّو تيردّ كل اللبنانيين عَ لبنان.

– ايماننا كتير كبير، بالوزير باسيل، يللي ما عم يترك حدا، الاّ وما يحكي معو..
– واللي زعلان من الوزير باسيل، ما بردّ عليه عَ التلفون، هيدا زعلْ..!!
– واللي زعلان من الوزير باسيل، ما بيستقبلو ببيتو، هيدا زعل…!!
الإنسان يللي عم يبني حزب، وعم يبني دولة، هيدا الوزير باسيل.

الرئيس عون بيْ الكل، وهيدا الوزير باسيل، وهودي نوابنا، وهودي وزراءنا، وهودي كل المسؤولين عنا..

ما حدا يشككنا، وما حدا بشيل منّا الثقة، ثقتنا كبيري بنفسنا، 

منطمنن… مش رح نتنافس بين بعضنا بالحكي عَ بعضنا… رح نكون ايد وحدي بالتيار…

نواب التيار يا شباب.. متل ما بتعرفو، وانتو بتعرفو: منن عم يدقو بواب.. (الشباب يللي بدها تترشّح)!!

الملتزم هوي ملتزم بالتيار.. وسمّاه التيار، رح يترشّح.. وما سمّاه التيار، رح يكون ملتحق.. ويللي بدن يعملو نواب عم يبرمو بالضيع، ويزقو زفت عَ الضيعْ، وهوي مش نواب التيار.. ولكن منقلن:

• المال ما بيعملن نواب..
• الكرامة بتعمل نواب..
• وخاصة نواب ميشال عون.. عندن كرامة

نحنا عنا شرف وقيم.. ما حدا يخاف، ولا حدا يضللنا.. ولا حدا يهَوبر علينا.. 

– لا بمالو
– ولا بزفتو
– ولا بأختامو
نحنا منقلن، من هون، من المجموعة كلها، انتو عصب جبيل.. انتو جبيل بالتيار الوطني الحرّ.. ومن جبيل منروح عَ كسروان، وعَ بعبدا، وعَ الشمال، والجنوب.. منروح عَ البقاع وكل لبنان.. تنقلن: نحنا اللي بدنا نربح.. وكرامتنا اللي بدها تربح..

اللي بينطر 28 سنة تيعمل رئيس جمهورية، بدن 2800 سنة حتى يخسروه…

شو في السبت بشامات..!!!

سئلت باتصال  هاتفي، شو في بشامات..
قلتلو: عزيمة عاملها خيّي أديب.. ولكن رجع سألني:  أكيد عزيمة عادية بشامات؟
قلتلو: عزيمة عادية، متل العادة.. منحب نعمل عزايم، ومنحبّ الأصدقاء والأصحاب.. رجع تلّت السؤال: الهدف من العزيمة شو؟؟
هون،
نجبرت قلو: هدف العزيمة، لناس عندا كرامة، وبتاكول لقمة كرامة بالبيت…
صار فيشي كتير مؤسف، كل ما واحد تحرّك، صار في هدف..!! ناطرين بعدنا..
صار فيشي مؤسف، نسينا مين جايي ضدنا بالإنتخابات، وناطرين بعدنا….

ولكن منطمّن الكلّ: نحنا هون الموجودين، واللي مش موجودين… نحنا عصب التيار القوي.. وعصب التيار النضيف، والإتكال علينا..

أصعب شي بالحياة هوي الشك.!!!

في كتير ناس عم يشككونا.. والمشككين كتار… ولكن منقلن ايماننا بالتيار القوي رح يفاجئ الكل…

رصد Agoraleaks.com