وديع عقل: أهالي جبيل بالـ”Jackhammer” نازلة تشيل المخالفة إذا استمرّ تقاعس القوى الأمنية ووزارة الأشغال (Audio)

– عقل يتحدّى فنيانوس بابراز الرخصة القديمة.. وسامي الجميل يدعّي الطهر والعفة ويدعو لشرعنة سرقة الأملاك البحرية (التفاصيل + الترخيص )

***

مقتطف من إتصال نائب مستشار وزير مكافحة الفساد المحامي وديع عقل مع قناة الـ”OTV”: (11 تشرين الأول 2017)

• من 3 أشهر فخامة رئيس الجمهورية، بتصريح علني بيطلب التشدد بقمع كافة المخالفات على الأملاك البحرية، وعلى الشواطئ بشكل خاص.
• الشواطئ بلبنان كلها في عليا مخالفات،
  للأسف جزء منا نعمل أيام الحرب، وفي اشيا عم تُستحدث..
  وأشهرن يللي استحدثوا هوي مشروع الرملة بيضا (إيدن باي) في بيروت،
  ونحنا ما زلنا في اطار معالجتو.. وهذا المشروع سيُعاد هدمو،
  ما فينا نوعد الناس بأقل من إزالة المخالفات…

التعدي في جبيل (التفاصيل)

• جبيل مدينة مصنفة في “اليونيسكو” ضمن الأمكنة الأثرية العالمية، وهناك حماية لشاطئ جبيل، ولكن للأسف في أيام الحرب، وفي أيام المافيا التي حكمت لبنان بعد الحرب، خربوا الشط بجبيل.. وعنا شطين بجبيل:
  – الشط الجنوبي: شط الرمل
  – الشط الشمالي: شط البحصة
  اللي صار انو بكل وقاحة، ومنقطعة النظير، احد الموجودين هونيك، من الملّاكة، بياخود ترخيص من وزير الأشغال يوسف فانيانوس، وبقلو بدّو يرمّم حيط أثري.. ولا في آثار ولا ما يحزنون.. 
  وبيجو يعملو صبيّة باطون، نهار السبت (7 تشرين الأول 2017)
  تحركت فوراً بناء على تحرّك أهالي جبيل، وبلدية الظل… وحكينا وزير مكافحة الفساد نقولا تويني، ووزير البيئة طارق الخطيب.. ووزارة الداخلية.. وما خلينا حدا على الأراضي اللبنانية الاّ ما اتصلنا فيه.. وقلنالن: وقفو رجاء الباطون عن الشط..

للأسف الجهات الأمنية ما تجاوبت… 

• الباطون استمر، وقناة الـ”OTV” مشكورين أضاءوا على التعدّي….
  الإثنين ظهراً قدرنا نوقف الباطون انو ينكب على الشط..
  ولكن المنشأة ما زالت موجودة.
  والثلثاء جاء وزيري مكافحة الفساد والبيئة الى جبيل، وهني عم يتابعو الموضوع،

ولكن 

• مش كافي اللي صار لهلق،
  هيدي المخالفة بدها تكون عبرة لمن اعتبر،
  شط جبيل مش لأهالي جبيل، نص جبل لبنان ونص الشمال بيجي يسبح ببلاش عَ شط جبيل..
• مش اليوم بحطو باطون، وبكرا غيرن بحطّ.. وبصير امر واقع.
  الباطونات بدن ينشالو..
• المسؤول عن الشواطئ بوزارة الأشغال، بقول: هيدي مخالفة موصوفة، وبدها تنشال..
  رح نمهل وزارة الأشغال وقوى الأمن الداخلي انو يشيلوها، 
  إذا ما رح يشيلوها، رح ننزل نحنا الجبيليي ناخود “Jackhammer” ونشيلا.. خلصنا بقا طق حنك…
• إذا الدولة اللبنانية عاجزة انو تحمي أملاكها،
  نحنا بدنا نحمي الأملاك العامة، وهيدا الملك ملك الشعب اللبناني، والشط لالنا، 
  مش بكبو باطون، وبيرجعو يقولو شرعنوها…

سامي الجميل

• وخلي اللبنانيي يعرفو، انو بمجلس النواب سامي الجميل، يللي يدعّي الطهر والعفّة، بيقترح على مجلس النواب، يعملو تسويات، أي تمليك الأملاك العامة لأشخاص تعدوّا عليها.. وهيدي فضيحة فضيحة فضيحة…
• يعني بحسب الجميل، يللي حط ايدو على أملاك عامة حقا 50 مليون $، أو 100 مليون $،
  بدن يعطو مكافأة، انو خدا هيدي صارت ملك بيّك…!!

يوسف فنيانوس

• اليوم عنا عهد فخامة الرئيس عون، وهوي عم يعطينا تعليمات بالتشدّد بقمع المخالفات، بدنا نمشي مع العهد، وإذا قوى الأمن بدن يقصرو، بدنا نمشي قدامن.
• مبارح اجا مسؤول الشواطئ، وإجا يدافع عن يللي عامل مخالفة..
  معيب هيدا الشغل… الرخصة معطاة عمرا شهرين، وفيها بَلفْ للناس.
  منو تجديد ترخيص، والوزير فانيانوس عم يقول: أنا عم جدّد، بتحداه للوزير فانيانوس، يطلع يفرجينا الطلب القديم والرخصة القديمة، والرخصة الجديدي معنا ياها..
• هيدي المخالفة، هيي من مئات المخالفات، ولكن متل ما كنت عم قاتل لحق البيارتة، واجباتي وأقلّ واجباتي انو اعمل ذات الشي مع ولاد منطقتي.. وهلق رح نروح على الدامور.. أجتنا مخالفة جديدي، وبشط الشمال في مخالفة..

ونحنا منوعد الناس بمتابعتن، لأنو عم تحكينا، وتقلنا عن غير مطارح.. ما بدنا نقصّر.. وهون في وزير بعد ما سمعنا صوتو، هوي الوزير غطاس خوري، واجهة جبيل هيي واجهة محمية، وفي حماية حصرية للمينا.. واي رخصة بجبيل بتنمضا، في امضا لمدير عام الآثار لازم يكون…

رصد Agoraleaks.com